Uko Imbangukiragutabara zatanzwe na Croix-Rouge zafashije mu guteza imbere serivisi z’ubuzima

Yanditswe na Mutangana Gaspard, Prudence Kwizera
Kuya 13 Mata 2021 saa 10:02
Yasuwe :
0 0

Abaturage bivuriza ku bitaro byahawe Imbangukiragutabara n’Umuryango ufatanya na Leta mu bikorwa by’Ubutabazi, Croix-Rouge, bavuze ko serivisi z’ubuzima bahabwaga zarushijeho kuba nziza.

Binyuze muri gahunda yo gutera inkunga ibikorwa by’ubuvuzi, muri Gashyantare 2019 Croix-Rouge y’u Rwanda, yatanze Imbangukiragutabara ebyiri.

Imwe yahawe Ibitaro bya Nyamata mu Karere ka Bugesera, indi ihabwa Ibitaro bya Kibilizi mu Karere ka Gisagara. Izi mbangukiragutabara zombi n’ibikoresho byazo byaguzwe asaga miliyoni 150 Frw

Abaturage baganiriye na IGIHE bagaragaje ko nyuma yo guhabwa izi mbangukiragutabara ntawe ukirembera mu rugo cyangwa ngo abure uko agezwa ku bitaro.

Ntawuziyandemye Emmanuel yavuze ko by’umwihariko iyi mbangukiragutabara yamufashije kugera ku bitaro ubwo yari arwaye.

Ati “Nari ndwaye malaria ivanze n’imvune ku buryo iyo ntabona ubutabazi nari gupfa. Kuva i Kirarambogo ugera hano ku bitaro bya Kibilizi ni kure ku buryo ntari kugera hano n’amaguru, kandi iyo ntega moto ayo bari kunsha sinari kuyabona. Ubu sinabona uko nshimira uwazanye iyi mbangukiragutabara.”

Ibi byishimo kandi Ntawuziyandemye abihuriyeho na Muhawenimana Clarisse wagejejwe ku bitaro bya Kibilizi aturutse mu Murenge wa Mugombwa.

Ati “Aho Imbangukiragutabara yamvanye ni kure, kandi kwishyura moto birahenze.”

Umuyobozi w’Ibitaro bya Nyamata mu Karere ka Bugesera, Dr Rutagengwa Wiliam, yavuze ko imbangukiragutabara bahawe na Croix-Rouge zatanze umusanzu ugaragara mu iterambere rya serivisi abagana ibi bitaro bahabwa.

Umuyobozi w’Akarere ka Gisagara, Rutaburingonga Jérome, yashimye iki gikorwa cya Croix-Rouge avuga ko cyafashije mu kugabanya umubare w’ababyeyi bapfa babyara.

Ati “Kugira umufatanyabikorwa nka Croix-Rouge y’u Rwanda ni ibyo kwishimira. Ibikorwa ikora byadufashije kuzamura serivisi z’ubuzima. Umubare w’ababyeyi bapfa babyara ndetse n’abana bapfa bavuka wagabanutseho 50% uhereye muri 2018.”

Umuyobozi ukuriye gahunda za Croix-Rouge y’u Rwanda, Ndimbati Pierre Claver, yavuze ko uyu muryango ushaka gukomeza iyi gahunda yo guha ibitaro Imbangukiragutabara.

Uretse gutanga izi mbangukiragutabara, Croix-Rouge inahugura abakozi bita ku barwayi baba batwawe muri izi mbangukiragutabara.

Imibare yerekana ko mu Karere ka Gisagara mu 2018 hari Imbangukiragutabara esheshatu zonyine, ariko ubu zimaze kuba 12. Mu Karere ka Bugesera hari Imbangukiragutabara 10 zifashisha n’ibigo nderabuzima 15 n’Ibitaro bya Nyamata.

Izi mbangukiragutabara zatanzwe na Croix-Rouge zifasha abaturage kugera ku bitaro byoroshye
Imbangukiragutabara iba irimo ibikoresho bitandukanye byifashishwa mu butabazi
Ntawuziyandemye Emmanuel yavuze ko imbangukiragutabara yatanzwe na Croix-Rouge yamufashije kugera ku bitaro aravurwa arakira
Ndimbati Pierre Claver yavuze ko Croix-Rouge ishaka gukomeza ibikorwa byo guha ibitaro imbangukiragutabara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .