Umuryango The Fred Hallows Foundation ukomeje kunganira leta mu buvuzi bw’amaso

Yanditswe na Akayezu Jean de Dieu
Kuya 13 Nzeri 2018 saa 06:54
Yasuwe :
0 0

Umuryango Mpuzamahanga udaharanira inyungu, The Fred Hallows Foundation, ukomeje gufatanya na Leta y’u Rwanda mu gushyira imbaraga mu buvuzi, by’umwihariko indwara y’ishaza itera ubuhumyi.

Uyu muryango ufatanya na Minisiteri y’Ubuzima gutanga inkunga ku baganga b’abanyarwanda bajya mu mahanga kwiga ku rwego ruhanitse ibijyanye n’ubuvuzi bw’amaso.

Mu karere ka Afurika y’Uburasirazuba, The Fred Hallows Foundation ikorera mu Rwanda n’u Burundi ikaba ifite icyicaro gikuru i Kigali mu karere ka Kicukiro.

Umuyobozi wa The Fred Hallows Foundation, Nizeyimana Pierre, yabwiye IGIHE ko usibye gutanga inkunga ku banyarwanda biga ubuvuzi bw’amaso bagira na gahunda yo kugeza ubuvuzi ku babukeneye.

Yakomeje avuga ko bibanda ku ndwara y’ishaza, aho bafatanya n’ibitaro byo mu gihugu bagasuzuma abarwaye iyi ndwara nyuma inzobere zikazajyayo kubaga abarwayi, bagahabwa ubuvuzi n’insimburangingo.

Yagize ati “Nubwo hano mu Rwanda dufite abaganga 16 b’inzobere mu kuvura indwara z’amaso, abashobora kubaga indwara y’ishaza ni bake ubwo rero twashyizeho gahunda dufatanyije n’ishyirahamwe ry’abaganga b’inzobere mu kuvura amaso. ”

“Icyo dufasha ni ukugenda hirya no hino mu bitaro mu gihe abarwayi bamaze gusuzumwa bikemezwa ko harimo abagomba kubagwa barwaye ishaza. Abo baganga bari mu ishyirahamwe tukabaha ibikenewe byose ari imiti no kuborohereza mu kugera kuri ibyo bitaro bakagenda bakabaga abarwayi”.

Avuga ko ibi bikorwa mu mpera z’Icyumweru kuko abaganga baba bafite indi mirimo.

Kuva mu ntangiro z’uyu mwaka The Fred Hallows Foundation imaze kuvura abagera ku 1500 babazwe ishaza bagahabwa insimburangingo yabugenewe.

Imibare ituruka muri Minisiteri y’Ubuzima igaragaza ko 1% by’abantu bafite imyaka 50 kuzamuka mu Rwanda bafite ubumuga bwo kutabona.

Ikomeza igaragaza ko bantu bafite imyaka 50 kuzamura bafite ubumuga bwo kutabona, 56% babutewe n’indwara y’ishaza, mu gihe mu barwayi b’ishaza bose 90% muri bo ari abakuze.

Umuryango The Fred Hallows Foundation watangiye gukorera mu Rwanda mu 2006, aho watangiriye mu karere ka Rubavu. Mu 2013 ku busabe bwa Minisiteri y’Ubuzima wimukiye i Kigali ndetse utangira no gukorera hirya no hino mu gihugu.

Umuyobozi wa The Fred Hallows Foundation, Nizeyimana Pierre avuga ko bakomeza gufatanya na leta gutanga ubuvuzi bw'amaso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza