00:00:00 IGIHE NETWORK KN KINYARWANDA EN ENGLISH FR FRANCAIS

Barimo uwamaze imyaka 17 atavuga: Ubuhamya bw’Abanyarwanda bavuwe n’inzobere babasha kuvuga

Yanditswe na Prudence Kwizera
Kuya 24 Nzeri 2022 saa 08:05
Yasuwe :

Kuri iyi Si nzima ubuvuzi bukomeje gutera imbere ku buryo hagenda hagaragara inzobere zivura indwara zari zarananiranye, abazirwaye barihebye. Ibi byakwemezwa neza na Muroriwabo Claudine wamaze imyaka 17 atabasha kuvuga, ikibazo yagize afite imyaka itanu y’amavuko abana nacyo kugeza ku myaka 22.

Inzobere mu buvuzi zisobanura ko kugira ngo umuntu agire ikibazo cy’ubumuga cyangwa uburwayi bwo kutavuga ashobora kuba yarakivukanye cyangwa agahura n’uburwayi bukomeye butuma aremba akajya muri ‘koma’ aho azanzamukiye akIsanga atavuga cyangwa akabiterwa n’impanuka.

Muroriwabo Claudine wo mu Murenge wa Rusatira mu Karere ka Huye, yagize ikibazo cy’uburwayi mu myaka y’ubuhumekero ubwo yari afite imyaka itanu y’amavuko bimuviramo kutabasha kuvuga.

Ati “Byatangiye mfite imyaka itanu kubera uburwayi none ubu mfite imyaka 22, urumva ko namaze imyaka 17 ntabasha kuvuga ariko narumvaga”.

Yaravujwe biranga bamubwira ko atazakira bigera n’aho ajyanwa mu Butaliyani amarayo umwaka wose avurwa ariko biba iby’ubusa.

Mu buhamya bwe avuga ko abaganga bari baramushyize agahombo mu ijosi ahumekeramo kubera uburwayi yagize. Iyo yashakaga kuvugisha abantu bari kumwe yakoreshaga amarenga.

Iyo yabaga ari kumwe n’abandi bana cyangwa ari mu ishuri yababazwaga n’uko yashakaga kugira icyo avuga bikanga.

Ati “Nko gusubiza mwarimu mu ishuri abandi barasubizaga naho njyewe nigunze. Abana bakanyita amazina mabi nkababara ariko nkabyakira.”

Yagize amahirwe asanga ku Bitaro bya Kaminuza bya Butare, CHUB, haje abaganga b’inzobere mu kubaga no kuvura indwara zifata imyanya y’ubuhumekero, baturutse mu gihugu cy’u Bwongereza baje gufatanya n’Abanyarwanda maze bamuha ubuvuzi.

Ati “Bakimara kumbaga nakangutse numva ijwi rije ndishima numva ntabwo bisanzwe. Ntabwo nababaraga kandi n’ubu ntabwo ndi kubabara. Bakimara kumbaga ijambo rya mbere navuze naravuze ngo ‘Imana ishimwe’ kuko numvaga ari yo inkoreye ibitangaza.”

Undi wahawe iyi serivise ni Kanyumba Liberée wo mu Murenge wa Tumba mu Karere ka Huye, yagize ikibazo atwite, umutsi wo mu mutwe uraturika bimuviramo guta ubwenge no kwibagirwa ibintu byose ku buryo atibukaga n’izina rye.

Bamushyize agahombo mu muhogo kugira ngo ajye abasha guhumekeramo amara imyaka itanu atabasha kuvuga.
Yatumweho n’Ibitaro bya CHUB abwirwa ko hari abaganga bo mu Bwongereza bazaza kuhatanga serivise bityo na we ari mu bashyizwe ku rutonde bazabagwa.

Akimara kubyumva yarapfukamye asenga Imana ayisaba kumukiza.

Ati “Mbere yo kuva mu rugo naragiye mfukama mu bwogero mbwira Imana nti ‘Mana nzi ko ushobora byose, ngiye kwa muganga ariko niringiye imbaraga zawe, ishuri unyujijemo rirahagije mbabarira unkuremo kano kantu [agahombo mu muhogo] unsubizemo umwuka ubwo bushobozi kandi urabufite nanjye nzagushimira.”

Bamaze kumubaga bukeye bwabo yumva ijwi rirasohotse n’umwuka ubasha guca mu mazuru birakunda.

Ati “Barambajije ngo witwa nde, mpita mvuga izina ryanjye, barongera ngo umugabo wawe yitwa nde, mpita mvuga izina rye maze nkomeza kuvuga kugeza n’ubu ndumva nta kibazo.”

Hatatsimpundu Immaculée w’imyaka 32 y’amavuko wo mu Karere ka Huye na we yamaze imyaka ibiri atabasha kuvuga kubera ko yamaze ukwezi n’igice muri ‘koma’ nyuma yo kubyara abazwe umwana we akitaba Imana, na we akava cyane.

Yarakangutse asanga bamushyize agahombo mu muhogo ko guhumekeramo kuko guhumeka bisanzwe bitakundaga.

Na we yavuzwe n’abo baganga nyuma yo kumubaga none asigaye avuga.

Ati “Naraje barambaga nkangutse numva ijwi riraje ntangira kuvuga. Ijambo rya mbere naravuze ngo ‘Imana ihabwe icyubahiro’ kubera ko numvaga ko ari imirimo yayo ari yo yatuzaniye abo baganga.”

Hatatsimpundu Immaculée yamaze imyaka ibiri atavuga ariko asigaye avuga kuko yavuwe agakira
Muroriwabo Claudine yamaze imyaka 17 atabasha kuvuga ariko yaravuwe arakira

Ni akazi katoroshye

Umuganga w’inzobere mu kuvura indwara zo mu muhogo, mu mazuru no mu matwi kuri CHUB, Dr Nshimiyimana Jean Claude, yasobanuye ko umuntu ashobora kugira ikibazo cyo kutabasha kuvuga bitewe no kumara igihe kirekire arwaye ari indembe ari muri koma.

Ikindi yavuze gishobora kubitera ni igihe umuntu yakoze impanuka hakagira imitsi yo mu muhogo icika.

Ati “Iyo umuntu ageze mu ndembe bamuha umwuka kuko imashini niyo imufasha guhumeka, bamuha agahombo ahumekeramo kakamanuka kakagera mu bihaha. Ako rero niko gatuma icyo kibazo [cyo kutabasha kuvuga] kiba.”

Yavuze ko abaganga b’inzobere bo mu Bwongereza babafashije byinshi kandi babigiyeho amasomo.

Ati “Twabigiyeho byinshi kuko ubu buvuzi ntabwo tubufite hano mu Rwanda; ni ukuvuga ngo nta nzobere dufite muri byo. N’ahandi babikora birahenze cyane, nk’i Nairobi muri Kenya ni miliyoni umunani z’amanyarwanda. Ariko hano baraje ni nk’Imana yabazanye babaga abaturage bishyura bakoresheje mituweli nk’ibihumbi bitandatu gusa.”

Akomeza agira ati “Ikindi ni ubwo bumenyi bwabo kuko twabaganye nabo icyumweru cyose, twabigiyeho ubwo bumenyi.”

Dr Nshimiyimana yavuze ko n’ibikoresho bakoresheje babibasigiye ku buryo nabo bashobora kwakira umuntu uje kwivuza bakamuha iyo serivise.

Yavuze ko ikibazo kikiri mu Rwanda ari uko nta nzobere mu kuvura izo ndwara zihari kandi nta n’ibikoresho bihari.

Umuganga wo mu Bwongereza akaba n’inzobere mu kubaga, Dr Yamowa, yavuze ko mu Rwanda n’ahandi muri Afurika ubuvuzi buri gutera imbere ariko bakwiye gushyira imbaraga mu gushaka inzobere zivura indwara zitandukanye kandi bagashaka n’ibikoresho bigezweho.

Umuganga wo mu Bwongereza akaba n’inzobere mu kubaga, Dr Yamowa, yavuze ko mu Rwanda hakenewe abaganga b'inzobere n'ibikoresho bigezweho
Umuganga w’inzobere mu kuvura indwara zo mu muhogo, mu mazuru no mu matwi kuri CHUB, Dr Nshimiyimana Jean Claude yashimye umusanzu w'aba baganga baturutse mu Bwongereza

Uko izo nzobere zaje mu Rwanda

Kugira ngo abaganga b’inzobere bavura indwara zikomeye bagere mu Rwanda, bazanywe n’umuryango witwa Rwanda Legacy of Hope washinzwe n’Abanyarwanda baba mu Bwongereza no mu bindi bihugu hamwe n’inshuti z’u Rwanda.

Pasiteri Osée Ntavuka, uhagarariye uwo muryango yavuze ko batangiye gushaka abaganga b’inzobere mu 2012 kugira ngo batange umusanzu mu kuvura indwara zikomeye mu Rwanda.

Yavuze ko bavura indwara zirimo izo mu muhogo, mu mazuru no mu matwi; ibibyimba byo mu bwonko; kubaga amagufa; abavura kanseri y’ibere n’izindi.

Ati “Muri raporo dufite y’imyaka 10 dufite abantu 9575 tumaze kubaga bari bafite uburwayi butandukanye.”

Usibye kuvura, batanga n’umusanzu wabo mu kwigisha abaganga b’Abanyarwanda aho kugeza ubu bamaze guhugura abagera kuri 80.

Bagitangira mu 2012 bazanye abaganga b’inzobere babiri ariko kuri ubu bamaze kuba 160.

Mu kubaga bakoresha uburyo bugezweho aho bifashisha imashini bitabaye ngombwa ko baca umuntu igisebe ngo bamudode.

Ntavuka yavuze ko bamaze kubaga abantu 9575 bari bafite uburwayi butandukanye mu Rwanda
Kubaga ni akazi gakomeye gakorwa n'abaganga b'inzobere
Abaganga b'inzobere bo mu Bwongereza bafatanya n'abo muri CHUB kubaga umuntu urwaye indwara mu muhogo ituma atavuga

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .