00:00:00 IGIHE NETWORK KN KINYARWANDA EN ENGLISH FR FRANCAIS

Amashimwe y’abivuriza ku bitaro bya Gatunda bahawe na Perezida Kagame mu 2017

Yanditswe na Hakizimana Jean Paul
Kuya 31 May 2022 saa 07:41
Yasuwe :

Akanyamuneza ni kose ku baturage bo mu mirenge itandatu yo mu Karere ka Nyagatare bakoraga urugendo rurerure bajya kwivuriza ku bitaro bya Nyagatare biri kure cyane, aho byanaviragamo bamwe kurembera mu rugo.

Mu 2017 ubwo Perezida Kagame yiyamamarizaga muri aka Karere abaturage bamugejejeho ikibazo cy’ibitaro byari iyanga kuko hari abari batuye ahantu kure byabasabaga gukora urugendo rurerure bajya kwivuriza ku bitaro bikuru bya Nyagatare.

Mu 2018 hahise hatangira kubakwa ibitaro bya Gatunda kugira ngo bijye byivurizamo abaturage bagorwaga n’urugendo rurerure. Ibi bitaro byuzuye bitwaye arenga miliyari 5 Frw, byatangiye kuvura tariki 4 Nyakanga 2020 ubwo byafungurwaga na Perezida Kagame.

Ni ibitaro bifite ibitanda 89 bikaba byakira abarwayi bose kuko bafite serivisi zose nk’ububyaza, iz’amenyo, amaso, gusiramura ndetse no kuvura indwara zose z’abantu bakuru n’abana.

Ibi bitaro byakira abaturage bo mu mirenge itandatu irimo Katabagemu, Mimuri, Rukomo, Gatunda, Mukama na Karama muri iyi mirenge hakaba harimo ibigo nderabuzima umunani, bitanga serivisi ku baturage ibihumbi 205 bayiturukamo.

Ibitaro bya Gatunda byabaruhuye ingendo ndende

Rutagengwa Eugène utuye mu Mudugudu wa Butimba mu Kagari ka Nyarurema mu Murenge wa Gatunda, avuga ko ibi bitaro byabaruhuye ku gutanga amafaranga y’umurengera bajya kwivuriza i Nyagatare.

Ati “Kugira ngo ubone moto ikugezayo byari ikibazo kuko nibura moto ni 3000 Frw, urumva rero kugira ngo umuturage ayabone byari ikibazo, aho ibi bitaro biziye rero byabaye igisubizo kuko nta murwayi ukirembera mu rugo, nanjye ubwanjye nagiyeyo bampa serivisi nziza.”

Rutagengwa yavuze ko mbere bagifite ikigo nderabuzima abenshi bagwaga mu nzira bari kujya kwivuza Nyagatare, hari ngo nabagwaga mu ngo zabo ariko ngo kuri ubu byaracitse burundu.

Mukandamage Epiphanie uturuka mu Kagari ka Cyagaju we yagize ati “ Uzi gutega moto ya 3000 Frw bwaba bwije bakaguca 4000 Frw cyangwa 5000 Frw ukajyayo ukaremberayo abavandimwe ntibagusure kubera amatike, aho ibi bitaro rero byuzuriye ubu twarishimye cyane kuko baratuvura bakanatwitaho cyane.”

Barashimira Perezida Kagame ko imvugo ye ariyo ngiro

Nsanzumuhire Damascène waturutse mu Murenge wa Karama mu Kagari ka Kabuga, we yashimiye Leta ku kumva ibyifuzo byabo ikabubakira ibitaro byiza kandi hafi yabo.

Ati “ Serivisi baziduhera ku gihe rwose turashima Leta, ubu mfata igare nkanyonga iminota mike nkaba ngeze hano nkivuza, ndashimira umubyeyi wacu Kagame ko yumvise ubusabe bwacu.”

Murekatete Joselyne utuye mu Kagari ka Kabeza mu Murenge wa Gatunda we yavuze ko nk’ababyeyi batwite byagoranaga gukora urugendo rurerure bagiye kubyara, ariko ngo ibi ibintu bimeze neza.

Ati “ Nk’umuntu yafatwaga n’inda yagera hano Gatunda bakakohereza Nyagatare ku bitaro bikuru, kugira ngo uzagereyo byatwaraga nk’amasaha abiri rimwe na rimwe akagerayo yagize ikindi kibazo cyangwa akabyara ananiwe umwana ntavuke ameze neza.”

Yakomeje ashimira Perezida Kagame ko imvugo ye ariyo ngiro ubu ngo barivuriza ahantu heza kandi hafi.

Umuyobozi w’ibitaro bya Gatunda, Dr Ngabonziza Issa avuga ko aho ibi bitaro biziye umubare w’abaturage bivuza wiyongereye cyane ugereranyije n’abajyaga kwivuza ku bigo nderabuzima, yavuze ko ubu basigaye bafite icyizere ko ku kigo nderabuzima nibabohereza ku bitaro batari bukore urugendo rurerure nka mbere.

Ati “ Ubu urembye wese turavugana tukaba twanajya kumufata mu rugo cyangwa akajya kwivuriza ku kigo nderabuzima byakwanga tukamusangayo tukamuzana hano akavurwa agataha.”

Umuyobozi w’Akarere ka Nyagatare, Gasana Stephen avuga ibitaro bya Gatunda koko byaruhuye abaturage bakoraga urugendo rerure banarwaye, icya kabiri avuga ko byafashije ibitaro bya Nyagatare byajyaga byakira abaturage benshi bigatuma serivisi zitinda abaturage bakabyinubira.

Ati " Aho biriya bitaro bibonekeye byatumye ibitaro bya Nyagatare bivaho igitutu cyo kwakira abantu benshi byatumaga serivisi mbi zahatangirwaga zivaho burundu.”

Akarere ka Nyagatare gafite ubuso bungana ba kilometero kare 1741 , kagizwe n’ imirenge 14 irimo abaturage barenga ibihumbi 650, nibura kuri ubu ibitaro bya Gatunda bikaba bisigaye byakira abaturage ibihumbi 205 batuye bo mu mirenge itandatu.

Ibitaro bya Gatunda byuzuye bitwaye miliyari zirenga 5Frw
Ibi bitaro biherutse guhabwa imbangukiragutabara nshya ikaba iya kane bitunze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .