Minisitiri w’ubuzima yasabye abajyanama b’ubuzima b’i Rusizi gushaka umushinga ubinjiriza amafaranga

Yanditswe na Sitio Ndoli
Kuya 30 Ukuboza 2019 saa 10:43
Yasuwe :
0 0

Minisitiri w’ubuzima, Dr Diane Gashumba yasabye abajyanama b’ubuzima gushaka icyo bakora cyabateza imbere nk’abandi bajyanama b’ubuzima bo mu tundi turere.

Ibi yabigarutseho kuri iki Cyumweru tariki ya 29 Ukuboza, mu ruzindiko yagiriye mu karere ka Rusizi, ubwo yagiranaga inama nabo ndetse anareba aho gahunda yo gukingira Ebola igeze muri aka karere.

Dr Diane Gashumba yabibasabye yifashishije urugero rw’abajyanama b’ubuzima bo mu karere ka Karongi, maze asaba abajyanama b’ubuzima bo mu karere ka Rusizi ko nabo bakwiye kwishyira hamwe bakagira umushinga wabateza imbere.

Ati “Karongi aho intara ifite icyicaro muzi ikizu cy’abajyanama b’ubuzima gihari, kiza cyane cy’ubucuruzi. Uriya ni umushinga mwiza, natwe abajyanama b’ubuzima ba hano muri Rusizi tugire umushinga udushyira hamwe, tugire udushinga n’iyo twaba duto ariko dufite akamaro.”

Yasabye umuyobozi w’ibitaro bya Gihundwe kugaragaza umushinga w’abajyanama b’ubuzima kugira ngo uzabateze imbere.

Dr Placide Nshizirungu, umuyobozi w’ibi bitaro yavuze ko hari ikigo cyiri kubigira umushinga wo kubaka inzu y’ubucuruzi, ku buryo vuba aha bazaba bamenye uko bihagaze.

Ati “Icyo kigo cyiri gufatanya n’akarere na Minisiteri y’ubuzima kureba uburyo amakoperative y’abajyanama b’ubuzima bo mu karere ka Rusizi yakwiteza imbere. Hari umushinga mwiza uteganyijwe kandi nidufatanya tuzawugeraho wo kubaka inzu y’ubucuruzi muri gare ya Rusizi.”

Ni inkuru abajyanama b’ubuzima bakiranye ibyishimo. Nyirabanguka Léonille yavuze ko bagize amahirwe iyo nzu ikubakwa, byanaha amahirwe bamwe mu bajyanama b’ubuzima badafite ikindi bakora.

Ati “Hari umugabane shingiro buri munyamuryango yagiye atanga, yuzuye yadufasha kuko hari n’abajyanama badafite akazi, urumva yadufasha buri wese akabasha kwiteza imbere.”

Havugimana Ildephonse na we yagize ati “kiriya gitekerezo ni cyiza. Hariya hantu ni heza, ni ahantu hagendwa haba abantu benshi. Nituramuka tuyujuje tuzabona inyungu ifashe buri mujyanama kwiteza imbere.”

Mu karere ka Rusizi habarurwa abajyanama b’ubuzima 2305 bari mu mirenge yose 18 igize akarere.

Abajyanama b’ubuzima bo mu Karere ka Karongi bibumbiye muri koperative 22 mu 2017 bujuje inzu y’ubucuruzi yatwaye amafaranga miliyoni 350, bakuye mu kwizigama. Buri koperative yagiye itanga miliyoni 9 n’ibihumbi 100 Frw kugira iyo nzu yubakwe.

Minisitiri w'ubuzima Dr Diane Gashumba yasuye ibikorwa bitandukanye by'ubuvuzi muri Rusizi
Dr Diane Gashumba yavuze ko abajyanama b'ubuzima bakwiriye kugira ikindi bakora bahuje imbaraga kikabateza imbere
Abajyanama b'ubuzima biyemeje gushyigikira umushinga uzabafasha kwivana mu bukene

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza