Akarere ka Nyanza karabura amavuriro abiri ngo kese umuhigo wagenewe kutarenze 2024

Yanditswe na Evariste Nsengimana
Kuya 31 Ukuboza 2018 saa 10:51
Yasuwe :
0 0

Ubuyobozi bw’Akarere ka Nyanza butangaza ko bumaze kunguka amavuriro 31 yo ku rwego rw’akagari, yuzuye atwaye hafi miliyoni 350Frw mu gihe umuhigo w’igihugu wo kubaka amavuriro 150 bitarenze 2024, gasabwa kubaka 33.

Mu bikorwa Guverinoma yiyemeje muri gahunda y’imyaka irindwi (2017-2024), mu rwego rw’ubuzima harimo kubaka no gusana ibitaro (bigera ku munani), guha ibigo nderabuzima Imirenge 17 itabigiraga no kubakira Poste de Santé 150 buri kagari kakagira iyako.

Mu kiganiro na IGIHE, Umuyobozi w’Akarere ka Nyanza, Ntazinda Erasme, yavuze ko uretse utugari tubiri dusigaye muri 33 tudafite amavuriro, utundi twose twubakiwe Poste de Santé.

Ati “Kugeza ubu dusigaje utugari tubiri ariko natwo dufite gahunda yo kubirangiza 2019. Ni poste de santé ebyiri dusigaje mu karere kose.”

Ntazinda yavuze ko izimaze kubakwa ari 31, zirimo 17 zubatswe kuva Guverinoma itangaje gahunda y’ibikorwa byayo by’imyaka irindwi muri Nzeri 2017.

Buri Kagari k’Akarere ka Nyanza katarabona Poste de santé, umuturage wakoraga urugendo rurerure agiye kwivuza, yagendaga amasaha nibura atatu ariko kuri ubu ntarenza iminota 30.

Ayo amvuriro azafasha abaturage kwivuriza hafi bifashishije mitiweri, kongera umubare w’ababoneza urubyaro, kugabanya umubare w’abana n’ababyeyi bapfa mu gihe cyo kubyara n’ibindi bikubiye muri gahunda ya guverinoma y’imyaka irindwi.

Ntazinda yasobanuye ko ayo mavuriro yubatswe bigizwemo uruhare runini n’imbaraga z’abaturage binyuze mu miganda n’inkunga bishatsemo.

Ati “Ni ubufatanye bw’abaturage n’abafatanyabikorwa bacu n’uburyo twabegereye ngo tubashe kubumvisha ko byihutirwa.”

Abo bafatanyabikorwa barimo Minisiteri y’Ubuzima n’umuryango Society for Family Health (SFH).

Akarere ka Nyanza kagizwe n’Utugari 51 n’Imirenge 10, kuri ubu gafite ibigo nderabuzima 16, Poste de santé 31 ibitaro by’Akarere n’ibyita ku bafite ubumuga bya Gatagara. Gahunda yo kubaka ivuriro muri buri kagari iteganya ko ryubakwa mu katarimo Ikigo Nderabuzima.

Urutonde rugaragaza uko uturere twesheje imihigo ya 2017/18, Nyanza yari iya nyuma muri 30 tugize igihugu.

Imwe muri Poste de Santé zubatswe mu Karere ka Nyanza
Umuyobozi w'Akarere ka Nyanza, Ntazinda Erasme, yabwiye IGIHE ko basigaje utugari tubiri tudafite Poste de Santé

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza