Hakozwe inyigo yitezweho guca burundu imibu itera indwara

Yanditswe na Mukaneza M.Ange
Kuya 27 Nzeri 2018 saa 12:24
Yasuwe :
0 0

Abahanga mu by’ubumenyi bo mu Bwongereza, bakomeje ubushakashatsi bugamije kureba uko baca burundu ubwoko bwose bw’imibu ishobora gutera indwara zirimo Malaria.

Ibi aba bashakashatsi bo muri Imperial College London bari kubikora bifashishije ikoranabuhanga ryiswe CRISPR-Cas9 rihindura uturemangingo tw’umubu bikawubuza kororoka.

Andrea Crisanti wayoboye ubu bushakashatsi bwatangajwe ku wa Mbere mu kinyamakuru Nature Biotechnology, yavuze ko iri koranabuhanga rifasha guhindura utunyangingo tw’imibu y’ingore n’ingabo.

Yakomeje avuga ko uretse kuba ubu buryo bise Doublesex bwaratumye imibu by’umwihariko y’ingore yakoreweho ubushakashatsi itororoka, bwanagize uruhare mu gutuma igice ikoresha iruma ndetse igakurura amaraso y’abantu kidakura.

Nubwo ubu buryo busa n’ubwatanze icyizere cyo kuba imibu idashobora guhangana nabwo ngo ikomeze yororoke, hari bamwe mu bahanga bavuze ko hakwiye gutekerezwa n’ingaruka byagira ku bidukikije igihe bwaba bukwirakwijwe.

Catherine Hill wigisha muri Purdue University yagize ati “Turajwe ishinga no kurinda ubuzima bw’abantu ariko nanone tugomba gutekereza ku kurinda ibidukikije.”

Yakomeje agaragaza ko nubwo imibu itera indwara, inafite akamaro aho hari inyamaswa zitungwa nayo zirimo nk’ubwoko bw’amafi yitwa ‘mosquito fish’.

Nubwo Bob Peterson wigisha muri Montana State University asanga bidashoboka ko mu bwoko busaga 3000 bw’imibu iri ku Isi wahitamo iyo uca burundu, Conor McMeniman we asanga ikoranabuhanga ryose ryahangana n’iki kibazo rikwiye kwakirizwa yombi.

McMeniman ukora mu kigo gikora ubushakashatsi kuri Malaria cya Johns Hopkins avuga ko by’umwihariko igihe iri koranabuhanga ryaba rizarandura imibu igaragara muri Afurika ari naho haba malariya nyinshi, hakwiye gukorwa igeragezwa ariko mu bwitonzi, n’abaturage bakabigiramo uruhare.

Ishami ry’Umuryango w’Abibumbye rigaragaza ko mu 2016 abantu basaga miliyoni 216 bagaragayeho malaria, ibihumbi 445 biganjemo abana bari munsi y’imyaka itanu bagahitanwa nayo.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza