00:00:00 IGIHE NETWORK KN KINYARWANDA EN ENGLISH FR FRANCAIS

Abasaga miliyari ku Isi bafite uburwayi bwo mu mutwe: U Rwanda ruhagaze he?

Yanditswe na Muhire Desire
Kuya 7 Ugushyingo 2022 saa 10:40
Yasuwe :

Imibare y’ishami ry’Umuryango w’Abibumbye ryita ku Buzima (OMS), igaragaza ko ku Isi yose hari abantu barenga miliyoni bafite uburwayi bwo mu mutwe, kikaba ari ikibazo gikomeye cyane kuko ubuzima bwo mu mutwe ari ishingiro ry’ubuzima rusange.

Buri mwaka Isi yose yizihiza umunsi wahariwe ubuzima bwo mu mutwe. Ni umunsi wizihijwe kuwa 27 Ukwakira 2022, mu nsanganyamatsiko igira iti “Duharanire kubaho neza twita ku buzima bwo mu mutwe bwa buri wese”.

Imibare y’ibitaro bivura indwara zo mu mutwe bya Caraes Ndera, yerekana ko mu mwaka ushize 2021/2022, bakiriye abarwayi 96.357, bakaba bariyongereyeho 29,6% ni ukuvuga 21,993 ugereranyije n’umwaka wabanje [2020/2021].

Ni imibare iteye ubwoba ariko igihangayikishije cyane ni uko hejuru ya 70 ku ijana ari urubyiruko kandi ibibazo rufite ari ibituruka ku biyobyabwenge n’inzoga. Abari hagati y’imyaka 20-39 bangana na 42%, abarengeje imyaka 40 ni 38% naho abari munsi y’imyaka 19 ni 20%.

Inzobere mu buzima bwo mu mutwe, Dr. Augustin Gatera avuga ko ku ruhande rw’u Rwanda rwakoze akazi gakomeye ku rwego rw’Isi mu guhangana n’ikibazo cy’uburwayi bwo mu mutwe binyuze mu bajyanama b’ubuzima.

Dr Gatera avuga ko nta buzima bwo mu mutwe umuntu ataba afite ubuzima, agasaba u Rwanda gukomeza gushyiramo imbaraga rwegereza gahunda z’ubuvuzi abaturage ndetse rukongera no kwigisha abanyarwanda uko bakwita ku barwayi bo mu mutwe.

Yagize ati” OMS irashimira u Rwanda kuri gahunda zitandukanye rwashyizeho zo kwita ku barwayi bo mu mutwe, mu gihugu hose hari abajyanama b’ubuzima babihuguriwe bafasha abarwayi, hari abaganga nubwo umubare ukiri hasi. Buri wese arasabwa kwita ku barwayi bo mu mutwe kuko ufite uburwayi bwo mu mutwe nta buzima aba afite”

Imibare yerekana ko 14% by’abarwayi bo mu mutwe ari urubyiruko, ibi bikaba biterwa nuko ari rwo rwishora mu biyobyabwenge, uburara n’uburaya ndetse n’ubujura, bimwe mu byagagaragajwe nk’ibiza ku isonga mu bitera indwara zo mu mutwe.

Bimwe mu bibazo abafite uburwayi bwo mu mutwe bahura na byo ni uguhabwa akato n’imiryango yabo ndetse n’abaturanyi, aho usanga aho kuvuzwa ku bitaro byabugenewe bajyanwa mu bapfumu no mu bavuzi gakondo bikekwa ko barozwe.

Iki kibazo cy’ihezwa ni cyo Minisiteri y’ubuzima ivuga ko yahagurukiye aho buri kwezi kw’Ukwakira hakorwa ubukangurambaga bwo gusobanurira abanyarwanda ko uburwayi bwo mu mutwe ari uburwayi nk’ubundi, ko ugaragaweho ibimenyetso agomba kwitabwaho nk’undi murwayi wese.

Dr. Kayitashonga Yvonne uyobora ishami ryo kurwanya indwara zo mu mutwe mu kigo cy’Igihugu cy’ubuzima RBC, avuga ko nta muntu n’umwe utaba umukandida w’ubu burwayi, bityo ko buri wese yagafashe iya mbere no mu kuburwanya.

Yagize ati”Umurwayi wo mu mutwe, ni njyewe, ni wowe, umuntu wese wagize ikimuhungabanya ashobora kugira ikibazo cyo mu mutwe, ariko iyo ubanye na cyo ntugire uguhumuriza, ntugire ugutega amatwi, ntugire ukujyana kwa muganga cyangwa no ku mujyanama, uratinda ukaba umurwayi”.

Yakomeje avuga ko akato n’ihezwa rikorerwa umuntu wese wagize ikibazo cyo mu mutwe ari byo bituma umuntu agira ipfunwe ryo kuba yagana serivisi z’ubuvuzi kandi zihari.

Umwe mu bigeze kugira iki kibazo cyo mu mutwe bimuviramo no kujyanwa mu kigo ngororamuco cya Iwawa, Niyonkuru Jean Claude avuga ko bijya gutangira yabitewe no kwishora mu biyobyabwenge, agasaba urubyiruko kubyirinda.

Mu buhamya yatanze yagize ati “ Icyo nasaba urubyiruko bagenzi banjye ni ukwirinda ibiyobyabwenge kuko ni byo byatumye ngira ikibazo cyo mu mutwe ngera aho kujyanwa Iwawa, gusa ndashimira Leta yacu ko yashyizeho gahunda nyinshi zifasha abafite uburwayi bwo mu mutwe, ubu nabashije kuvurwa ndakira, nkora akazi ko gufotora kandi karantunze njye n’umuryango wanjye.”

Jacqueline Nyirahabimana ukorera mu bitaro by’indwara zo mu mutwe CARAES Ndera, mu ishami ry’ubuvuzi bwifashisha imirimo (Occupational therapy) avuga ko umurwayi wo mu mutwe iyo yitaweho ku gihe, avurwa agakira, agakora agatanga umusaruro nk’abandi baturage.

Uyu muganga asobanura ko bavuga ko umuntu yagize uburwayi bwo mu mutwe mu gihe hari impinduka zabaye mu mitekerereze, imikorere ndetse n’imyitwarire, umuntu agatangira kwitwara bitandukanye n’uko sosiyete ibigena.

Hari uburwayi bwo mu mutwe bweruye harimo nko kwiruka, kutikorera isuku , guterana amabuye, hakabaho uburwayi bwo mu mutwe bw’agahinda gakabije nko kwanga kurya ndetse hakabaho n’uburwayi bwo mu mutwe bw’amarangamutima ashobora kujya hejuru cyane cyangwa hasi umuntu akagira ibyishimo bidasanzwe, gusengerera uwo abonye wese.

U Rwanda ruvuga ko ruzakomeza gushyira imbaraga mu kwegereza serivisi z’ubuvuzi bwo mu mutwe abaturage ndetse no kongera ubukangurambaga kugira ngo abanyarwanda basobanukirwe neza ubu burwayi, ikibazo cy’akato bahabwa kibe amateka.

Miss Nishimwe Naomie n'abandi bafatanyije mu gukangurira abantu kwita ku buzima bwo mu mutwe
Bamwe mu bafatanyabikorwa mu kwita ku ndwara zo mu mutwe bagaragaza ibyo bakora
Dr Kayiteshonga avuga ko kwita ku bafite ibibazo byo mu mutwe ari inshingano ya buri wese

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .