Abarangije amasomo y’ubuhanga mu by’imiti ntiboroherwa no kwinjira ku isoko ry’umurimo

Yanditswe na Evariste Nsengimana
Kuya 9 Gicurasi 2019 saa 08:08
Yasuwe :
0 0

Bamwe mu banyeshuri barangije kwiga muri kaminuza amasomo y’ubuhanga mu by’imiti [Pharmacist], bavuga ko bahura n’inzitizi zibabuza gupiganwa ku isoko ry’umurimo ngo babyaze umusaruro ibyo bize banagire uruhare mu guteza imbere igihugu.

Intandaro y’izo nzitizi bavuga ko ari uburyo bugoranye bwo kwinjira mu rugaga rw’abahanga mu by’imiti rubagenga nk’abanyamwuga, aho ngo bakora ibizamini bagatsindwa ari benshi atari uko ari abaswa.

IGIHE iheruka kuganira n’abarangije muri iryo shami batanu barimo babiri barangije muri Kaminuza y’u Rwanda, babiri barangije muri Kaminuza ya Mount Kenya n’umwe warangije mu Bushinwa bavuga ko badasobanukiwe n’impamvu bagorwa kwemererwa kujya mu rugaga.

Aba banyarwanda bifuje ko amazina yabo agirwa ibanga, bavuga ko iryo shami baryiga imyaka itanu n’itatu bimenyereza umwuga muri farumasi zitandukanye n’ahandi, babirangiza Kaminuza ikabaha ikizamini kibategura kwinjira mu mwuga, bagahabwa impamyabumenyi.

Umwe yagize ati “Iyo barangije bahura n’imbogamizi bashyirwaho n’urugaga kandi abahanga mu by’imiti bakenewe mu gihugu mu gihe urubyiruko rukomeje kuba mu bushomeri.”

Ayo mananiza arimo ikizamini kibemerera kujya mu rugaga rw’abanyamwuga, bavuga ko kidaha amahirwe abakirangiza bifuza kwinjira mu isoko ry’umurimo.

Umwe yagize ati “Ikibigaragaza nuko abize mu gihugu cyangwa hanze bibaza niba ibigikubiyemo bijyanye n’isoko ry’umurimo. Abarangije icyiciro cya kabiri n’icya gatatu bose bahurira kuri icyo kizamini kandi kikabatsinda.”

Iki kizamini gikorwa mu byiciro bibiri, aho ubazwa ahera ku cyanditse asabwa kubonamo amanota 70% amwemerera gukora icyo kuvuga [Interview].

Bisobanuye ko utayabonye mu cyanditse, utakora igikurikira kandi kugira ngo wemererwe ugomba kubonamo hose guhera kuri 70% kuzamura.

Urutonde rw’amanota y’abakoze ikizamini cyo cyanditse kibemerera kwinjira mu rugaga rwo ku wa 20 Nyakanga 2018 IGIHE yabashije kubona rugaragaza ko abakoze 43 bose batsinzwe [Fail] aho uwagize menshi afite 64%, abafite nibura 50% kuzamura ni 19.

Urw’abakoze ku wa 28 Ugushingo 2018 rugaragaza ko muri 85 bakoze, hatsinzemo 37 naho urwo ku wa 19 Gashyantare 2019 rugaragaza ko muri 59 bakoze ikizamini habashije gutsinda 28.

Ngo kugira ngo ukore ikizamini wishyura ibihumbi 30Frw, watsindwa kongera kugikora ukongera wishyura andi gutyo gutyo. Icyo nacyo bagifata nk’imbogamizi n’uburyo urugaga rwashyizeho bwo gusarura amafaranga mu bakirangiza.

Bibaza impamvu bakora bagatsindwara benshi kandi bamwe mu bayobora urugaga rwabo ari n’abarimu babigisha kandi barangije babahaye impamyabumenyi z’uko bashoboye.

Bavuga kandi ko bagira igihe cyo kwimenyereza umwuga bikarangira bavuga ko bashoboye, bati ‘Ese icyo kizamini kiba ari icy’iki? Siyo ya mananiza’.

Bifuza ko urugaga rwajya rukurikirana ukwimenyereza umwuga kwabo, rukamenya ubushobozi bafite aho guhurira nabo mu kizamini.

Bavuga ko urugaga rubatesha agaciro ruvuga ko badashoboye n’imyaka yose baba bamaze biga mu gihe Leta iha amahugurwa y’igihe gito, abantu batize amashuri ahambaye, ikabaha ubushobozi bwo kuvura batanga urugero ku bajyanama b’ubuzima.

Bavuga ko itegeko rishyiraho urugaga ryari rigamije kubahuriza hamwe no kubakurirana mu bijyanye no kunoza imikorere ariko abagiyemo mbere aribo rufasha.

Ibyo ngo binahombya Leta kuko hari abantu iba yatanzeho amafanga ngo bige ayo masomo barangiza ntibahabwe amahirwe yo guhangana ku isoko ry’umurimo bamwe bahitamo kujya mu gushakisha akazi mu mahanga, gukora akazi katajyanye n’ibyo bize cyangwa bagahitamo kwicara ntacyo bakora.

Umuyobozi w’urugaga rw’abaganga mu by’imiti, Dr. Muganga Raymond, yabwiye IGIHE ko urugaga rwashyizweho ku nyungu z’umuturage zirimo guharanira ko yitabwaho n’umunyamwuga kandi ufite ubumenyi.

Ibyo ngo bituma abantu bahabwa imiti n’abantu babifitiye ubumenyi n’ubushobozi, bikarinda ingaruka zaterwa no kuyifata mu buryo butubahirije ibisabwa.

Dr. Muganga yavuze ko abanyeshuri bijujutira ibizamini, abenshi baba badashoboye.

Ati “Abenshi baba badashoboye bavuga ko batazabitsinda kubera ko badashoboye. Ubwo rero tugomba gushyiramo imbaraga kugira ngo twizere ko ugiye ku isoko ashoboye kuko ni ubuzima bw’abantu.”

Yavuze ko hari nk’abiga mu mahanga ibijyanye no gukora mu nganda ariko ibyo gukora muri farumasi nta bumenyi buhagije bafite bigatuma bakora bagatsindwa cyangwa bagatinya kubikora.

Yavuze ko mu banyeshuri baheruka gukora ikizamini, mu batsinzwe harimo batatu bize muri kaminuza y’u Rwanda abandi hanze.

Ati “Bivuga ko ubwo muri Kaminuza y’u Rwanda nta kibazo ariko abenshi batsinzwe ni abize hanze.”

Avuga ko utsinzwe aba afite amahirwe yo kongera gukora ibindi bizamini kuko bikorwa inshuro zigera kuri enye ku mwaka.

Ati “Ntabwo ababyize bakunda kubura akazi ariko nanone ntabwo twareba ngo wawundi watsinzwe ateye ikibazo mu by’ubuhanga mu by’imiti kuko hari abatsinzwe ariko tureba ngo iyo ajyayo yari gukoramo iki. Iyo ari umuhanga akoramo natwe bitugwa neza.”

Dr. Muganga avuga ko hari aho usanga muri farumasi hakoramo abantu batize iby’ubuhanga mu by’imiti wenda barize nk’ubuforomo ‘Ariko iyo dusanze hari ifunguye idafite umuhanga mu by’imiti, kiba ari ikibazo ku uyishinzwe’.

Ku bizamini bitangwa benshi bagatsinda, Dr. Muganga avuga ko byagakwiye kuba biterwa n’uko wenda bikomeye bitari ku rwego rw’ibyo bize cyangwa ari abaswa.

Ati “Birashoboka ko abantu bakora bagatsinda kandi abenshi ni abize mu mahanga batize ibihwanye n’isoko ryo mu Rwanda.”

Yavuze ko amanota 70% yemejwe n’urugaga nk’uburyo bwo gusuzuma ubumenyi bafite, naho amafaranga bishyura kugira ngo bakore ikizamini avuga ko atariyo yatunga urugaga kuko yifashishwa mu kugitegura.

Ati “Sinzi niba twavuga ko ari ugukabya ariko hari ahantu umuntu agera tukavuga ngo ntashoboye, yatera ikibazo aho kugira ngo agikemure. Ubwo rero tunabishyiramo imbaraga kuko ari ubuzima bw’abantu buba buri mu kaga.”

Urugaga rw’abahanga mu by’imiti rwashinzwe mu 2013 ngo rukurikirane abahanga mu by’imiti, ubu rufite abanyamuryango basaga 950.

Abize amasomo y'ubuhanga mu by'imiti basaba ko bakoroherezwa kwinjira ku isoko ry'umurimo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza