2019: Umwaka usize ubudasa n’icyizere bitajegajega mu buvuzi bw’u Rwanda

Yanditswe na Evariste Nsengimana
Kuya 29 Ukuboza 2019 saa 09:43
Yasuwe :
0 0

Umwaka wa 2019 usa n’utazasibangana mu mitwe y’abanyarwanda muri rusange, ariko by’umwihariko ku bakurikiranira hafi ubuzima rusange bw’igihugu n’urwego rw’ubuzima mu Rwanda bitewe n’ibikorwa bidasanzwe uru rwego ruri mu zifatiye runini imibereho myiza y’abaturage rwagezeho.

Uyu mwaka usigaje iminsi ibarirwa ku ntoki ngo urangire, urwego rw’ubuzima mu Rwanda rwageze kuri byinshi bidasanzwe, byubaka ubudasa n’icyizere cy’ahazaza ku buzima bw’abenegihugu.

Uretse kwakira inama zikomeye zigiwemo ingingo zitandukanye ku bibangamiye iterambere ry’urwego rw’ubuvuzi ku Rwanda n’Isi muri Rusange kandi zigafatirwa ingamba, hari ibindi bikorwa bitanga icyizere cy’ahazaza birimo gutangiza ubuvuzi butamenyerewe, ubuvumbuzi bw’udukoko tudasanzwe n’ibindi.

Bimwe mu byagezweho bitanga icyizerere cy’ubuvuzi:

Kubaga umurwayi adasatuwe igice kinini cy’umubiri

Muri uyu mwaka nibwo Guverinoma y’u Rwanda yateye intambwe idasanzwe, itangiza ubuvuzi buhambaye bwifashisha ikoranabuhanaga mu kubaga umurwayi indwara z’imbere mu mubiri hatabayeho gusatura igice kinini cyawo, hagasaturwa igice gito kinyuzwamo ibikoresho byabugenewe mu kuvura igice kirwaye.

Ubu buryo bwitwa ‘Minimally Invasive Surgery’ abaganga b’inzobere mu kubaga batobora agace gato k’umubiri, bakoherezamo ibikoresho byabugenewe, bakavura igice kirwaye barebera ku mashini, barangiza bagasubiranye ka gace kasatuwe ku buryo uwabazwe ashobora no gutaha mu rugo bucyeye. Ni ubuvuzi bwatangijwe muri Nzeri.

Ubu buryo bwaje busanga ubwifashishwaga buciriritse, bushobora kwifashishwa mu kubaga ibice bitandukanye birimo mu nda, kubaga ababyeyi, kanseri y’udusabo tw’intanga tw’abagabo n’ibindi.

Abana bavutse bamaze igihe gito basamwe, babaho

Mu Ugushyingo nibwo ku nshuro ya mbere abaganga bo mu Rwanda babashije kwita ku mubyeyi wabyaye amaze igihe gito gishoboka asamye, abana be bakabaho.

Aba bana b’impanga babyawe na Umutoni Peace na Ntaganira Felix, ababyeyi bo mu Murenge wa Kinyinya mu Karere ka Gasobo nyuma y’ibyumweru 24 basamwe, bitabwaho n’abaganga bo ku bitaro byitiriwe umwami Faisal.

Umuyobozi w’agateganyo w’ibitaro byitiriwe umwami Faisal, Dr Kalimba Edgar, yabwiye IGIHE ko “Atari bishya ko abana bavuka batujuje amezi icyenda bakitabwaho bakabaho ariko ni ku nshuro ya mbere abaganga n’ibitaro byo mu Rwanda babashije gufasha abana bavutse bamaze amezi macye.”

Ubusanzwe abana barenga 70% bavutse bamaze hejuru y’ibyumweru 28 nibo babaho ariko ku bari munsi yabyo nk’aho bavukiye ibyumweru 24 bigoye ko babaho.

Ni igikorwa kigaragaza ko hari intambwe ishimishije abaganga n’ibitaro byo mu Rwanda bitera mu kongera no kunoza serivisi z’ubuvuzi butangwa.

Kwemeza ubushakashatsi ku bwoko bushya bw’agakoko gatera igituntu

Muri uyu mwaka nibwo Itsinda ry’abakozi b’Ikigo cy’Igihugu cy’Ubuzima mu Rwanda (RBC), mu ishami rya Laboratwari, ryavumbuye ubwoko budasanzwe bw’agakoko gatera igituntu butigeze buvumburwa n’abandi bahanga ku Isi mu mateka y’iyi ndwara.

Ngabonziza ari gusobanura uko urugendo rwo kuvumbura ubwoko bushya bw'agakoko gatera igituntu rwagenze

Iri tsinda ryatangiye ubushakashatsi ku gikororwa cy’umurwayi w’umunyarwanda yatanze muri Gicurasi 2017, abarigize bamurika uburyo bavumbuye aka gakoko mu nama mpuzamahanga y’abashakashatsi ku dukoko dutera igituntu yabereye muri Espagne hagati ya 30 Kamena na 4 Nyakanga, buhita bwemezwa.

Ni intambwe ishimishije igaragaza intambwe urwego rw’ubuvuzi mu Rwanda bugenda butera, by’umwihariko mu gutera intambwe igana ku buvumbuzi bw’indwara n’imiti ihangana nazo.

Kurenza intego ya Loni mu kwita ku bafite virusi itera SIDA

Umwaka wa 2019 wabaye uw’ubudasa ku Rwanda ku ruhando mpuzamahanga mu bijyanye no kurwanya no gukumira icyorezo cya virus itera SIDA.

Ishami ry’Umuryango w’Abibumbye rishinzwe kurwanye SIDA (UNAIDs) ryihaye intego ya (90-90-90) ko mu 2020 abafite virusi itera Sida bazaba bazi uko bahagaze ari 90%, abafata imiti 90% naho kugabanuka kwa virusi itera Sida bikaba 90%.

Raporo nshya yashyizwe abahona kuwa 25 Nzeri 2019 yagaragaje ko u Rwanda rwateye intambwe idasanzwe mu gukumira icyorezo cya Sida, by’umwihariko rukomeje kuza imbere mu gufasha abayirwaye kubona imiti no kubarinda ingaruka zayo.

Mu Rwanda raporo igaragaza ko ikigero cyo kumenya uko abantu bahagaze ari 84%, abafata imiti ari 98% naho ikigero cyo kugabanuka kwa virusi itera SIDA mu mubiri kiri kuri 90%.

Umusanzu mu kurwanya indwara zihangayikishije Isi

Muri mwaka benshi ntibazibagirwa ukuntu Guverinoma y’u Rwanda yemeye gutanga miliyoni $ 2.5 (asaga miliyari 2.3 Frw) mu Kigega Global Fund, azakoreshwa mu rugamba rwo kurwanya indwara eshatu zihangayikishije Isi, arizo Virusi itera Sida, igituntu na Malaria kugeza mu 2023.

Niyo mafaranga menshi yari abashije gukusanywa n’umuryango uhuriwemo n’impande nyinshi, ari nayo menshi Global Fund yabashije gukusanya kuva yashingwa. Azashorwa mu bikorwa byitezweho kurokora ubuzima bw’abantu miliyoni 16, no gushyira iherezo ku ndwara za Sida, Igituntu na Malaria bitarenze umwaka wa 2030.

Perezida Kagame yagenewe igihembo ku kugeza ubuvuzi kuri bose

Minisitiri w’Ubuzima Dr. Diane Gashumba niwe washyikirijwe iki gihembo n’umuryango Nyafurika ugamije kugeza ubuvuzi burambye kuri bose ‘Amref Health Africa’

Muri Werurwe uyu mwaka nibwo umuryango Nyafurika ugamije kugeza ubuvuzi burambye kuri bose ‘Amref Health Africa’ wageneye igihembo Perezida Kagame, cy’umuyobozi w’igihugu wagize uruhare rukomeye mu gushyigikira gahunda n’ibikorwa bigamije kugeza ubuvuzi kuri bose muri Afurika (Universal Health Coverage Presidential Champion Award).

Minisitiri w’Ubuzima Dr. Diane Gashumba washyikirijwe iki gihembo icyo gihe yavuze ko kigaragaza uguha agaciro ibikorwa Perezida Kagame akorera abo ayobora, bigiye kongerera imbaraga abakozi b’ibitaro, amavuriro, ibigo nderabuzima n’abandi zo gukora bivuye inyuma.

U Rwanda rwungutse ikigo gikora insimburangingo n’inyunganirangingo

Muri Mata uyu mwaka nibwo u Rwanda rwujuje ikigo kizajya cyita ku bafite ubumuga, kigakora insimburangingo n’inyunganirangingo, hagamijwe gukuraho imbogamizi ku iterambere ry’abafite ubumuga.

U Rwanda rwungutse ikigo gikora insimburangingo n’inyunganirangingo

Iki kigo giherereye i Gahini mu Karere ka Kayonza, cyubatswe n’umuryango ufasha abafite ubumuga, Christian Blind Mission (CBM), ku bufatanye n’itorero ry’Abangilikani, Diyosezi ya Gahini n’Inama y’Igihugu y’Abafite Ubumuga (NCPD). Cyuzuye gitwaye miliyari 1,5Frw utabariyemo ibikoresho bizagishirwamo’.

Hatangijwe ikinyamakuru cy’ubuzima

Muri uyu mwaka nibwo ku nshuro ya mbere u Rwanda rwatangije ikinyamakuru cyitezweho gufasha abanyaranwanda n’abanyamahanga kubona amakuru yizewe ku buntu no kwirinda ibihuha

Iki kinyamakuru gifite ishusho nk’iy’igitabo, kitwa ‘Rwanda Public Health Bulletin’, cyafunguwe ku wa 30 Mata 2019, Kizajya gisohoka kabiri mu mwaka [Muri Werurwe na Nzeri] gikwirakwizwe ku bigo nderabuzima, ku bitaro no ku biro by’ubuyobozi, gitangwe ku buntu.

Ni intambwe ishimishije kuko cyatangijwe ngo gisubize ikibazo cy’uko abantu batabonaga amakuru y’impamo kuri gahunda zitandukanye z’ubuzima mu Rwanda, bigatuma bajya kuyashakishiriza ahatizewe.

Gutaha inyubako izajya ibikwamo inkingo

Muri Gicurasi uyu mwaka kandi Minisiteri y’Ubuzima yatashye ku mugaragaro inyubako izajya ibikwamo inkingo z’abana, imiti n’ibindi bikoresho byo kwa muganga, ifite agaciro ka miliyari na miliyoni 800 Frw.

Iyi nyubako iherereye mu cyanya cyagenewe inganda i Masoro mu Karere ka Gasabo, niyo izajya ibikwamo inkingo zose zifashishwa mu gukingira abana, Ubusanzwe inkingo zikoreshwa mu gukingira abana mu Rwanda zabikwaga mu nzu yakodeshwaga miliyoni 4 Frw ku kwezi.

Zimwe mu nama mpuzahanga zabereye mu Rwanda

Muri uyu mwaka u Rwanda rwakiriye inama mpuzamahanga zitandukanye ziga kuri gahunda zo guteza imbere ubuvuzi muri rusange.

Kuva tariki 1 kugeza tariki ya 7 Ukuboza 2019 u Rwanda rwakiriye inama idasanzwe yiga ku kurwanya virusi itera Sida ndetse n’izindi ndwara zandurira mu mibonano mpuzabitsina (ICASA).

Ni imwe mu nama zitabiriwe n’abantu benshi rwakiriye, bagera ku bihumbi 10 bari baturutse hirya no hino ku Isi, barimo abashakashatsi, abarimu muri za Kaminuza, abikorera, abayobozi mu nzego za leta, abafite ubwandu bwa Virusi itera Sida n’ababafasha.

Muri iyo nama hagaragarijwemo intambwe ibihugu bigenda bitera mu kurwanya virusi itera SIDA, gufasha abayirwa n’ibindi bigamije gukumira ko iki cyorezo cyakomeza kwibasira imbaga y’agatuye Isi.

Muri Gicurasi kandi u Rwanda rwakiriye inama Nyafurika yiga ku buzima bw’abana bakivuka, yahuje inzobere z’abaganga b’indwara z’abana, ababyaza n’abandi bakora mu nzego z’ubuzima mu Rwanda, u Burundi, Kenya, Tanzania, Uganda na Zambia bagameje gushaka uko ubuvuzi bw’abana bwatezwa imbere.

Muri Nzeri kandi u Rwanda rwakiriye inama nyafurika yiga ku gutanga ubufasha ku barwaye indwara zidakira kandi zitera uburibwe, igamije kongera imbaraga mu kwinjiza ubuvuzi bw’indwara zidakira muri serivisi z’ubuvuzi budaheza, kongera ibikoresho byifashishwa ku kuvura abazirwaye n’ibindi.

Muri Werurwe naho rwakiriye inama Nyafurika igamije gusuzuma uko gahunda zo kugeza ubuvuzi kuri bose zarushaho kunozwa n’izindi.

Inama yo gutangiza ubuvuzi bwo kubaga badasatuye igice kinini cy'umubiri yitabiriwe n'inzobere mu by'ubuzima n'abandi barenga 250
Umutoni wabyaye abana babiri igihe kitageze bakitabwaho ubu bakaba ari bazima
Umwe mu banganga arimo kwita ku bana bavutse igihe kitageze
Ni ubwa mbere mu Rwanda abana bavutse bafite amezi atanu bakitabwaho bakabaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza