00:00:00 IGIHE NETWORK KN KINYARWANDA EN ENGLISH FR FRANCAIS

Urugendo rugoye rwagejeje Vincent Murekezi imbere y’ubutabera

Yanditswe na Mwene Ndabarasa
Kuya 5 April 2023 saa 07:26
Yasuwe :

Hari ku wa Mbere tariki ya 28 Mutarama 2019, ubwo urwego rushinzwe amagereza muri Malawi rwashyikirizaga urwego rw’u Rwanda, uwitwa Vincent Murekezi, kugirango arangize igihano yari yarakatiwe n’inkiko zo muri icyo gihugu.

Murekezi yahamwe n’ibyaha birimo ruswa, kunyereza imisoro ndetse no gukoresha impapuro mpimbano. Ibi byabaye nyuma y’uko mu mwaka wa 2017, u Rwanda na Malawi byasinye amasezerano yo guhererekanya abanyabyaha.

Izina Vincent Murekezi ariko ryibutsa ibihe bitari byiza Abanyarwanda cyane cyane abakomoka mu majyepfo mu mujyi wa Huye, kuko yari umwicanyi ruharwa mu gihe cya Jenoside yakorewe Abatutsi.

Murekezi kimwe n’abandi banyarwanda bahunze ubutabera, abenshi bahiriwe n’ubucuruzi muri icyo gihugu, bityo bibafasha kwiyegereza abantu bo mu nzego zitandukanye. Kuvuga izina Murekezi muri Malawi byari ikizira kubera imbaraga yari afite.

Ibinyamakuru bibiri byo muri icyo gihugu byagerageje kwandika kuri uyu mugabo, byarezwe n’abunganizi mu mategeko ba Murekezi mu mwaka wa 2016. Ibi binyamakuru byavugaga ko yabonye pasiporo mu buryo butemewe n’amategeko, ndetse yiyita Umunya-Tanzaniya, kandi ari umunyarwanda ushakishwa n’ubutabera kubera ibyaha bya Jenoside yasize akoze mu Rwanda.

Abandikaga iyi nkuru ntibashyizeho amazina yabo kubera gutinya imbaraga za Murekezi.

Nubwo Murekezi yakingirwaga ikibaba n’inzego z’umutekano ndetse akagira inshuti zikomeye harimo uwari Minisitiri w’umutekano, Uladi Mussa, ndetse n’umupolisi ukomeye ACP Emmanuel Soko, igitutu cyabaye cyinshi maze arafatwa, arafungwa, kubera kubona pasiporo y’icyo gihugu akoresheje ruswa n’impapuro mpimbano.

Uwari Minisitiri Uladi Mussa na we yarafashwe arafungwa, akatirwa imyaka itandatu kubera guha pasiporo Murekezi, akanamuhindurira irangamimerere.

Pasiporo ya Malawi yahawe Murekezi mu mazina ya Vincent Banda

Murekezi yari afite pasiporo ifite numero MA0788171 yabonye mu mwaka wa 2011 ku mazina ya Banda Vincent, igaragaza ko yavukiye muri Tanzaniya.

Ubwo Murekezi yamenyaga ko ibye byagiye hanze, yagiye mu gihugu cya Afurika y’Epfo amarayo imyaka igera kuri itatu, agaruka muri 2016. Nibwo yahise afatwa, ariko arekurwa nyuma y’iminsi itatu amaze gutanga ruswa ya $3000.

Murekezi nubwo yari yarasabye uruhushya rwo gutunga imbunda ntarwemererwe, byaje kumenyekana ko yari ayitunze.

Ibya Murekezi byakomeje kuba agatereranzamba, kuko yarafatwaga akongera akarekurwa kubera gukoresha ruswa. Ariko tariki ya 6 Werurwe 2017 yakatiwe igihano cyo gufungwa imyaka itanu, ahamwe n’ibyaha bya ruswa no kunyereza imisoro yakoze guhera mu mwaka wa 2008.

Icyo gihano ni cyo Murekezi ari gukora, akaba ategereje ko kirangira mu gihe ategerejwe kuburana ku byaha bya Jenoside, dore ko Gacaca yo yamukatiye imyaka 19 adahari.

Niba warageze ahitwa "Kuri Ruliba" mu mudugudu wa Nyarurembo, akagari ka Gitwa, umurenge wa Tumba mu karere ka Huye, waba warageze ku rugo rwa Vincent Murekezi kuko ni we wabashije kubakisha urugo rwe amatafari ya Ruliba, yakoreshwaga na bake mbere ya Jenoside yakorewe Abatutsi.

Iyi nzu ya Murekezi iherereye mu murenge wa Tumba mu Karere ka Huye

Murekezi avugwa mu bwicanyi bwibasiye Abatutsi muri Butare, aho yakoranaga hafi na hafi na Major Cyriaque Habyarabatuma, Dr. Sosthene Munyemana na Dr. Eugene Rwamucyo. Ashinjwa gushuka Abatutsi ko azabakiza, akabajyana iwe, akabaka amafaranga ubundi akabagabiza Interahamwe.

Mu rugo rwe harimo igiti cy’umunyinya. Aha niho inama zo kwica Abatutsi zaberaga, ndetse nimugoroba akagurira Interahamwe inzoga, azishimira akazi "keza" zakoze.

Uyu munyinya uri mu rugo rwa Murekezi, ahaberaga inama z'interahamwe

Murekezi amaze kubona ibyaha yakoze ndetse no kumenya amakuru ko ingabo za RPF Inkotanyi zikomeje gufata uduce twinshi, yahunze mu bambere, dore ko yambutse umupaka wa Rusizi muri Kamena 1994, yambukana n’ikamyo itwaye ibicuruzwa.

Nyuma yo kuba mu mutwe wa FDLR, Murekezi yerekeje muri Afurika y’Epfo, akaba yarabaye n’umunyamuryango wa RNC, umutwe w’iterabwoba washinzwe na Kayumba Nyamwasa. Murekezi yagaragaye kenshi mu myigaragambyo yateguwe na RNC yiyita umunyapolitiki, ndetse no mu nama zayo.

Ibi byo kwihisha inyuma ya politiki bikorwa n’abajenosideri benshi batandukanye.

Jean Paul Micomyiza uherutse koherezwa n’ubutabera bwo muri Suede, yasuwe na Televiziyo yo muri icyo gihugu yitwa TV4, maze ayibwira ko impamvu ubushinjacyaha bwo mu Rwanda bumushaka ari uko aba mu ishyaka ritavuga rumwe na leta rya FDU Inkingi, ryashinzwe na Victoire Ingabire.

Ntabwo ari we mwicanyi wenyine ubarizwa muri iryo shyaka, kuko na Marcel Sebatware wishe Abatutsi mu Bugarama na we yihisha inyuma ya politiki ahunga ubutabera. Urutonde ni rurerure muri FDU Inkingi.

Muri Malawi ntabwo Murekezi yari umuntu usanzwe. Ruswa no kunyereza imisoro yabikoze guhera mu 2006, ariko nta kinyamakuru cyangwa umuryango utegamiye kuri Leta washoboraga kuba wabishyira hanze kubera gutinya kuba bagirirwa nabi, bitewe n’abantu bakomeye bari baziranye na Murekezi.

Ntabwo ari we wenyine kuko amakuru menshi avuga ko muri Zambia na Malawi, abasize bahekuye u Rwanda bageze muri ibyo bihugu bakorana ingufu bidasanzwe, bitandukanye n’abenegihugu, bityo bakagira ubushuti budasanzwe n’abari mu nzego z’umutekano n’abandi bayobozi batandukanye, kubera kugira amafaranga.

Ibya Murekezi muri Malawi ni nk’ibya Kabuga Felicien muri Kenya. Bakoresheje imitungo yabo ngo babashe gucika ubutabera igihe kirekire, bagaha ruswa abayobozi batandukanye ndetse n’abo mu nzego z’umutekano, bakaburirwa mbere igihe bashakishwa. Aha ni mu bihugu byo muri Afurika birangwamo ruswa.

Mu bihugu by’u Burayi na Amerika, abajenosideri bihisha inyuma ya politiki, imiryango iharanira uburenganzira bwa muntu ndetse n’itangazamakuru.

Imyaka hafi 30 irashize Jenoside yakorewe Abatutsi ihagaritswe. Kuvuga ko bitazongera ukundi ni ukubanza ugahana abayikoze nk’uko byemezwa n’imyanzuro y’Umuryango w’Abibumbye ndetse n’Umuryango w’Ubumwe bwa Afurika, kuri Jenoside yakorewe Abatutsi mu Rwanda.

Nyuma yo kwihisha ubutabera igihe kirekire, Murekezi yarashyize agezwa mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .