Itsinda ry’abategarugori bakora mu Ishuri Rikuru ryigisha Imyuga n’Ubumenyingiro mu Ntara y’u Burasirazuba (IPRC East ) biyemeje kuzenguruka ibigo by’amashuri yigwamo n’abakobwa yo muri iyo ntara mu rwego rwo kubafasha kwirinda no guhangana n’ibibazo bitandukanye harimo icyorezo cya SIDA n’inda zitateganijwe.

Ubu bukangurambaga bugamije gushishikariza abana b’abakobwa kwirinda no gusobanukirwa virusi itera SIDA n’izindi ndwara zandurira mu mibonano mpuzabitsina ndetse no kwirinda inda zitateguwe.

Iki gikorwa cyatangirijwe mu ishuri rya FAWE Girls School Kayonza riherereye mu karere ka Kayonza kuya 18/10/2014 aho abategarugori bibumbiye muri Urumuri Women Club ikorera muri IPRC East basuye iryo shuri bakagirana ibiganiro n’abaryigamo.

Aba bategarugori bavuga ko impamvu bahisemo amashuri y’abakobwa ari uko mu bandura icyorezo cya SIDA mu gihugu ndetse no hirya no hino ku isi higanjemo igitsina gore n’urubyiruko.

Umuyobozi wabo Umutoni Ernestine avuga ko bateganije iyi gahunda nyuma yo kubabazwa n’uruhuri rw’ibibyugarije abakobwa bakiri bato muri iki gihe.

Yagize ati : ’’ Muri iyi minsi bimaze kugaragara ko urubyiruko cyane cyane abana b’abakobwa bugarijwe n’ibibazo bikomeye birimo ihohoterwa , icyorezo cya SIDA, inda zitateganijwe, byose biganisha mu gatakaza amahirwe yabo yo kubaho no guhagarika amashuri , kuba ibirara no kwishora mu biyobyabwenge.’’

Umujyanama mu wa Urumuri Women’s Club, Nyinawingeri Diane yavuze ko impamvu zituma urubyiruko rwishora mu mibonano mpuzabitsina ari Ubukene ,Kutamenya gufata icyemezo ,uburara ,Kunywa ibiyobyabwenge ,irari cyane cyane kubana b’abakobwa , filmi z’urukozasoni n’ikibazo cy’imyumvire.

Nyinawingeri akomeza avuga ko abakobwa benshi mu rubyiruko bakomeje kugorwa no guhakana imibonano mpuzabitsina idakingiye, kandi abenshi mu rubyiruko bibwira ko ari ho urukundo nyarwo rushingiye.

Abagize iyi club basobanuye ko abana bavukanye ubwandu bwa SiDA bashobora kwanduza bagenzi babo biturutse ku mibonano mpuzabitsina bakinisha bakiri bato cyangwa se mu gutizanya ibikoresho bitobora uruhu bikavisha amaraso.

Abanyeshuri bahamagariwe kwima amatwi abavuga ko agakingirizo kagabanya uburyohe bagahitamo gukora imibonano mpuzabitsina idakingiye.

Ikindi kibazo ngo ni uko ababyeyi benshi badakunze kuganiriza abana babo kubuzima bw’imyororokere, kuri sida no kuzindi ndwara zandurira mu busambanyi.

Musanabaganwa Laetitia uyobora FAWE Girls School Kayonza ariho ubu bukangurambaga bwatangiriye we yashimangiye ko kwifata ariyo ntwaro ikomeye mu kwirinda icyorezo cya SIDA ndetse no kudacumura ku Mana. Yashishikarije abana b’abakobwa kwifata kugeza igihe bazabona abo bashingana urugo.

Abanyeshuri basobanuriwe uburyo SIDA yandura, ibimenyetso byayo n’uburyo bwo kuyirinda.

Uretse gushishikarizwa kwirinda SIDA , abanyeshuri ba FAWE Girls School Kayonza bashishikarijwe kwitabira imyuga mu butumwa bwatanzwe binyuze mu ikinamico no gutanga udupapuro(depliants) dusobanura imyigishirize y’imyuga.