00:00:00 IGIHE NETWORK KN KINYARWANDA EN ENGLISH FR FRANCAIS

Abarenga ibihumbi 500 baravuwe: U Bushinwa bwahize kwagura ubufatanye n’u Rwanda mu by’ubuvuzi

Yanditswe na Igizeneza Jean Désiré
Kuya 28 Ukuboza 2022 saa 08:14
Yasuwe :

Kuva mu 1982 amatsinda atandukanye y’abaganga bo mu Bushinwa atangiye koherezwa mu Rwanda, abarenga ibihumbi 500 bamaze guhabwa ubufasha mu by’ubuvuzi, ibikorwa byiyongera ku bikorwaremezo n’ibikoresho byifashishwa mu buzima iki gihugu kimaze guha u Rwanda.

Uruhare rw’u Bushinwa mu iterambere ry’urwego rw’ubuvuzi mu Rwanda rwagarutsweho kuri uyu wa Gatatu tariki ya 28 Ukuboza 2022 mu muhango wo gusezera ku itsinda ry’abaganga rya 22 risoje imirimo yaryo.

Muri iki gihe cy’imyaka 40, inzobere mu buvuzi zigera kuri 270 ni zo zimaze kuza mu Rwanda, aho zafashije mu kuvura indwara zitandukanye nk’ikimenyetso cy’ubucuti bw’ibihugu byombi butajegajega.

Itsinda rya 22 ryafashije mu mirimo itandukanye, harimo kubaga abarwayi bari bafite indwara zinyuranye, ryanagize uruhare runini mu guhangana na Covid-19 yari yarayogoje Isi kuva mu mpera za 2019.

Muri iki gihe hanasangiwe ubumenyi n’abaganga b’Abanyarwanda, hatangwa inkunga y’ibikoresho byifashishwa mu buzima ku Bitaro bya Kibungo n’ibya Masaka.

Iri tsinda ryanasuye Ikigo nderabuzima cya Gahanga ndetse n’Urwunge rw’Amashuri rwa Mburabuturo ritanga serivisi z’ubuzima ku barwayi n’abanyeshuri muri ibyo bigo.

Ambasaderi w’u Bushinwa mu Rwanda, Wang Xuekun yashimiye iri tsinda ry’abaganga k’ubwitange n’ubushishozi bagaragaje mu gihe bari mu Rwanda, by’umwihariko ku bufasha batanze ku bitaro bya Masaka n’ibya Kibungo basanzwe bakoreramo.

Ati "Muri iki gihe cy’imyaka 40 hanafashijwe abarokotse Jenoside yakorewe abatutsi mu 1994. Izi ntumwa zakoze ibikomeye mu kubaka umubano uhamye hagamijwe kugira umuryango ufite ubuzima buzira umuze."

Uretse kuvura abarwayi, u Bushimwa bwafashije mu kubaka ibitaro bya Masaka n’ibya Kibungo nk’impano igaragaza ubucuti bw’ibihugu byombi yagombaga guteza imbere urwego rw’ubuzima mu Rwanda.

Amb Wang Xuekun ati "U Rwanda n’u Bushinwa biri kunoza umushinga wo kwagura ibitaro bya Masaka, ibizatuma biba ibitaro binini muri Afurika, u Bushinwa buteye inkunga mu buryo bw’amafaranga."

Itsinda rya 22 ryari rigizwe n’abaganga 11 barimo umuforomo, usemura hamwe n’ababatekera babiri. Ni inzobere mu mashami atandukanye y’ubuvuzi harimo ajyanye n’imitsi, ubuvuzi gakondo, ubuvuzi bw’amenyo, abahanga mu gutera ikinya n’ibindi.

Kugeza ubu abazabasimbura bamaze kugera mu gihugu, Amb Wang Xuekun akavuga ko na bo babitezeho umusaruro ufatika kuko "tugomba gufatanya mu gukomeza umubano w’ibihugu byombi binyuze mu buzima."

Mu gihe cy’umwaka iri tsina rimaze mu Rwanda ritanga serivisi z’ubuzima ryavuye abarwayi bagera ku 12291 barimo ababazwe ku buryo bworoheje n’ubukomeye ibihumbi 12.

Uwari uhagarariye iri tsinda, Peng Jikui yavuze ko igihe cy’umwaka bamaze mu Rwanda cyaranzwe n’ubwitange haba kuri bo ndetse na bagenzi babo basanze mu gihugu ku buryo abarwayi bahuye na bo babafashije ku buryo bushoboka.

Ati “Abanyarwanda baba abarwayi na bagenzi bacu twakoranye baratwizeye dufatanya gutabara ubuzima bw’abantu. Hari abo twavuraga nyuma y’amezi runaka bakaza kudushimira batumwira ko bameze neza. Hari uwaje ambwira ko namufashe nk’umuvandimwe we. Ni ibintu byanshimishije cyane.”

Yemeje ko bizeye itsinda rigiye kubasimbura, ndetse “turabasaba kuzasumbyaho ubundi umubano ukomeze gushinga imizi.”

Yagaragaje ko haramutse hongerewe ibitaro bakoreramo byaba byiza kuko byafasha abandi barwayi bakeneye kubagwa na bo bakaba bagira amahirwe yo gufashwa mu gukira uburwayi bafite.

Ati “Twakoranye n’Ibitaro bya Kaminuza bya Kigali, CHUK nk’ibyumweru bibiri, ndatekereza ko bikomeje bikarenga icyo gihe hari benshi babona amahirwe yo kubagwa bagakira uburwayi bafite.”

Umunyamabanga uhoraho muri Minisiteri y’Ubuzima, Zachee Iyakaremye, yavuze ko ubu bufatanye ari ingenzi cyane ko bufasha mu kuvura abarwayi ariko bukanafasha abaganga kunguka ubumenyi bw’uko bakwita ku ndwara zitandukanye.

Yagaragaje ko umushinga wo kwagura Ibitaro bya Masaka uzatuma hiyongera umubare w’ibitaro bya Kaminuza, bikazafasha mu kongera umubare w’abarwayi ndetse na serivisi zahatangirwaga, ibitashobokaga kubera ikibazo cy’ibikoresho bitari bihari.

Ati “Ni gikorwaremezo kizaba gikomeye ku rwego rw’akarere cyane ko biriya bitaro bizaba bifite ibitanda birenga 800. Ibikorwa by’ibanze byo gutegura ivugururwa ryabyo riri gukorwa ndetse mu gihe gito bizatangira kuvugururwa ku buryo bweruye.”

U Bushinwa ni umufatanyabikorwa ukomeye w’u Rwanda mu bijyanye n’ubucuruzi, umutekano, uburezi, ibikorwa remezo, ubuzima n’ibindi. Uretse ubufatanye mu guhererekanya abaganga iki gihugu cyanateye inkunga ijyanye no guhangana na Covid-19 mu buryo butandukaye.

Nko mu ntangiriro z’uyu mwaka Ambasade y’u Bushinwa yatangaje ko umwaka uzarangira iki gihugu gihaye u Rwanda dose miliyoni enye z’inkingo zizifashishwa mu gukingira abaturage icyorezo cya COVID-19 hirya no hino mu gihugu.

Muri Gashyantare uyu mwaka u Bushinwa bwahaye Guverinoma y’u Rwanda inkunga ya miliyoni 60 z’Amadolari (akabakaba miliyari 59 Frw), inarukuriraho umwenda wa miliyari 5,9 Frw ku ideni rwari rubufitiye.

Umunyamabanga uhoraho muri Minisiteri y'Ubuzima, Zachee Iyakaremye asuhuza itsinda ry'abaganga b’Abashinwa bamaze umwaka mu Rwanda mu bikorwa byo kuvura abarwayi
Abaganga boherejwe n'u Bushinwa bazobereye mu kwita ku ndwara zitandukanye zirimo izo mu nda, amenyo n'izindi
Itsinda ry'abaganga baturutse mu Bushinwa bari bagizwe n'abaganga 11 umusemuzi, umuforomo n'abatetsi babiri
Itsinda ry'abaganga ryaturutse mu Bushinwa ryanatanze serivisi z'ubuzima mu Kigo nderabuzima cya Gahanga ndetse no mu Rwunge rw'Amashuri rwa Mburabuturo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .