00:00:00 IGIHE NETWORK KN KINYARWANDA EN ENGLISH FR FRANCAIS

Prof Fisseha yagaragaje impamvu ubuvuzi bwa Afurika bukijegajega

Yanditswe na Ferdinand Maniraguha
Kuya 21 June 2022 saa 02:08
Yasuwe :

Umuyobozi ushinzwe ibikorwa mu muryango Susan Thompson Buffett Foundation, Prof Senait Fisseha, yavuze ko icyorezo cya Covid-19 cyagaragaje ko Umugabane wa Afurika ukijegajega mu buvuzi kandi ko nta cyizere gihari cyo kuziba icyo cyuho mu gihe nta shoramari rishyizwe muri urwo rwego.

Yabitangaje kuri uyu wa Kabiri mu nama izwi nka People’s Forum, ijyanye n’inama mpuzamahanga ihuza ibihugu bikoresha Icyongereza (CHOGM) iri kubera mu Rwanda.

Mu kiganiro kivuga ku kubaka urwego rw’ubuvuzi ruhamye, Dr Fisseha, Umunya-Ethiopia wakuriye muri Leta Zunze Ubumwe za Amerika ubu akaba aba mu Rwanda, yavuze ko kubaka urwego rw’ubuvuzi binyuze mu gukomeza ubufatanye mpuzamahanga, ubwabyo bidatanga icyizere.

Ati “Uburyo twubatse bwo kubona ibicuruzwa n’ubundi uburyo bwose bwari busanzweho bwadufashaga kubona ibyo dukeneye bwarahagaze. Icyo nakuyemo ni uko buriya buryo tubonamo ibyo dukeneye bufite ibibazo. Ikindi cyananiwe muri kiriya gihe ni inzego zashyizweho ngo zirinde abaturage hirya no hino ku Isi.”

Prof Fisseha yavuze ko nyuma yo guhagarara k’uburyo bwose bwateraga inkunga ubuvuzi bwa Afurika mu gihe cya Covid-19, byagaragaye ko hakenewe kubaka inzego z’ubuvuzi zihamye mu bihugu bya Afurika, nta gutegereza ak’imuhana.

Ati “Imikorere y’ubu buryo mpuzamahanga yatengushye abaturage by’umwihariko imiryango itagira kivurira. Abaturage bo muri Afurika yo munsi y’Ubutayu bwa Sahara barababaye cyane ngo babone inkingo.”

Yahaye umukoro Guverinoma za Afurika zikibona urwego rw’ubuvuzi nk’ikintu kidakwiriye gushorwamo amafaranga menshi.

Ati “Urwego rw’ubuzima kenshi rwagiye rurebwa nk’ikintu kiri ku ruhande, ariko icyorezo cyatweretse ko udashobora kwirengagiza ubuzima ngo wibwire ko ibindi bizakora neza. Guverinoma zikwiriye gushyira imbaraga nyinshi mu gushora mu rwego rw’ubuzima. Gushora imari mu buvuzi ni ugushora mu baturage by’umwihariko imbere mu bihugu.”

Yakomeje agira ati “Turahitamo kwita ku kureba ikibazo cy’ubuzima ku rwego mpuzamahanga twibagirwe ubuvuzi bw’ibanze bukenewe cyane n’abaturage.”

Yatanze urugero ku buryo u Rwanda rushyira imbaraga mu kubaka urwego rw’ubuvuzi bw’ibanze ruhamye, avuga ko aricyo n’ibindi bihugu bikwiriye gukora.

Ati “Urebye ibihugu nk’u Rwanda mu ngamba zigamije gutabara ubuzima bw’abatutage, abaganga b’inzobere mu buvuzi rusange bagiye bahuzwa n’ibigo bitanga ubuvuzi bw’ibanze ku buryo ibijyanye no gusuzuma indwara bikorerwa ku rwego rw’ibanze , bigafasha abaturage kubona serivisi hafi kandi byihuse ariko bikanafasha ko ku bitaro bikuru hatuzura abarwayi.”

Dr Ravi Rannan Eliya, Umuyobozi w’Ikigo Institute of Health Policy (IHP) cyo muri Sri Lanka, yavuze ko imiryango itegamiye kuri Leta ikwiriye kugira uruhare mu gushyira igitutu kuri za Leta, kugira ngo zishore amafaranga menshi mu rwego rw’ubuzima.

Yavuze ko bigomba kunyura mu gusoresha cyane abanyemari ku buryo inyungu bakura mu bakiliya babo, igaruka kubaka urwego rw’ubuzima.

Ati “Mu bihugu byinshi bya Commonwealth ubwishingizi bw’ubuvuzi ntabwo ari bwo bukoreshwa, hakoreshwa ahanini imisoro ya Leta mu kubaka ibikorwa remezo by’ubuvuzi. Imiryango itegamiye kuri Leta ikwiriye kuzamura ijwi kugira ngo abakire basoreshwe. Ntabwo abanyapolitiki baba bashaka kubivugaho ariko nibyo bizafasha.”

Loni igaragaza ko umuntu umwe muri Afurika Leta imutangaho hagati y’amadolari 8 na 129 ku mwaka mu bijyanye n’ubuvuzi, mu gihe mu bihugu byateye imbere umuntu umwe atangwaho amadolari ibihumbi bine.

Mu mwaka wa 2001 ibihugu bya Afurika byari byiyemeje kujya bikoresha 15 % by’ingengo y’imari yabyo mu bijyanye no kubaka urwego rw’ubuvuzi ariko kugeza mu 2018, ibihugu bibiri gusa nibyo byari bimaze kugera kuri iyo ntego.

Prof Fisseha yavuze ko kwirengagiza urwego rw'ubuvuzi muri Afurika bizakomeza gusubiza inyuma uwo mugabane
Hagaragajwe ko kubaka inzego z'ubuvuzi zihamye bikwiriye guhera ku rwego rw'igihugu
Gusoresha abaherwe byatanzwe nk'umuti uhamye wo guteza imbere inzego z'ubuvuzi mu bihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .