U Buhinde bwahaye u Rwanda imiti izavura abarwaye Hepatite B na C barenga 7000

Yanditswe na Evariste Nsengimana
Kuya 16 Mata 2019 saa 10:31
Yasuwe :
0 0

Guverinoma y’u Buhinde yashyikirije u Rwanda imiti y’indwara y’umwijima yo mu bwoko bwa Hépatite B na C ifite agaciro ka miliyari 1.4Frw, izifashishwa mu kuvura abarwayi basaga ibihumbi 7000 hirya no hino mu gihugu.

Ambasaderi w’u Buhinde mu Rwanda, Oscar Kerketta, yayishyikirije Umunyamabanga wa Leta muri Minisiteri y’Ubuzima ushinzwe ubuvuzi bw’ibanze, Dr. Ndimubanzi Patrick kuri uyu wa 16 Mata 2019.

Dr. Ndimubanzi yavuze ko iyi miti izafasha u Rwanda kuvura abarwayi benshi ba Hépatite B na C.

Ati “Izatuma rero tubasha kuvura abantu 2000 barwaye Hépatite C n’abandi 5000 barwaye Hépatite B ariko ubwo baje kunganira n’ibindi byinshi Leta yari isanzwe ikora kugira ngo abo barwayi tubamenye, hanyuma tubatangize imiti.”

Imibare ya Minisiteri y’Ubuzima igaragaza ko hagati y’abanyarwanda 4-8% bashobora kuba bafite Hepatite B na C.

Dr. Ndimubanzi ati “Dufite gahunda y’imyaka itanu twatangiye yo kurandura Hépatite. Umwaka ushize twagiye mu turere dutandukanye dupima abantu bagera ku bihumbi 700, abo twasanze barwaye Hepatite C bagera ku 9000 twabatangije imiti ariko kuri Hépatite B ni 1000.”

Amb. Kerketta yavuze ko urwego rw’ubuzima ari rumwe mu zo u Buhinde bushyize imbere mu mubano wabwo n’ibihugu byo ku mugabane wa Afurika, binyuze mu kubaka ibikorwa remezo, ikoranabuhanga, kongerera ubushobozi abaganga n’ibindi.

Yavuze ko iyo miti bayihaye u Rwanda binyuze muri gahunda u Buhinde bufashamo urwego rw’ubuzima mu bihugu byo muri Afurika zirimo iyo kuvura abafite ubwandu bwa Sida, Malaria, igituntu, indwara z’umwijima n’izindi.

Kugira ngo umuntu avurwe indwara y’umwijima akire byasabaga ko anywa y’imiti agihe cy’amezi atatu ifite agaciro k’ibihumbi 950$ ariko Leta y’u Buhinde ifite ubushobozi bwo gukora ihendutse kandi yujuje ubuziranenge igera ku 700$.

Minisante igira abantu inama yo kwirinda indwara z’umwijima cyane cyane bakirinda gutizanya inshinge n’ibikwasi, imibonano mpuzabitsina idakingiye kandi bagakangurirwa kuzipimisha hakiri kare.

Hepatite B mu Rwanda ifite urukingo ruhabwa abana bakivuka guhera mu 2002 ndetse n’abakuru bashobora kurushaka bakaruhabwa.

Imibare ya OMS yo mu 2015 igaragaza ko abantu miliyoni 257 ku Isi bari barwaye Hépatite B naho abangana na miliyoni 71 barwaye Hépatite C.

Ambasaderi w’u Buhinde mu Rwanda, Oscar Kerketta aganira n'itangazamakuru nyuma yo gushyikiriza u Rwanda imiti
Ambasaderi Oscar Kerketta ashyikiriza Umunyamabanga wa Leta muri Minisiteri y’Ubuzima, Dr. Ndimubanzi Patrick, imiti u Buhinde bwahaye u Rwanda
Iyi miti izafasha mu kuvura abarwayi ba Hepatite B na C
Dr Ndimubanzi yavuze ko iyi miti izavura abantu 7000

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza