Rusizi: Hatangijwe ubukangurambaga bwo gukingira Ebola mu baturage

Yanditswe na Sitio Ndoli
Kuya 19 Ukuboza 2019 saa 05:52
Yasuwe :
0 0

Minisiteri y’ubuzima ifatanyije n’umuryango w’Abibumbye wita ku buzima n’abandi bafatanyabikorwa batangije ubukanguramba bwo gukingira kubushake icyorezo cya Ebola mu baturage b’akarere ka Rusizi.

Icyo gikorwa cyatangijwe kuri uyu wa Gatatu tariki 18 Ukuboza 2019.

Iyi gahunda yiswe ‘Umurinzi’ yatangirijwe mu karere ka Rubavu, kuri ubu hakaba hakurikiyeho akarere ka Rusizi nka kamwe mu turere duhana umupaka na Repubulika Iharanira Demokarasi ya Congo yibasiwe na Ebola ku rwego rwo hejuru.

Umunyamabanga wa Leta muri Minisiteri y’Ubuzima, ushinzwe ubuvuzi bw’ibanze, Dr. Ndimubanzi Patrick, yavuze ko abantu bakwiye kwikingiza Ebola mu rwego rwo kuyikumira.

Yagize ati “Uru rugamba turimo rwo gukumira no kurwanya Ebola dushobora gutsinda twese dushyize hamwe, nicyo iki gikorwa kivuze. Ubu twabonye uburyo bushyashya, uburyo tugomba kwitabira, uburyo buzakoreshwa ku bantu bashobora guhura n’abantu bafite indwara ya Ebola.”

Cosmos Kusimwa Bishisha, Minisitiri w’ubuzima mu Ntara ya Kivu y’Amajyepfo muri Repubulika Iharanira Demokarasi ya Congo, yashimye ubufatanye bw’ibihugu byombi mu guhangana na virus ya Ebola.

Ati “Twakingiye abantu ibihumbi 30 birimo abantu bakora mu bijyanye n’ubuzima, twagiranye ibiganiro n’abayobozi mu by’ubuzima bo mu Rwanda dushyira hamwe ingamba zo kurwanya iyi ndwara, turashimira abayobozi bo mu ntara y’Iburengerazuba bashyize ingufu mu gusuzuma iyi ndwara ku mipaka.”

Hari umubare munini w’Abanyarwanda bajya gukora imirimo itandukanye muri RDC, akaba ariyo mpamvu abakingiwe baganiriye na IGIHE bavuze ko uru rukingo ruzabafasha kwirinda Ebola.

Mukamana Valence yagize ati “Ikibazo twari dufite nuko twikangaga ko dushobora kwandura kubera duturanye n’igihugu cyagize ibibazo no guhura ni icyorezo cya Ebola, tujya muri Congo gucuruza urumva ko twikingiye. Turashima abayobozi bacu batuzaniye uru rukingo.”

Abantu basaga 2000 bishwe na Ebola muri Congo. Muri abo harimo umwe wo mu ntara ya Kivu y’Amajyepfo. Ubuyobozi bw’iyi ntara kuri ubu buravuga ko nta murwayi urongera kugaragara nyuma y’aho batangiriye gahunda yo gukingira.

Uru rukingo rutangwa mu byiciro bibiri, urwa mbere rukurikirwa n’urwa kabiri nyuma y’amezi abiri uhereye igihe urwa mbere rwatangiwe.

Mu Rwanda hazakingirwa abaturage ibihumbi 100 bo mu karere ka Rubavu n’ibihumbi 100 mu karere ka Rusizi.

Uru rukingo rukorwa n’ikigo cy’Abanyamerika ‘Johnson and Johnson’, rwageze bwa mbere muri Congo mu kwezi k’Ukwakira uyu mwaka aho biteganyijwe ko hazakingirwa ibihumbi 500.

Umunyamabanga wa Leta muri Minisiteri y’Ubuzima Patrick atangiza igikorwa cyo gukingira Ebola
Minisitiri w'ubuzima mu ntara ya Kivu y'Amajyepfo , Cosmos Kusimwa Bishisha (ibumoso) hamwe n'Umunyamabanga wa Leta muri Minisiteri y’Ubuzima, Dr Patrick Ndimubanzi
Umwe mu bapolisi bakingiwe mbere yo kumukingira
Abakinnyi b'Ikinamico barimo Ndimbati bakiniye abaturage umukino ubakangurira kwikingiza Ebola
Bamwe mu baturage bo mu karere ka Rusizi bitabiriye ubukangurambaga bwo kwikingiza Ebola

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza