U Rwanda rwarengeje intego ya Loni mu kwita ku bafite virusi itera Sida

Yanditswe na Evariste Nsengimana
Kuya 26 Nzeri 2019 saa 09:26
Yasuwe :
0 0

Guverinoma y’u Rwanda yamaze kurenza zimwe mu ntego Ishami ry’Umuryango w’Abibumbye rishinzwe kurwanye SIDA (UNAIDs) ryihaye yo kugeza ubuvuzi ku bafite virusi itera Sida mu 2020.

Raporo nshya yashyizwe abahona ku wa 25 Nzeri 2019 yagaragaje ko u Rwanda rwateye intambwe idasanzwe mu gukumira icyorezo cya Sida, by’umwihariko rukomeje kuza imbere mu gufasha abayirwaye kubona imiti no kubarinda ingaruka zayo.

Iyi raporo yakozwe ku bufatanye bwa Guverinoma y’u Rwanda, Gahunda ya Perezida wa Leta Zunze Ubumwe za Amerika (USA) yo kurwanya SIDA (PEPFAR), Ikigo gishinzwe kugenzura no gukumira indwara cyo muri USA (CDC) n’Umushinga wa Kaminuza ya Columbia ushinzwe kurwanya virusi itera Sida (ICAP).

Ni igenzura ryakorewe ku baturage barenga ibihumbi 30 bari mu kigero cy’imyaka 16-65 n’abarenga ibihumbi icyenda bari hagati y’imyaka 10-14 bo mu ngo zirenga ibihumbi 11 basanzwe mu ngo hagati ya Werurwe 2018 na Kanama 2019.

Ryakoze rigamije kureba ingaruka virusi itera Sida igira ku banyarwanda, ryerekena ko 76% by’abafite virusi itera Sida bose ubariyemo n’abakuze barimo abagore 80% babashije kwitabwaho, benshi bashyirwa ku miti igabanya ubukana.

Ryerekanya kandi ko ubwandu bushya mu bari mu myaka 10-14 buri ku kigero cya 3%, bugaragaza ko abakuze bafite virusi itera Sida ari 210 200.

Bwanagaragajo ko ubwandu bushya buri kuri 3.7% ku bagore na 2.2% ku bagabo naho mu mujyi bwikubye inshuro 1.9% ugereranyije no mu cyaro.

Bwanerekanye ko ubwandu bushya mu bakuze buri ku muvuduko wa 0.8% ku mwaka, bivuze ko abandura ku mwaka bangana na 4500. Mu bakuze bafite virusi itera Sida, 76% bigaragara ko igenda igabanuka mu maraso aho abagore bari ku kigero cya 79.1% naho abagabo kuri 70.5%.

Ni intambwe ishimishije kuko rwamaze kurenga intego Ishami ry’Umuryango w’Abibumbye rishinzwe kurwanya SIDA (UNAIDS) ryihaye muri gahunda yo kugeza ubuvuzi ku bafite birusi itera Sida nibura mu 2020 uwo mubare ukazaba ugeze kuri 73%.

UNAIDS yihaye intego (90-90-90) ko mu 2020 abafite virusi itera Sida bazaba bazi uko bahagaze ari 90%, abafata imiti 90% naho kugabanuka kwa virusi itera Sida bikaba 90%.

Mu Rwanda raporo igaragaza ko ikigero cyo kumenya uko bahagaze ari 84%, abafata imiti ari 98% naho ikigero cyo kugabanuka kwayo mu mubiri kiri kuri 90%.

Iyo raporo yakozwe harebwa gahunda na politiki zigamije kugabanya ikigero ry’ubwandu bushya mu Rwanda, gushyira abanduye ku miti igabanya ubukana no gutanga icyerekezo gishya muri gahunda yo kuziba icyuho ku buvuzi buhabwa abafite iyo virusi.

Minisiteri w’Ubuzima, Dr Diane Gashumba, yavuze ko iby’ibanze byavuye muri iyo raporo byagaragaje umuhate wa Leta n’abafatanyabikorwa mu kurwanya virusi itera Sida nyuma ya Jenoside yakorewe Abatutsi igashegesha igihugu.

Ati “Nishimiye intambwe tumaze gutera mu kwesa intego 90-90-90 UNAIDS yashyizeho, icyuho cyagaragajwe birasaba gukomeza gushyiramo imbaraga nyinshi no gukomeza gufatanya.”

Dr Gashumba yakomeje ashimira abafatanyabikorwa muri iyo gahunda barimo PEPFAR, CDC, ICAP n’ibigo by’ubushakashatsi ku ruhare rwabyo muri ubwo bushakashatsi bwakozwe.

Umuhuzabikorwa wa gahunda zo kurwanya Sida muri Amerika, Amb Deborah L. Birx, yashyimye intambwe idasanzwe u Rwanda rumaze gutera mu gukumira no kurwanya icyo cyorezo.

Ati “Berekanye ko bishoboka binyuze mu guhuza politiki, imiyoborere, gahunda zishingiye ku mibare, uruhare rw’abaturage n’ibindi bikenewe mu gukumira virusi itera Sida.”

Umuyobozi wa CDC, Dr Robert Redfield, yagize ati “Nshimiye Guverinoma y’u Rwanda ku ruhare rwayo mu gukumira virusi itera Sida no kuba abarenga 97% bahabwa ubuvuzi. Ibyo bagezeho birenze ku ntego UNAIDS yihaye kugeraho mu 2020.”

Redfield yavuze ko ikigo ayobora kizakomeza gufasha Leta y’u Rwanda n’ibindi bihugu muri gahunda ishyiraho zo kurwanya virusi ya Sida no kurengera ubuzima bw’abaturage.

Umuyobozi wa ICAP, Wafaa El-Sadr, yavuze ko intambwe u Rwanda rwateye mu kwesa intego zashyizweho mu gukumira virusi itera Sida mu 2020 ari ubuhamya bw’uko ishyize imbere mu kuyirwanya.

UNAIDS igaragaza ko ku Isi mu bantu barenga miliyoni 39 bafite virusi itera Sida, 79% aribo bazi uko bahagaze, batatu muri batanu bayirwaye bafata imiti igabanya ubukana gusa naho 53% by’abafite virusi itera Sida ntabwo bipimisha ngo bamenye uko bahagaze.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza