00:00:00 IGIHE NETWORK KN KINYARWANDA EN ENGLISH FR FRANCAIS

Bugesera: Hatashywe icyumba cy’umukobwa kigezweho cyatwaye asaga miliyoni 30 Frw

Yanditswe na Igizeneza Jean Désiré
Kuya 15 Ugushyingo 2022 saa 08:16
Yasuwe :

Ishuri ribanza rya Ngeruka riherereye mu Murenge wa Ngeruka mu Karere ka Bugesera ryashyikirijwe icyumba cy’umukobwa kigezweho, kizafasha abana b’abakobwa kwita ku isuku mu gihe bari mu mihango.

Ni icyumba cyubatswe n’Umuryango ugizwe n’urubyiruko, Our Past Initiative ku bufatanye na Banki ya Kigali nk’umuterankunga mukuru ndetse na Sosiyete icuruza ibikomoka kuri Peteroli, Rubis.

Iki cyumba cyashyizwemo ibikoresho byose umukobwa akenera mu gihe ari imugongo, birimo impapuro z’isuku ndetse n’ibitanda bibiri abana bashobora kwifashisha mu gihe baba bumva batameze neza.

Mu muhango wo gutanga iki cyumba wabaye kuri uyu wa Gatandatu tariki ya 12 Ugushyingo 2022, Umuyobozi mukuru wa Our Past Initiative, Intwari Christian yavuze ko ibikoresho byo kucyubaka ndetse n’ibindi bizakigendaho mu gihe cy’umwaka bizarangira byose hamwe bitwaye miliyoni 30Frw.

Yasobanuye ko impamvu imirimo yo kucyitaho izakomeza ari uko bashaka kucyongerera ubushobozi kikazajya cyakira abagera kuri 600 cyane ko ubu gifite ubushobozi bwo kwakira abana 238 n’abarimu 15.

Ati “Kucyongerera ubushobozi mvuga ni uburyo serivisi zitangwamo, ibikoresho bikenerwa buri munsi ndetse no gushyiraho umukozi uzajya acyitaho, akazajya ahembwa natwe mu gihe cy’amezi atandatu.”

Yavuze ko uyu Muryango ahagarariye uzakomeza kwita kuri iki cyumba mu gihe hagira igikenerwa, yemeza ko bashaka no gutangiza umushinga wazatuma icyo cyumba gikomeza gukora no mu gihe baba badahari.

Umuyobozi w’Ishuri ribanza rya Ngeruka, Uwamukiza Théophile yavuze ko iki cyumba kizabafasha gukemura ibibazo byose byatumaga amasomo y’umwana w’umukobwa atagenda neza dore ko mu gihe yajyaga mu mihango yagombaga guhita ataha mu rugo iwabo.

Ati "Urumva harimo ubwogero, ubwiherero, aho ashobora kuryama mu gihe yumva atameze neza mu gihe ubundi twarambikaga matola hasi byakomeza umwana agataha iwabo. Ubu umwana w’umukobwa tugiye kumubaza imitsindire, ntabwo azongera kutubwira ko yatsinzwe.”

Dushimimana Malayika wiga mu mwaka wa gatandatu akaba anahagarariye abanyeshuri bagenzi be kuri iri shuri, yavuze ko yashimishijwe n’uko iki cyumba cyubatswe ku buryo bugezweho bitandukanye n’icyo bakoreshaga mbere cyari gishaje.

Ati “Imihango yazaga ugahita ujya kureba mwarimu, ukamubwira ikibazo ufite, akakujyana muri cya kindi gishaje, akaguha ibikoresho ugahita utaha. Ntabwo twari twisanzuye kuko twitinyaga bijyanye n’uko hari ubwo n’abandi bana bazaga kuduhengereza, ariko ubu birakemutse.”

Umuyobozi w’Akarere ka Bugesera wungirije ushinzwe imibereho myiza y’abaturage, Imanishimwe Yvette, yatangaje ko gahunda yo kubaka icyumba cy’umukobwa basanzwe bayifite mu mihigo.

Imanishimwe yasabye abanyeshuri ndetse n’abarezi kwita kuri iki gikorwa remezo, kugira ngo gihorane isuku ku buryo buhoraho, yizeza ko na bo nk’akarere bazafasha mu buryo bushoboka bwose kugira ngo kizagumane ibikoresho.

Kugeza ubu Umuryango Our Past Initiative ufite abanyamuryango 442 mu Rwanda ndetse n’abandi bagera kuri 300 babarizwa mu bihugu bya Amerika, Canada, u Bushinwa, Malaysia, ukaba ufite intego ko mu kwezi gutaha bazaba bafite n’abandi mu Bufaransa n’u Budage.

Ni Umuryango ufasha mu kwigisha urubyiruko amateka mabi yaranze u Rwanda hibutswa ababyeyi kuganiriza abana babo ibyaranze Igihugu mu bihe byashize, hubakwa ameza ndetse no gukoresha imbaraga z’urubyiruko mu guteza imbere imibereho myiza y’umuryango Nyarwanda.

Ni icyumba kirimo ibikoresho bigezweho ku buryo nta pfunwe abana b'abakobwa bazongera kugira mu gihe baba bari mu mihango
Ni icyumba cyubatswe mu buryo bugezweho bufasha umukobwa kumva yisanzuye
Hashyizwemo ibitanda abana bazajya baryamaho mu gihe ari ngombwa
Iki cyumba cy'umukobwa cyubatswe ku ishuri ribanza rya Ngeruka mu Karere ka Bugesera
Ibikoresho byose by'isuku biri muri iki cyumba
Abayobozi batandukanye bitabiriye umuhango wo kugitaha
Ibumoso ni Intwari Christian, hagati ni Hirwa Yvan wa Banki ya Kigali ndetse na Umugwaneza Josette wari uhagarariye Rubis
Icyumba cy'umukobwa cyashyikirijwe ishuri ribanza rya Ngeruka cyubatswe ku bufatanye na Banki ya Kigali na Rubis
Dushimimana Malayika yavuze ko ubu noneho bagiye kwiga bashyizeho umwete cyane ko bimwe mu bibazo byababangamiraga byakemuwe
Hirwa Yvan wari uhagarariye Banki ya Kigali muri uyu muhango, yavuze ko uretse gutanga serivisi zijyanye n'amafaranga, Iyi Banki igira uruhare rukomeye mu iterambere ry'imibereho myiza y'abaturage
Umuyobozi w'Akarere ka Bugesera wungirije ushinzwe imibereho myiza y'abaturage, Imanishimwe Yvette yasabye Dushimimana Malayika na bagenzi be kwita ku cyumba bubakiwe kikazajya gihorana isuku
Umuyobozi w'Ishuri ribanza rya Ngeruka Uwamukiza Theophile yavuze ko ubu noneho bagiye kubaza abana umusaruro kuko zimwe mu nzitizi zakuweho
Umuyobozi wa Our Past Initiative, Intwari Christian yavuze ko bari gushaka uburyo batangiza umushinga uzafasha iki cyumba gukomeza gukora n'ubwo baba badahari

Amafoto: Shumbusho Djasiri


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .