Sobanukirwa uko bapima ingano ya Alcohol mu maraso bitewe n’inzoga umuntu yanyoye

Yanditswe na Evariste Nsengimana
Kuya 20 Mutarama 2020 saa 10:36
Yasuwe :
0 0

Abahanga mu by’umubiri wa muntu bavuga ko ‘Ubusanzwe umubiri ukenera Alcohol ariko ukayibona uyivanye mu biribwa n’ibinyobwa bikungahaye ku masukari ariko atari ngombwa kuwuhatira ibinyobwa cyangwa ibiribwa byifitemo alcohol kuko bishobora kuwugiraho ingaruka zitandukanye zirimo n’urupfu.

Iyo alcohol igira ingaruka ku mubiri w’umuntu inshuro nyinshi duhurira nayo mu binyobwa bisembuye nk’urwagwa, ikigage, inzoga za kizungu nka Heineken, whisky n’izindi.

Umuyobozi w’agashami gashinzwe gupima ibintu bihumanya n’ingano ya alcohol mu maraso, muri Laboratwari y’u Rwanda y’ibimenyetso bya gihanga byifashishwa mu butabera (Rwanda Forensic Laboratory), Samvura Jean Pierre, yabwiye IGIHE ko Alchool ikunze gusangwa mu nzoga yitwa Ethanol.

Ati “Ni kariya kantu umuntu iyo anyoye inzoga wumva bitandukanye n’uko unyoye Soda [Fanta] kagize ikintu gahindura ku mubiri wawe niko bita Alcohol, kaboneka mu nzoga zisembuye.”

Akenshi yirema mu ruvange rw’ibinyampeke birimo amasaka, umutobe w’imbuto cyangwa ibindi bintu byifitemo ikigero runaka cy’isukari.

Samvura yasobanuye ko no mu mubiri naho habamo alcohol akenshi yiremamo ivuye mu biribwa umuntu aba yariye n’ibyo anywa. Iyo alcohol igaragara mu mubiri w’umuntu ntabwo abantu bose bayinganya.

Urugero nk’umuntu unywa inzoga nka kimwe mu binyobwa bikungahayemo alcohol, isukari n’ibindi ntabwo iyo wasanga mu mubiri we ingana n’iyo wasanga mu mubiri w’utanywa inzoga cyangwa utarya isukari nyinshi.

Samvura yavuze ko ibipimo bya Alchool ikigo akorera kibifata nk’igihe umuntu yapfuye ariko batazi icyo yazize ariko bakeka ko zaba ari inzoga. Ati “Dufata amaraso n’inkari mu gihe dusuzuma icyamwishe.”

Ibyo bipimo byafashwe by’amaraso n’inkari nibyo bishyirwa mu mashini yabugenewe. Ati “Iyo mashini niyo ihita itwereka ingano ya Alchool iri mu maraso. Iyo dusanzemo niyo tugenderaho tuvuga niba ishobora kwangiza umubiri, ishobora kuba impamvu y’urupfu.”

Iyo bamaze gupima ingano ya Alchool iri mu maraso hakurikiraho gupima iri mu nkari kugira ngo bamenye niba irimo ari iyamugiyemo mbere cyangwa nyuma y’uko apfa.

Ati “Iyo umuntu yanyoye inzoga akihagarika, hari alcohol igaragara mu nkari. Iyo tuyibonye mu nkari no mu maraso, ni ukuvuga ko udashobora gutandukanya urwo rupfu rw’uwo muntu n’iyo Alchool.”

Samvura yasobanuye ko Alcohol igenda igira ingaruka mu mubiri w’umuntu bitewe n’impamvu zitandukanye. Hari nk’igihe umuntu anyoye inzoga zigatuma atabasha gukanura neza, amaguru acika intege, agatangira kugenda ategwa, igihe agenda yikoza hirya no hino, igihe atakaza ubwenge cyangwa akaba yanapfa.

Abantu babiri banywa inzoga zingana ntibanganye alchol mu maraso bitewe n’impamvu zirimo ingano y’ibinure cyangwa ibindi bintu bishobora gukumira umuvuduko wayo mu kwinjira mu maraso.

Ingano ya Alchool itagize icyo itwaye umubiri ngo ni itamugiraho ingaruka n’imwe muri izo zavuzwe cyangwa ngo imubuze gukora akazi ke ka buri munsi.

Ati “Niba hari alcohol ishobora kukubuza gutwara imodoka, iyo ntiba yemewe. Alchool yemewe ni isanzwe mu mubiri ukoresha nyine. Iyo kugira ngo uyibone ntibisaba kunywa inzoga kuko abatazinywa ntibagira ikibazo cyo kuyibura.”

Yatanze urugero niba muri litiro imwe y’inzoga harimo alcohol 5%, yose iramutse yinjiye mu maraso uko yakabaye haba hinjiyemo Ml 50 za Alchool, igasangamo isanzwe mu mubiri. Ubusanzwe umuntu muzima agira hagati ya litiro 4-5 z’amaraso. Bivuze ko iyo alcohol yahita yivanga n’ayo maraso.

Gusinda ni iki?

Ibisobanuro byo gusinda mu Kinyarwanda, ni ukugaragaza imyitwarire itandukanye n’iyo usanzwe ugaragaza bitewe n’inzoga wanyoye.

Samvura ati “Ntabwo bipimirwa ku ngano y’inzoga wanyoye bireberwa mu bikorwa wakoze. Niba usanzwe witonda wamara kunywa inzoga ugatangira gusakuza, kurwana, kugenda wikoza hirya no hino, uko ni ugusinda.”

Samvura yasobanuye ko uburyo ikigo akorera bwifashishwa mu gupima ingano ya Alchool mu maraso nta tandukaniro rinini n’ubwifashishwa na polisi ishami rishinzwe umutekano wo mu muhanda, umuntu ahuhamo igahita imwereka ingano y’iyo afite mu maraso.

Ati “Iyo umuntu anyoye inzoga, kumwe amaraso azenguruka mu mubiri aba ari kumwe na alcohol, akagera mu bihaha. Kumwe rero uhumeka, Alchool isohokana n’umwuka uhumekwa.”

Bisobanuye ko ibikoresho bakoresha bikoranye ikoranabuhanga ritanga ibipimo bimwe n’ibyagaragara bayipimye mu maraso.

Alchool iyo ibaye nyinshi mu mubiri iwugiraho ingaruka zirimo gusinda, kureba hafi, kwangiza zimwe mu nyama zo mu nda ku buryo byagira ingaruka ku kazi ka buri munsi karimo nko gutwara imodoka n’ibindi.

Samvura avuga ko inama yagira abantu kandi nawe yakwigira ari uko igihe abantu bagiye nko mu kabari ari benshi hagomba kuvamo umwe ntazinywe kugira ngo niba bafite nk’imodoka bari butahemo abatware.

Ati “Inama nagira abantu ni ukureka kunywa inzoga bazi ko hari akandi kazi bagiye gukora. Urugero niba utwaye imodoka wanyoye, ntabwo uzamenya ngo ibipimo ni kangahe, imashini niyo ibipima..Niyo waba udatwara imodoka, ushobora gusinda mu ruhame bakaguhana.”

Itegeko riteganya ko umuntu afite alchool itamwemerera gutwara ikinyabiziga iyo igipimo kiyipima kigaragaza mu maraso harimo garama 0.8 muri litiro y’amaraso, ariko leta iteganya kumanura ikageza kuri 0.4.

Imibare ya Polisi yo muri Mutarama kugera Nzeri uyu mwaka yerekana ko abantu 532 bishwe n’impanuka, 705 barakomereka bikomeye, 1007 bakomereka byoroheje naho imitungo irenga 1200 irangirika.

Ishami ry’umuryango w’abibumbye ryita ku buzima (OMS), riteganya ko umuntu wese atemerewe kurenza alcool ya 0.05 ngo atware ikinyabiziga. Hari kandi ibihugu birenza iki gipimo harimo n’u Rwanda rufite 0.8, n’ibindi biri munsi yacyo bitewe n’amahitamo yabyo.

Muri litiro imwe y’inzoga harimo alcohol 5%, yose iramutse yinjiye mu maraso uko yakabaye haba hinjiyemo Mililitiro 50 za Alchool

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza