00:00:00 IGIHE NETWORK KN KINYARWANDA EN ENGLISH FR FRANCAIS

Abarenga ibihumbi 93 barwaye Malaria mu mezi atanu ashize: Ibyiciro byibasiwe

Yanditswe na Prudence Kwizera
Kuya 14 June 2022 saa 09:15
Yasuwe :

Indwara ya Malaria ni imwe mu zigeze guhangayikisha Abanyarwanda bikomeye kuko imibare yerekana ko abagannye amavuriro bagiye kuyivuza mu myaka yashize ari benshi kuko nko mu 2017 bageze hafi kuri miliyoni eshanu.

Ibyo biri mu byatumye Leta y’u Rwanda ifata ingamba zikomeye mu kuyihashya, zirimo guha abaturage inzitiramibu no kubashishikariza kuyiraramo, gutera umuti wica imibu mu nzu, kwica imibu bayisanze mu ndiri yayo, gukura ibihuru n’ibidendezi hafi y’ingo n’izindi zitandukanye.

Imibare y’Ikigo cy’Igihugu cy’Ubuzima, RBC, igaragaza ko izo ngamba zagiye zitanga umusaruro kuko abarwaye Malaria mu 2017 bavuye kuri 4.812.883 bagera kuri 3.609.323 mu 2019.

Nyuma y’umwaka umwe mu 2020 baragabanutse bagera ku 1.866.421 bisobanuye ko bagabanutseho 48% naho mu 2021 bagabanukaho 38% bagera ku 1.152.439.

Abarwaye Malaria y’igikatu na bo baragabanutse kuko mu 2017 abayirwaye ni 11.303 naho mu 2018 bagera ku 8293, mu 2019 bakomeje kugabanuka baba 6249.

Mu 2020 abayirwaye ni 3423 naho mu 2021 babaye 1915 mu gihe muri aya mezi atanu ya 2022 ashize abamaze kuyirwara ari 162.

Abahitanywa na Malaria na bo bakomeje kugabanuka kuko mu 2017 yishe abantu 394, mu 2018 ihitana 336 naho mu 2019 yica 218. Mu 2020 yishe 142, mu 2021 yica 69 naho muri aya mezi atanu ashize ya 2022 yishe abantu barindwi.

Umukozi wa RBC mu Ishami ryo kurwanya Malaria, Habanabakize Epaphrodite, yavuze ko n’ubwo Malaria igenda igabanuka hakiri abantu 93.999 bayirwaye mu mezi atanu ya 2022 kandi muri bo abagera kuri barindwi yabahitanye.

Ati “Impfu z’abicwa na Malaria zaragabanutse ariko n’iyo hapfa umuntu umwe ntiwavuga ko yakagombye gupfa. Abo yahitanye mu myaka ine baragabanutse mu myaka nk’ine ishize ariko dushaka ko icika burundu mu gihugu.”

  Ibyiciro byibasiwe

Habanabakize yavuze ko n’ubwo umubare w’abarwara Malaria mu Rwanda wagabanutse, hakiri ibyiciro by’abagifite ibyago byo kuyandura kandi bikwiye kwitabwaho by’umwihariko.

Ibyo byiciro birimo abakora akazi ka nijoro, impunzi, abanyeshuri bacumbika mu bigo by’amashuri, imfungwa n’abagororwa, abarobyi, abahinzi n’abandi.

Ibyo ni byo byatumye ku wa 13 Kamena 2022, RBC ku bufatanye n’Urugaga rw’Imiryango Nyarwanda itari iya Leta ishinzwe kurwanya Icyorezo cya Sida, guteza imbere ubuzima no guharanira uburenganzira bwa Muntu mu Rwanda, bitangiza umushinga w’imyaka ibiri wo kwita by’umwihariko kuri ibyo byiciro. Icyo gikorwa cyabereye mu Karere ka Nyanza mu Ntara y’Amajyepfo.

Umunyamabanga Nshingwabikorwa w’urwo rugaga, Kabanyana Noriette, yavuze ko bazegera ibyo byiciro bakabifasha kurwanya Malaria.

Ati “Tuzagenda tubageraho byihariye kuko ubushakashatsi bwagaragaje ko ibyo byiciro bikeneye kwitabwaho kuko usanga batirinda Malaria. Nk’abantu bakora akazi ka nijoro usanga barumwa n’imibu, abanyeshuri bamwe baba mu bigo cyangwa abagororwa ugasanga batita ku kurara mu nzitiramubu, impunzi ugasanga na zo zifite ikibazo nk’icyo.”

“Tumenyereye ko abantu barara mu nzitiramubu kandi babaterera imiti yica imibu mu nzu, ariko dushaka gufasha na ba bandi batarara mu nzu n’abakorera akazi kabo ahantu nko mu mirima n’ibirombe haba imibu. Tubafashe kwirinda kurumwa nayo.”

Mu ishyirwa mu bikorwa ry’uwo mushinga bazafatanya n’Umuryango ASOFERWA (Association de Solidarité des Femmes Rwandaises) ariko wo uzita ku byiciro bigoye kugerwaho birimo abakora uburaya, abacuruzi bambukiranya imipaka, abanyonzi n’inzererezi.

Umuyobozi wa gahunda muri uwo muryango, Ndagijimana Bernard, yavuze ko abo bantu bagoye kuboneka no kwigishwa kandi bari mu bafite ibyago byinshi byo kwandura malaria.

Ati “Icyo tuzakora cy’ingenzi ni ukumenya abari muri ayo matsinda aho baherereye, tukamenya imibare yabo twarangiza tukabahuriza hamwe tugashyiraho n’ababahagariye ngo tubashe kubigisha.”

Mu byo bazigishwa harimo uko bakwirinda kurumwa n’imibu nijoro bari ku kazi kuko bashobora gukoresha amavuta abarinda, imyenda bashobora kwambara n’ubundi buryo butandukanye.

Imibare igaragaza ko mu 2021, Intara y’Amajyepfo ari yo yagize umubare munini w’abantu barwaye Malaria kuko barenga ibihumbi 481, igakurikirwa n’Uburasirazuba bwagize abasaga ibihumbi 296 naho Uburengerazuba bwagize abarenga ibihumbi 199, Umujyi wa Kigali bagera hafi ku bihumbi 88 naho Amajyaruguru agira abarenga ibihumbi 48.

Umunyamabanga Nshingwabikorwa w’urwo rugaga, Kabanyana Noriette, yavuze ko bazegera ibyo byiciro bakabifasha kurwanya Malaria igacika burundu
Umuyobozi wa gahunda muri ASOFERWA, Ndagijimana Bernard, yavuze ko hari abantu bagoye kuboneka no kwigishwa kandi bari mu bafite ibyago byinshi byo kwandura Malaria
Umukozi wa RBC mu Ishami ryo kurwanya Malaria, Habanabakize Epaphrodite, yavuze ko nubwo Malaria igenda igabanuka hakiri abantu 93.999 bayirwaye mu mezi atanu ya 2022
Mu gutangiza uwo mushinga hatanzwe ibitekerezo bigamije ubufatanye mu kurwanya Malaria
Basabwe ubufatanye mu kurandura Malaria mu Rwanda
Abitabiriye itangizwa ry'uwo mushinga bavuze ko bawitezeho kurandura Malaria mu Rwanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .