00:00:00 IGIHE NETWORK KN KINYARWANDA EN ENGLISH FR FRANCAIS

Minisante yatanze icyizere ku koroshya ingamba za Covid-19

Yanditswe na Muhonzire Sylvine
Kuya 17 January 2022 saa 11:24
Yasuwe :

Minisiteri y’Ubuzima yatangaje ko ingamba zo kurwanya ikwirakwira rya Covid-19, zishobora koroshywa mu minsi iri imbere mu gihe imibare y’abarwara yakomeza kugabanuka n’abikingiza bakiyongera.

Umunyamabanga wa Leta muri Minisiteri y’Ubuzima ushinzwe Ubuvuzi bw’Ibanze, Dr Mpunga Tharcisse, yavuze ko ubuzima bushobora gusubira uko bwahoze mu gihe nta yindi Coronavirus nshya yihinduranyije yaba ibonetse.

Ubwo yari mu kiganiro n’abanyamakuru kuwa 15 Mutarama 2022, yavuze ko ugereranyije imibare y’abanduye mu cyumweru cyatangiye kuwa 10 Mutarama n’icyakibanjirije cyatangiye kuwa 3 Mutarama, imibare yagabanutse ku buryo bugaragara, bitanga icyizere ku koroshywa kw’ingamba.

Raporo ya Minisante yo kuwa 16 mutarama 2022 igaragaza ko igipimo cy’ubwandu mu minsi irindwi ishize kiri kuri 3,2% mu gihe mu cyumweru cyari cyabanje (kuva ku itariki 4-10 Mutarama 2022) ijanisha ku bandura ryari 5,1% bivuze ko mu bantu barenga ibihumbi 147 bari bapimwe 7.162 basanzwemo Covid-19.

Dr. Mpunga yavuze ko uretse n’igabanuka ry’abandura, umubare w’abakingirwa ugenda wiyongera ku buryo nibagera ku ntego bihaye yo gukingira miliyoni 1,6 mu minsi 15 bagahabwa dose ya mbere n’iya kabiri, bitanga icyizere ko ubuzima buzasubira uko bwahoze.

Yagize ati “(Gukingira) Tubifatanyije ni uko imibare igenda igabanuka, biratanga icyizere ko ubuzima buzongera bugasubira mu buryo nk’uko byari bisanzwe, cyereka hongeye kwaduka izindi virusi zihinduranyije zigahindura uburyo tubona Covid-19 iteye.”

“Ariko kugeza ubu dukurikije uko Omicron yatangiye n’uko ibintu bimeze n’uko abarwayi bagenda bakira batarembye n’abakingiwe bakagenda barushaho kugaragaza ubudahangarwa buri hejuru cyane, imibare y’abakingirwa iramutse yiyongereye, hari icyizere cy’uko ingamba zizoroshywa abantu bagasubira mu buzima busanzwe.”

Dr. Mpunga yavuze ko kuva inkundura ya Gatatu ya Covid-19 yagera mu Rwanda mu Ukuboza nta barwayi benshi barembye bigeze biyongera mu bitaro kuko ku itariki 15 Mutarama hari abarwayi 11 mu bitaro mu barenga ibihumbi 4 barwaye Covid-19.

Uku kugabanuka kw’abaremba Minisante igaragaza ko guterwa n’ubwiyongere bw’abikingiza, aho kugeza ubu mu Rwanda hafi miliyoni 8 zahawe nibura dose ya mbere y’urukingo rwa Covid-19 mu gihe abandi barenga miliyoni 6 bahawe dose zombi ndetse n’abandi barenga ibihumbi 600 bafashe urukingo rushimangira.

U Rwanda rufite intego ko muri Nyakanga 2022, hazaba hamaze gukingirwa 70% by’abaturage.

Ingamba za Covid-19 ziri gukurikizwa mu gihugu hose zashyizweho ku itariki 7 Mutarama.

Amabwiriza yo gukumira ikwirakwira ry'icyorezo cya Covid-19 ashobora koroshywa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .