Abavura indwara z’imitsi n’imyakura ni mbarwa mu Rwanda

Yanditswe na Prudence Kwizera
Kuya 2 Ukwakira 2019 saa 11:02
Yasuwe :
0 0

Inzobere mu kuvura indwara z’imitsi n’imyakura mu Rwanda ziracyari mbarwa nyamara abaturage bazirwara ari benshi nk’uko byagarutsweho na bamwe mu bafite ubuvuzi mu nshingano.

Iki kibazo cyatumye hashyirwaho gahunda yo kongerera ubumenyi bamwe mu batanga serivise z’ubuvuzi bw’ibanze mu bitaro bitandukanye mu gihugu kugira ngo bajye babasha gusuzuma izi ndwara no kuzivura hakiri kare.

Bamwe mu nzobere mu kuvura izo ndwara bari mu Karere ka Huye aho bazamara icyumweru bongera ubumenyi bamwe mu baganga b’Abanyarwanda n’abanyamahanga bakorera mu Rwanda kugira ngo bajye babasha kuvura abarwayi babagana.

Aya mahugurwa ni igikorwa ngarukamwaka gikorerwa mu bihugu byo mu Karere k’Afurika y’Iburasirazuba, mu Rwanda cyatangiye kuri uyu mbere tariki ya 30 Nzeri 2019, aho ihuriro ry’Abaganga bo mu gihugu cy’u Bwongereza na Uganda barimo guhugura Abanyarwanda 20 bakorera mu bitaro n’amavuriro atandukanye mu gihe cy’iminsi itanu.

Umwe mu batanga amahugurwa akaba n’umuganga mu bitaro bikuru bya Kigali CHUK, Dr. Nshimiyimana François Xavier, yavuze ko mu Rwanda hagaragara abantu benshi barwara indwara z’imyakura n’imitsi ariko abazivura bakiri bake ari yo mpamvu bari gushaka uko umubare wabo wakwiyongera.

Yagize ati “Umubare wacu abavura indwara z’imitsi n’imyakura uracyari muto; kugeza ubu ab’abanyarwanda turi batatu ku baturage barenze Miliyoni 12; kandi Umuryango Mpuzamahanga wita ku buzima uvuga ko nibura umubare wemewe ari umuganga umwe w’urwo rwego ku baturage ibihumbi 100.”

Dr. Nshimiyimana avuga ko ku bufatanye bw’ibitaro, Leta n’abafatanyabikorwa bagerageza gutanga amasomo ku bandi Banyarwanda kugira ngo bajye babafasha kuvura izo ndwara kuko zikunze kwibasira abaturage benshi.

Zimwe mu ndwara yagarutseho zikunze kwibasira abanyarwanda ni iyangirika ry’imyakura y’ubwonko (Stroke), igicuri, umutwe udakira, n’izindi.

Izo ndwara ngo usanga bamwe mu baganga batazifiteho ubumenyi bazitiranya no kurwara umutwe bisanzwe nyamara zikaze kandi zishobora guhitana umuntu mu gihe gito cyangwa zikamusigira ubumuga.

Bamwe mu baganga bari guhugurwa bavuze ko basanzwe bakira abarwayi benshi bafite ibimenyetso by’izo ndwara ariko bakabyitirannya no kurwara umutwe bisanzwe.

Dr. Nyampinga Dyna ati “Hari igihe mbona umurwayi yambwira ibimenyetso by’uko ari kubabara nkumva ari umutwe usanzwe cyangwa nkasanga ntabyumva bikaba ngombwa ko mpamagara umuganga nzi ubizobereyemo akangira inama y’icyo nakora.”

Akomeza avuga ko amahugurwa arimo guhabwa ayitezeho kunguka ubumenyi buzamufasha mu mwuga we akajya yita ku barwayi bamugana akabavura.

Ayo mahugurwa y’iminsi itanu yatewe inkunga na East African Development Bank (EADB) agashyirwa mu bikorwa na British Council hamwe na Royal College of Physicians.

Biteganyijwe ko mu gihe cy’imyaka ine iyo gahunda izamara hazahugurwa abaganga bagera kuri 600 mu bihugu byo mu Muryango wa Afurika y’Iburasirazuba. Kugeza ubu hamaze guhugurwa 50.

Aabanyarwanda batatu nibo nzobere mu kuvura indwara z'imitsi n'imyakura

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza