00:00:00 IGIHE NETWORK KN KINYARWANDA EN ENGLISH FR FRANCAIS

Hakuweho urujijo ku bibwira ko umwana utewe inda imburagihe izajya ikurwamo ku gahato

Yanditswe na Prudence Kwizera
Kuya 22 Nzeri 2021 saa 04:59
Yasuwe :
0 0

Nyuma y’uko hashyizweho itegeko rijyanye no gukuramo inda, bamwe mu babyeyi bagaragaje impungenge batewe n’uko umwana watewe inda ashobora gutegekwa kuyikuramo ku gahato bikamugiraho ingaruka.

Ubusanzwe mu Rwanda gukuramo inda ni icyaha gihanwa n’amategeko kuko ingingo ya 123 n’iya 124 y’igitabo cy’ibyaha n’ibihano yerekana ko ukuyemo inda akabihamywa n’urukiko ahanwa.

Icyakora ingingo ya 125 itanga irengayobora ikagaragaza ibice bitanu aho nta buryozwacyaha bubaho iyo umuntu yakuyemo inda bikorewe kwa muganga wemewe.

Harimo kuba uwatewe inda ari umwana utaruzuza imyaka 18, kuba umugore yaratewe inda afashwe ku ngufu, umugore yarashyingiwe ku ngufu atabishaka, kuba utwite yaratewe inda n’uwo bafitanye isano ku gisanira kitarenze icya kabiri n’igihe byemejwe n’abaganga ko inda atwite ishobora kumutera ibibazo cyangwa ikabitera umwana.

Bamwe mu babyeyi bo mu Karere ka Kamonyi babwiye IGIHE ko bacyumva iryo tegeko batarisobanukiwe neza, bagira impungenge ko umwana wese utewe inda azajya ayikurirwamo ku gahato.

Mbonabucya Anne Marie afite umwana watewe inda afite imyaka 16 y’amavuko. Ku bwe asanga gukuriramo umwana inda bikwiye kwitonderwa.

Ati “Ni ibintu byo kwitonderwa kuko umwana ushobora kujya kumukurizamo inda bikarangira ahasize ubuzima. Njyewe ntabwo mbyemera kuko hari ubwo bayikuramo ugasanga bose urababuze [umwana na nyina] cyangwa ugasanga wa mwana utwite bimusigiye igikomere ko yishe umuntu akazajya ahorana ihungabana.”

Uyu mubyeyi akomeza avuga ko igikwiye gushyirwamo ingufu ari ugukumira gutwita imburagihe kw’abangavu kuruta kubabwira ko igihe batewe inda bazazikurirwamo.

Undi mubyeyi witwa Niyoyita Dancille na we avuga ko kubwira abangavu ko utewe inda imburagihe azajya ayikurirwamo bimuteye impungenge.

Ati “Hari abakobwa bashobora kubyumva nabi bikabashora mu busambanyi ngo nibaziterwa bazajya bajya kwa muganga bazikuremo. Njyewe numva dukwiye gukomeza kurera abana bacu neza tukababwira ko gusambana ari bibi bakabyirinda.”

Akomeza avuga ko abasobanura icyo itegeko rivuga ku gukuramo inda bakwiye no gusobanura ko kuyikuramo bishobora kugira ingaruka, bityo abantu bakwiye kwirinda cyane.

Ati “Nonese twese ntituzi ko kwirinda biruta kwivuza? Abana bacu tubarinde gusambanywa kuruta kubabwira ko utwise bamukuriramo inda.”

Ababyeyi baganiriye na IGIHE kuri iyi ngingo basabye ko hakomeza gushyirwa ingufu mu gushakisha no guhana abagabo n’abasore basambanya abangavu kugira ngo bacike kuri iyo ngeso.

Ikindi basaba ni ugukomeza gutoza abangavu umuco wo kudahishira ababasambanya.

Gasamagera Reverien ati “Abagabo basambanya abana bacu bajya bahanwa kugeza igihe bazabicikiraho kuko birakabije. Umukobwa wanjye bamuteye inda afite imyaka 17 bimugiraho ingaruka kuko yaranahahamutse.”

Hari n’abagaragaje ko imyemerere yabo itatuma bashyigikira abana babo ngo bakurirwemo inda kuko ari icyaha ku Mana.

Ababyeyi batanze ibitekerezo ku cyo itegeko riteganya ku gukuramo inda

Mukankubana Veneranda ati “Umwana yaba yarakoze icyaha cyo gusambana maze nkakora ikosa ryo kumushyigikira ngo akore n’icyo gukuramo inda, ntabwo nabikora. Nareka akabyara maze Imana ikazadufasha kumurera.”

Mporanyi Théobald, impuguke mu bijyanye n’ubuzima akaba n’Umujyanama mu Kigo giharanira uburenganzira no guteza imbere Ubuzima (HDI) asobanura ko gukurirwamo inda ku babyemerewe bidakorwa ku gahato ahubwo ari amahitamo y’uwayitewe.

Ati “Ntabwo itegeko rivuga ko bikorwa ku gahato ahubwo uwumva afite icyo kibazo ni we itegeko ritabara, tukababwira ko aho kugira ngo bajyane abana mu bavuzi ba magendu bajye kubangiza, nibabajyane kwa muganga ubyemerewe abafashe.”

Iyi mpuguke isobanura ko iryo tegeko ryashyizweho nyuma y’uko bigaragaye ko abangavu benshi bagiye baterwa inda bakajya kuzikuzamo mu buryo bwa magendu, bakangirika nyababyeyi abandi bagakuramo ubumuga cyangwa bakahasiga ubuzima.

Hari kandi abagiye bafungwa bitewe n’uko bahamwe n’icyaha cyo gukuramo inda mu buryo bwa magendu.

Mporanyi yavuze ko gukuramo inda ku babyemerewe bikorerwa ku bitaro bikuru, ibitaro by’akarere cyangwa ibyigenga byemewe na Leta cyangwa ivuriro ryemewe kandi bigakorwa na muganga wemewe. Iyo nda kandi igomba kuba itarengeje amezi atanu.

Yasobanuye ko ushaka iyo serivisi iyo ageze kwa muganga adasabwa ibyangombwa bihamwohereza cyangwa icyemezo cy’urukiko cyangwa icy’Urwego rw’ubugenzacyaha.

Yavuze ko iyo umwana utaruzuza imyaka 18 ahohotewe agaterwa inda akifuza kuyikurirwamo ariko ababyeyi be batabyemera, icyo gihe hashyirwa mu bikorwa icyifuzo cy’umwana.

Hakuweho urujijo ku batewe impungenge n’uko umwana utewe inda imburagihe izajya ikurwamo ku gahato
Hasobanuwe ko gukurirwamo inda ku babyemerewe bidakorwa ku gahato ahubwo ari amahitamo y’uwayitewe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .