Minisante yahumurije abanyarwanda ku bwiyongere bw’imibare y’abanduye coronavirus

Yanditswe na Twarabanye Venuste
Kuya 29 Werurwe 2020 saa 12:26
Yasuwe :
0 0

Umuyobozi w’ikigo cy’igihugu cy’ubuzima RBC, Dr. Sabin Nsanzimana yatangaje ko abantu badakwiye gukurwa umutima n’imibare y’abarwayi ba coronavirus, ko ahubwo kubamenya no kubitaho ari inzira yo gutsinda icyo cyorezo.

Kuva ku itariki 14 Werurwe 2020 ubwo Umuhinde wageze mu Rwanda ku wa 8 Werurwe 2020 avuye i Mumbai, yatahurwagaho icyorezo cya Coronavirus, Guverinoma y’u Rwanda yahise ishyiraho itsindsa ry’abashinzwe gukurikirana abahuye na we.

Ni itsinda ryagiye ryongerwa uko abantu bagiye baboneka bigakekwa ko bahuye n’abandi bantu, ubu rikaba rigizwe n’abagera kuri 220. Rihora rihuze mu kazi kenshi guhera saa moya z’igitondo kugera mu masaha ya saa saba z’ijoro.

Akazi kabo ni ugushakisha uwo ari we wese wagize aho ahurira n’abarwayi ba coronavirus bamaze kugaraga mu Rwanda bageze kuri 60.

Nicole Jabo, umwe mu rubyiruko rusoje amasomo muri kaminuza yigisha iby’ubuvuzi ya Butaro izwi nka University of Global Health Equity, aherutse kubwira iitangazamakuru ko ari akazi katari koroshye bagitangira ariko ko uko imibare igenda iboneka y’abanduye n’abahuye nabo, ariko bagira imbaraga zo gukomeza gukora akazi.

Ati “Uko imibare igenda yaguka y’abantu barwaye, natwe ni ko twagiye twiyongera kugira ngo tubashe kubikurikirana neza.”

Mugenzi we Norbert Twagirayezu usoje amasomo y’ubuvuzi muri Kaminuza y’u Rwanda, avuga ko bwa mbere hari ababaga bakekwagaho coronavirus batabyumva, nyuma bagenda basobanukirwa.

Ati “Harimo nk’uwo nahamagaye atari kubyumva kuko bwari ubwa mbere ariko maze kumusobanurira arabyumva. Benshi barabyishimira kumva ko tunabakurikirana.”

Gukurikirana abahuye n’umuntu umwe wanduye bikorwa n’itsinda ry’abari hagati ya batandantu n’umunani muri iyo kipe nini y’abantu 220.

Iyo uwahuye n’uwanduye amaze kuboneka, ashyirwa mu kato k’iminsi 14 mu rugo iwe yarangira nta kimenyetso na kimwe agaragaje ntiyongere gukurikiranwa.

Christelle Muvunyi avuga ko iyo ukurikiranwa agaragaje kimwe mu bimenyetso muri iyo minsi ahita agezwa kwa muganga agatangira gukurikiranwa.

Ati “ Hagati aho naho ushobora kugaragaza kimwe mu bimenyetso tuba twaragusobanuriye kandi tugusobanurira umunsi ku wundi. Iyo kibonetse rero tugusaba ko twaza kugufata tukagushyira mu kato kugira ngo noneho inzobere n’ikipe y’abaganga bagukurikirane.”

Kugeza ubu mu Rwanda abagera ku 1 281 ni bo barimo gukurikiranirwa hafi n’itsinda ribishinzwe ngo harebwe niba bataranduye icyorezo cya COVID-19 nyuma yo guhura n’abamaze kucyandura. Imibare yerekana ko abagera kuri 3% by’abamaze gupimwa iki cyorezo ari bo bacyanduye.

Umuyobozi w’ikigo cy’igihugu cy’ubuzima RBC, Dr. Sabin Nsanzimana avuga ko gukomeza gutahura abanduye iki cyorezo ari intambwe iganisha ku ntsinzi bityo ko ntawe bikwiye gutera impungenge.

Yagize ati “Ubonye imibare izamuka y’abapimwe abantu ntibakwiye kwikanga. Niba ejo twabonye abantu 9 uyu munsi dushobora kubona abandi cyangwa se ejobundi tukabona 10 barenga. Iyo mibare ntikwiye gukura abantu umutima. Icyagakuye abantu umutima ni ukuba ntawe tubona kandi tuzi ko hari uguhura kwabayeho”

“ Twebwe iyo tumubonye biradushimisha ahubwo kuko iyo virus ivuye mu baturage yari gukwirakwira. Iyo imibare ibonetse ari myinshi mu gihe gito ni ukuvuga ngo ikibazo twakivanye aho cyari kiri, ejo n’ejo bundi ubuzima burakomeza nta virus ihari.”

Imibare ya Minisiteri y’ubuzima igaragaza ko mu bamaze kwandura coronavirus abagera hafi kuri 90% bayanduriye mu mahanga, ariko nanone bamwe muri bo bakaba barayisanganywe nyuma yo kwinjira mu gihugu bagahura n’abantu batandukanye, bivuze ko hari abandi bishoboka ko banduje.

Abanyarwanda basabwa gukomeza gukurikiza amabwiriza yo kwirinda Coronavirus bahora basobanurirwa buri munsi ariko muri rusange azingiye ku kuguma mu rugo no gukaraba intoki kenshi.

Kuba hakomeje kuboneka abanduye coronavirus, inzego z'ubuzima zigaragaza ko ari bumwe mu buryo bwo gutsinda icyo cyorezo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .