Rubavu: Umugore uherutse kubyara arwaye Coronavirus yasezerewe mu bitaro

Yanditswe na Mukwaya Olivier
Kuya 7 Kanama 2020 saa 08:28
Yasuwe :
0 0

Cyizanye Marie Béata wari umaze iminsi 20 arwariye Coronavirus mu kigo nderabuzima cya Rugerero yasezerewe akaba yatashye ameze neza n’umwana we.

Kuwa 17 Nyakanga 2020,nibwo inzego z’ubuzima mu Rwanda zatangaje ko Cyizanye witabwagaho kubera ko yari yaranduye Coronavirus yibarutse umwana w’umuhungu.

Mu butumwa yanyujije ku rubug rwa Twitter icyo gihe, Ikigo cy’Igihugu gishinzwe Ubuzima, RBC, cyavuze ko uyu mubyeyi wibarutse ameze neza we n’umwana we.

RBC yagize iti "Tunejejwe no kubamenyesha ko umwe mu bavurwa COVID-19 yibarukiye umwana w’umuhungu mu Kigo Nderabuzima cya Rugerero kimwe mu bigo bivurirwaho abarwaye COVID-19 mu Rwanda. Umwana na nyina bameze neza."

Umuyobozi w’ikigo cyakira abarwayi ba Covid cya Rugerero, Nyiranshuti Suzane, yashimye ukuntu babanye n’uyu mubyeyi akaba atashye neza kandi yaraje afite uburwayi anatwite.

Ati “Uyu mubyeyi twabanye neza, nta bimenyetso bikomeye yari afite gusa kuba yari atwite twamubaye hafi. Twamuhaye ibikoresho byose birimo imyenda y’umwana ndetse n’umuryango we twawubaye hafi kuko no kuba yari atuje byatumye akira vuba”.

“Kuba atashye twabyakiriye neza kuko yaje arira. Yaratunguwe kubera ukuntu yari afite ubwoba kubera kurwara anatwite none ubu atashye neza’’

Abashakashatsi mu by’ubuvuzi bemeza ko umubyeyi wasanganywe COVID-19 ashobora kwanduza umwana akimutwite cyangwa amubyara ariko ngo bibaho gake.

Abaganga bavuga ko bitaye kuri uyu mubyeyi mu gihe cyose yari amaze mu bitaro
Cyizanye yasezerewe ameze neza we n'umwana we nyuma yo kubyara arwaye coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .