Gisagara: Abagabo 60 bamaze kwifungisha urubyaro burundu

Yanditswe na Prudence Kwizera
Kuya 9 Mutarama 2019 saa 11:59
Yasuwe :
0 0

Inzego z’ubuzima mu Karere ka Gisagara, zivuga ko abagabo batarumva neza gahunda yo kuboneza urubyaro kuko imibare y’abamaze kubyitabira ikiri hasi cyane.

Imibare yo muri ako karere yerekana ko abagabo 60 gusa ari bo bamaze kuyoboka uburyo bwo kwifungisha burundu (Vasectomie) bagamije kuboneza urubyaro.

Bamwe mu bagabo bavuga ko badashobora kwifungisha burundu kubera impamvu zitandukanye zirimo gutinya ko babanirwa kongera gukora imibonano mpuzabitsina no gusuzugurwa n’abagore babo.

Ati “Ubwo koko bagufunga burundu bakaguca imiyoboro yose ukongera kubasha gutera akabariro ute? Njyewe ntabwo nakwifungisha rwose.”

Undi ati “Tuzajya tubyara abo dushoboye kurera ariko kwifungisha burundu byo ntabyo nakora, ubwo se byatuma umugore yongera kunyubaha?”

Abagabo batandukanye twaganiriye bahuriza ku cyifuzo cy’uko hashakwa ubundi buryo babonezamo urubyaro butari ukubafunga burundu.

Umukozi ushinzwe ubuzima mu Karere ka Gisagara, Uwingabire Jean Bosco, avuga ko harikiri ikibazo cy’imyumvire ku bagabo bamwe na bamwe ariko bakomeje kubigisha.

Ati “Haracyari ikibazo cy’imyumvire ntabwo babyitabira, ubu abagabo 60 bonyine nibo bamaze kubyumva kandi nabo babitangiye mu mezi 12 ashize.”

Uwingabire akomeza avuga ko kuri ubu bahisemo kujya bifashisha abagabo bitabiriye kuboneza urubyaro mu kwigisha abandi kuko usanga hari benshi bumva ko iyo umugabo yifungishije burundu bimutera ibibazo.

Abagore bangana na 68% baboneje urubyaro

Uwingabire avuga ko abagore bitabira kuboneza urubyaro ku bwinshi kuko kuri ubu imibare igaragaza ko abagera kuri 68% baboneje mu mwaka wa 2018.

Avuga ko icyifuzo ari ukugera ku 100% ariko hakiri imbogamizi y’imyumvire no kuba Kiliziya Gatolika, yarabibujije mu mavuriro yayo yiganje muri ako karere.

Ati “Imbogamizi ni imyumvire n’ibihuha bivugwa ko uwaboneje urubyaro ahura n’ibibazo; ikindi ni imyizerere ya bamwe bumva ko bagomba kubyara bakuzuza isi. Kiliziya ifite ibigo nderabuzima umunani n’ibitaro bimwe.”

Kugeza ubu uburyo buhari bwo kuboneza urubyaro ku bagabo ni ukwifata, gukoresha agakingirizo cyangwa kwifungisha burundu.

Ubu buryo bwo kwigungisha burundu bwatangiye gukoreshwa mu Rwanda mu 2010.
Umugabo wifungishije burundu akomeza gutera akabariro (gukora imibonano mpuzabisina) nkuko bisanzwe, igihinduka ni uko atabasha kongera gutera inda.

Uburyo abagore bakunze gukoresha baboneza urubyaro burimo urushinge, ibinini n’udupira two mu kaboko ndetse n’uburyo kamarere bwo kwifata mu gihe cy’uburumbuke.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza