Gushyingura abantu ari bazima, kimwe mu byaranze ibihe by’ubuvuzi bwo hambere

Yanditswe na Iradukunda Serge
Kuya 17 Nzeri 2019 saa 05:48
Yasuwe :
0 0

Kimwe mu bibazo byaranze ibihe by’ubuvuzi budateye imbere bwo hambere ni uguhamba abantu ari bazima, kuko byari bigoye gutandukanye ko umuntu yapfuye burundu no kuba ari mu bindi bihe bisa n’urupfu nka koma.

Nubwo bivugwa ko nta rupfu rwiza rubaho, abahanga bavuga ko gushyingurwa uri muzima birenze ukwemera ndetse akaba ari rumwe mu mpfu mbi.

Kubera uku kugira impungege zo kuba umuntu ugiye gushyingurwa ashobora kuba atapfuye neza, mu kinyejana cya 18 batangiye kujya bakora ibibaza umubiri birimo guca imoko z’ibere no gucengeza icyuma gishyushye mu kibuno ibi byose bigakorerwa ku mubiri w’uwo bikekwa ko yapfuye kugira ngo koko bemeze ko atakiri muzima.

Ubu buryo bwakomejwe kwifashishwa kugeza mu 1846 ubwo hatangiraga gukoreshwa icyuma kizwi nka ‘Stethoscope’ gishyirwa mu gatuza kugira ngo abaganga bumve ko umutima utera.

Imwe mu nkuru mpamo y’uwashyinguwe ari muzima ni iya Angelo Hays, umwana w’umuhungu ukomoka mu Bufaransa. Mu 1937 ubwo yari afite imyaka 19, yakoze impanuka ikomeye ya moto yangirika umutwe kugeza ku rwego bangiye n’umuryango we ko umubona, nyuma y’iminsi 3 byatangajwe ko yapfuye aranashyingurwa.

Kubera ipererezwa ryagombaga gukorwa na sosiyete y’ubwishingizi, byabaye ngombwa ko umubiri wa Hays utabururwa nyuma y’iminsi 2 batungurwa no gusanga ugishyushye, kubera ko igihe yakoraga impanuka atahise apfa ahubwo yagiye muri koma.

Nyuma yo gutabururwa yahawe ubuvuzi ndetse aranakira neza, ndetse nyuma yaho ahanga n’isanduku yari ifite uburyo bwo kuba uwayihambwemo yatabaza igihe yaba ari muzima kugira ngo ibyamubayeho bitazaba no ku bandi.

Uretse Hays wagize amahirwe yo kuba yasangwa akiri mu zima, ku Isi hagiye hamenyekana ingero z’abandi bantu benshi bagiye bashyingurwa nyuma byaba ngombwa ko ba bataburura bagasanga ku masanduku yabo hariho ibimenyetso by’inzara bagiye basiga ubwo birwanagaho bashaka gusohoka.

Mu 1891 Octavia Smith yarashyinguwe, nyuma yo kumara igihe kinini arembye abenshi bagacyeka ko byaba byatewe n’agahinda kuko yari amaze amezi make apfushije umuhungu we, hashize igihe aza no kujya muri koma bihutira kumushyingura bazi ko yapfuye.

Nyuma y’iminsi mike Octavia ashyinguwe iki cyorezo cyo kujya muri koma cyatangiye no gufata abandi muri aka gace ariko nyuma y’iminsi mike bakaba bazima.

Byatumye James,umugabo wa Octavia yihutira kujya gucukura ngo arebe niba umugore we atari muzima, kubw’amahirwe macye yasanze yarapfuye ariko hari aho yashwaruye isanduku ndetse afite n’amaraso mu nzara kubera gukomereka agerageza gusohoka.

Ibi byabaye kuri Hays na Octavia byerekana ko bigishoboka ko hirya no hino ku Isi hari abantu bashobora kuba bashyingurwa bakiri bazima cyane cyane muri Afurika mu bice by’icyaro aho serivisi z’ubuzima zitaratera imbere ndetse bakaba bagifata n’umwanzuro wo gushyingura umuntu batabanje ku mujyana kwa muganga.

Ibyabaye kuri Hays na Octavia byerekana ko bigishoboka ko hirya no hino ku Isi hari abantu bashobora kuba bashyingurwa bakiri bazima cyane cyane muri Afurika mu bice by’icyaro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza