Abanya-Kigali bagiye gutangira gupimwa Coronavirus basanzwe mu mihanda

Yanditswe na Twarabanye Venuste
Kuya 1 Nyakanga 2020 saa 03:46
Yasuwe :
0 0

Mu rwego rwo gusesengura imiterere y’uko icyorezo cya COVID-19 gihagaze, Ikigo cy’Igihugu gishinzwe Ubuzima, RBC, kigiye gutangira isesengura rizasiga bamwe mu baturage bo Mujyi wa Kigali bapimwe aho bazajya bafatwa ibizamini basanzwe ku mihanda itandukanye.

RBC yatangaje ko guhera ku wa Kane, tariki 2 Nyakanga 2020 izatangira gusuzuma icyorezo cya COVID-19 ku mihanda imwe n’imwe yo muri Kigali yatoranyijwe.

Ubutumwa yanyujije ku rukuta rwa Twitter bugira buti “Ikigo cy’Igihugu gishinzwe Ubuzima, RBC, gikomeje gusesengura uko icyorezo cya COVID-19 gihagaze mu Mujyi wa Kigali. Ni muri urwo rwego hateguwe gahunda nshya yo gusuzuma #COVID-19 itangira kuri uyu wa Kane tariki ya 2.07.2020 mu mihanda imwe n’imwe yatoranyijwe mu Mujyi wa Kigali.’’

Abaturarwanda basabwe korohera abazaba bari muri iki gikorwa kugira ngo kigende neza bigizwemo uruhare na buri wese.

Bukomeza buti ‘‘Abakoresha ibinyabiziga, moto, n’abanyamaguru bazasabwa iminota itanu gusa, bapimwe hanyuma bakomeze urugendo. Turasaba Abanyakigali korohereza abakozi bari muri iki gikorwa kugira ngo tubashe guhashya iki cyorezo. Dukomeze dufatanye #Tuzatsinda #COVID19.’’

Biteganyijwe ko igikorwa cyo gupimira abaturage mu mihanda kizatangirizwa ku mugaragaro kuri Stade Amahoro i Remera saa Moya z’igitondo cyo ku wa 2 Nyakanga 2020.

Igikorwa kizabera mu duce dutandukanye muri Remera, Nyamirambo, Kicukiro n’aho Kigali ihurira n’izindi ntara nka Giti cy’Inyoni, Rugende na Gahanga.

Iki cyemezo cyafashwe nyuma y’uko ku wa 25 Kamena 2020, Minisiteri y’Ubutegetsi bw’Igihugu yatangaje ko imidugudu itandatu yo mu Turere twa Kicukiro na Nyarugenge, igomba kujya muri guma mu rugo mu gihe cy’iminsi 15, kubera icyorezo cya Coronavirus cyatugaragayemo.

Kuva icyo gihe hakomeje kugaragara abarwayi bashya muri Kigali bivugwa ko bafitanye isano cyangwa bahuye n’abanduye.

Imibare iheruka igaragaza ko muri Kigali ku wa 27 Kamena hagaragaye abarwayi ba Coronavirus babiri, ku wa 28 Kamena baba batandatu, ku wa 29 Kamena bagera kuri 22 naho ku wa 30 Kamena 2020 hagaragaye barindwi.

Magingo aya, mu Rwanda hamaze kugaragara abantu 1025 basanganywe Coronavirus mu bipimo 143 943 bimaze gufatwa, muri bo 444 barakize mu gihe babiri bitabye Imana.

U Rwanda ni kimwe mu bihugu bikomeje gushimirwa ingamba cyafashe zo guhangana na Coronavirus zirimo gupima abantu ku bwinshi, gushishikariza abaturage kugira isuku, gukurikirana abanduye n’abakekwaho kwandura Coronavirus n’ibindi.

Ku wa 30 Kamena 2020 nibwo Umuryango w’Ubumwe bw’u Burayi warushyize mu bihugu abaturage babyo bemerewe gutembera i Burayi, nyuma yo gusesengura no kunyurwa n’ingamba rwafashe mu guhashya Coronavirus.

Nubwo serivisi nyinshi zikomeje gufungurwa, Abanyarwanda barasabwa kutirara ngo bumve ko icyorezo cyarangiye. Bagirwa inama yo gukomeza kubahiriza amabwiriza yashyizweho, bibuka kwambara agapfukamunwa buri gihe bavuye mu ngo, bakaraba intoki kenshi, birinda amakoraniro n’ibindi bintu byose bishobora guhuriza hamwe abantu benshi.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Gupima Coronavirus bigiye gutangira gukorwa mu buryo rusange muri Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .