Abambara agapfukamunwa kanduye baburiwe ko gashobora kubatera indwara

Yanditswe na Prudence Kwizera
Kuya 27 Nyakanga 2020 saa 08:09
Yasuwe :
0 0

Abahanga mu buzima bavuga ko kwambara agapfukamunwa kadafite isuku bishobora gutera izindi ndwara ziganjemo iz’ubuhumekero, bityo bagakangurira abaturage kugira isuku muri byose by’umwihariko muri ibi bihe byo kwirinda icyorezo cya COVID-19.

Kuva icyorezo cya COVID -19 cyagaragara mu Rwanda ku wa 14 werurwe 2020, Leta yafashe ingamba zigamije kurinda abaturage kucyandura, zirimo no kwambara agapfukamunwa mu rwego rwo gukumira ikwirakwira ryacyo.

Gusa hari bamwe mu baturage bakomeje kugaragara bambaye udupfukamunwa tudafite isuku.

Dr Sendegeya Augustin, umuganga w’impuguke mu bijyanye n’indwara zo mu muhogo, mu matwi no mu mazuru, akaba n’Umuyobozi Mukuru w’Ibitaro bya Kaminuza bya Butare (CHUB), avuga ko kwambara agapfukamunwa kadafite isuku bishobora gutera izindi ndwara.

Yagize ati “Mu by’ukuri agapfukamunwa kanduye ni umwanda, hari indwara nyinshi zishobora kwandurira mu mwanda; cyane cyane buriya iyo agapfukamunwa ukambaye ugahumekeramo kagatota, iyo utakameshe nko muri iki gihe cy’icyi hakazaho umukungugu; iyo gasa nabi gashobora kukwanduza izindi ndwara ziterwa n’umwanda.”

Yakomeje agira inama abaturage yo kujya basukura udupfukamunwa kugira ngo babashe kwirinda COVID-19 ari nako birinda izindi ndwara.

Ati “Akaba ari yo mpamvu dukangurira abantu rwose kugerageza kugasukura, agakoze mu myenda kabasha kumeswa bakakamesa, bakakanika bakagatera ipasi, naho agakoreshwa rimwe kagakoreshwa kakajugunywa ahabugenewe.”

Dr Sendegeya yasobanuye ko impamvu nyamukuru yo kwambara agapfukamunwa ari ukurinda ko abantu banduzanya icyorezo cya COVID-19 kigakwirakwira mu bantu.

Yasobanuye ko hari agapfukamunwa gasanzwe gakoreshwa kwa muganga, avuga ko iyo umuntu akambaye akagakuramo agomba guhita akajugunya ahabugenewe ntiyongere kukambara kandi adakwiye kurenza amasaha ane akikambaye.

Naho agapfukamunwa gakoze mu mwenda, ko umuntu ashobora kukambara yagakuramo akakamesa neza n’amazi n’isabune, akakanika kamara kuma akagatera ipasi akongera kugakoresha.

Bamwe mu baturage bahuye n’umunyamakuru wa IGIHE bambaye udupfukamunwa tudafite isuku bavuze ko biterwa n’akazi bakora.

Umusore ukora akazi k’ubukarani ati “Ubu se iyi sima iba intumukira, reba ndikora ku munwa ndagira gute, (…) ndirinda nyine uko bimeze uku nguku nawe urabibona. Nta kibazo kanteye kuko ari njyewe njyenyine ukambaye, nta wundi nagaha ngo akambare.”

Mugenzi we na we yavuze ko impamvu agapfukamunwa yambaye kanduye byatewe n’akazi akora ko guterura imizigo.

Ati “Mba nagafuze ariko iyo ngeze mu kazi gahita kandura bitewe n’uko ivumbi riba rintumukira. Ubu buri saha nagafura nkabivamo koko?”

Usibye isuku y’agapfukamunwa, abaturage bagirwa inama yo kugira isuku muri byose kuko bibafasha kugira ubuzima buzira umuze.

Imibare itangwa n’inzego z’ubuzima igaragaza ko inyinshi mu ndwara abagana amavuriro bakunze kwivuza zikomoka ku mwanda, bityo zishobora kwirindwa abantu bose bagize isuku.

Abaturage barakangurirwa kwambara udupfukamunwa dufite isuku mu rwego rwo kwirinda ikwirakwira rya Coronavirus n'izindi ndwara z'ubuhumekero

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .