Nyamagabe: Hadutse indwara y’uruhu yaciye igikuba mu baturage

Yanditswe na Prudence Kwizera
Kuya 6 Gashyantare 2019 saa 01:09
Yasuwe :
0 0

Bamwe mu baturage batuye mu mirenge itandukanye y’Akarere ka Nyamagabe, batewe impungenge n’uko batangiye kurwara no kurwaza indwara y’ibiheri byo ku ruhu, bagasaba inzego z’ubuzima kubafasha kumenya ikiri kuyitera.

Bavuga ko iyo ndwara batangiye kuyirwara mu mpera za 2018 bityo ibahangayikishije kuko idasanzwe kandi iri kugenda ikwirakwira hirya no hino n’abayandura bakiyongera.

Umwe mu batutage ufite umwana ubirwaye ati “Ni ibintu biza bigatutumba bikamera nk’ibirimo amashyira ubundi umuriro ugahinda”

Undi ati “Iyo umwana yabirwaye ku musozi ari umwe agasozi kose karandura. Aba bose uko ari batatu (yerekana abana be) barabirwaye kandi ku musozi wacu hari benshi babirwaye.”

Abaturage bavuga ko iyo ndwara imeze nk’icyorezo kuko igenda ikwirakwira mu buryo bwo kwandura, bagasaba ko inzego z’ubuzima zayitaho by’umwihariko.

Umuyobozi w’Akarere ka Nyamagabe, Uwamahoro Bonaventure, avuga ko iby’iyo ndwara babimenye kandi batangiye ibikorwa byo kuyikumira ndetse hari abagera kuri 18 bayirwaye bari gukurikiranwa by’umwihariko.

Ati “Twaje gusanga ari indwara ituruka ku mwanda, ni ibiheri, ibyinshi bigaragara ku maboko n’amaguru ariko n’umubiri wose. Abo yagaragayeho kugeza ubu dufite abagera kuri 18 bajyanwe mu bitato bya Kigeme bari kwitabwaho.”

Uwamahoro avuga ko aho yagaragaye cyane ari mu Murenge wa Uwinkingi, ariko yatangiye no kuboneka mu mirenge bituranye ya Kibirizi n’ahandi.

Avuga ko ku bufatanye n’inzego z’ubuzima n’iz’ibanze bari kwihutira gushakisha abayanduye mu ngo no mu bigo by’amashuri kugira ngo bakurikiranwe bavurwe.

Ati “Icyo abaganga batubwira kandi dukwiye gukangurira abaturage twese dufatanyije ni indwara iterwa n’umwanda; kongera isuku byadufasha cyane.”

Yemeza ko bari kwigisha abaturage kurwanya umwanda kuko ibimenyetso byerekana ari wo uri kuyitera kandi bakihutira kujya kwa muganga igihe hari ugaragaje ibimenyetso.

Iyo ndwara y’ibiheri byo ku ruhu iri kwibasira abaturage b’ingeri zose barimo abana bato, urubyiruko n’abakuze.

Ni indwara y'uruhu ubuyobozi buvuga ko iterwa n'umwanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza