Inyigo yerekanye ko urubyiruko runywa urumogi rwiyongerera ibyago byo kurwara umutima

Yanditswe na Evariste Nsengimana
Kuya 15 Ugushyingo 2019 saa 12:11
Yasuwe :
0 0

Inyigo nshya yakozwe n’ishyirahamwe ry’abahanga muri Siyansi bavura indwara z’umutima bo muri Leta Zunze Ubumwe za Amerika, yagaragaje ko urubyiruko runywa rukanakoresha urumogi rwiyongerera ibyago byo kurwara indwara z’umutima.

Iri shyirahamwe riheruka kandi kwerekana ko kunywa no gukoresha urumogi bishobora gutera indwara y’udutsi dukwirakwiza amaraso mu bwonko ku buryo duturika bitewe n’umubyimba watwo utabasha kwakira ingano y’amaraso acamo bigatuma yivanga n’ubwonko cyangwa tukaziba bitewe no kuvura kwayo, hanyuma bigatera kuba adatemberamo uko bikwiye igice cyatwo atageramo kikangirika (stroke).

Aba bahanga bakoze iyi nyigo bagaragaza ko urubyiruko rukoresha cyane urumogi rwakoreweho ubushakashatsi bwagaragaje ko hagati ya 47% na 52% bagira ibyago biri hejuru byo kuba bajyanwa mu bitaro bafite ikibazo cy’umutima udatera neza [arrhythmia].

Iyi ni indwara ituma umutima utera buhoro cyangwa cyane, ishobora no gutuma umuntu apfa cyangwa akarwara Stroke.

Imibare y’abantu bivuza muri icyo gihugu cyakorewemo ubushakashatsi igaragaza ko 2.6% bashyirwa mu bitaro kubera ikibazo cyo guhumeka nabi, akenshi baterwa no gukoresha urumogi. Usanga kandi ngo biba ku bari hagati y’imyaka 15 na 24, biganjemo abahungu b’abirabura.

Iyi nyigo yanagaragaje ko urubyiruko ruri muri icyo kigero rukoresha urumogi rufite ibyago byo kujyanwa mu bitaro rufite ikibazo cy’umutima rwikumbye inshuro 1.28 mu gihe abafite imyaka 25-34 bo bikubye 1.52.

Umuganga w’indwara zo mu mutwe mu bitaro bya Griffin Memorial, Dr. Rikinkumar S. Patel, avuga ko “ingaruka zo gukoresha urumogi zigaragara mu minota 15, zikamara hafi amasaha atatu. Iyo umuntu yanyoye rucye, rutera rumutera gutera vuba k’umutima yanywa rucye ugatera buhoro.”

Abashakashatsi bagaragaje ko urubyiruko rukoresha urumogi iminsi irenga 10 mu gihe cy’ukwezi kandi rukabikora nibura ku mpuzandengo y’inshuro 2.5, bibongerera ibyago byo kurwara ‘Stroke’ ugereranyije na bagenzi babo batanywa ibiyobyabwenge.

Ibi byago ngo byiyongera cyane no ku bantu banywa n’itabi risanzwe n’irikozwe mu buryo bw’ikoranabuhanga. Ibyago byo kurwara ‘Stroke’ byikuba nibura inshuro eshatu ugereranyije n’urubyiruko rutarinywa.

Ubu bushakashatsi babukoreye ku bantu bakuze ibihumbi 43 hagati ya 2016 na 2017, bafite aho bahuriye n’ikoreshwa ry’urumogi, bari hagati y’imyaka 18 na 44, muri bo 14% bavugaga ko bakorukoreshaga mbere y’iminsi 30 babazwa.

Inyigo yerekanye ko urubyiruko runywa urumogi cyane rwiyongerera ibyago byo kurwara umutima

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza