00:00:00 IGIHE NETWORK KN KINYARWANDA EN ENGLISH FR FRANCAIS

Uko abarokotse Jenoside bakiriye iyoherezwa rya Rutunga mu Rwanda

Yanditswe na Muhonzire Sylvine
Kuya 28 Nyakanga 2021 saa 10:12
Yasuwe :
0 0

Abarokotse Jenoside yakorewe Abatutsi mu 1994, bishimiye iyoherezwa mu Rwanda rya Rutunga Venant w’imyaka 72 woherejwe n’u Buholandi ku itariki 26 Nyakanga 2021, kugira ngo aburanishwe n’inkiko zo mu Rwanda ku byaha bya Jenoside akekwaho kuba yarakoreye mu yari Perefegitura ya Butare.

Rutunga wari Umuyobozi mu Kigo cya ISAR Rubona, ubu cyahindutse Ikigo cy’Igihugu gishinzwe ubuhinzi (RAB), bivugwa yagize uruhare rukomeye mu iyicwa ry’Abatutsi bagera ku 1000 bari bahungiye muri icyo kigo baturutse muri Komine za Ruhashya, Rusatira, Maraba, Mbazi na Mugusa.

Umunyamabanga Nshingwabikorwa wa IBUKA, Naphtal Ahishakiye yabwiye AFP ko igihe cyose umuntu ukurikiranyweho ibyaha bya Jenoside yakorewe Abatutsi yoherejwe mu Rwanda aba ari intambwe nziza itewe mu butabera.

Yongeyeho ati “Byafashe imyaka myinshi ariko twakiriye neza igarurwa mu Rwanda rya Rutunga wagize uruhare mu iyicwa ry’Abatutsi benshi bakoranaga na we ndetse n’abakoreraga hafi y’aho yari atuye.”

Umuturage waganiriye na RBA utarashatse ko amazina ye atangazwa yavuze ko ubwo Abatutsi bari batangiye kwirwanaho mu gihe bari batewe n’igitero giturutse Maraba, Rutunga Venant yagiye i Butare kuzana abajandarume kugira ngo bafashe icyo gitero kubatsemba.

Yagize ati “N’ikimenyimenyi Rutunga yagiye kuzana abajandarume, arabazamukana bagenda barasa abantu babatera na grenade. Rutunga iyo atazana abo bajandarume ntabwo ibibazo byari kuremera nka kuriya.”

Undi wacitse ku icumu rya Jenoside we avuga ko kuza kwa Rutanga ari uguha ubutabera abo yivuganye.

Ati “Abacu ntibashobora kugaruka ariko byibura tukumva ko barenganuwe, bahawe ubutabera nyabwo, ababagiriye nabi bagahanwa. Niba tubashije kubona Rutunga turizera ko n’abandi basigaye inyuma bazaza, nako bazanaza turabyemeza.”

Siboyintore Jean Bosco, Umushinjacyaha ushinzwe gukurikirana amadosiye y’abakekwaho Jenoside yakorewe abatutsi bihishe mu mahanga, yabwiye RBA ko nubwo ubutabera bw’u Rwanda butangiye kugirirwa icyizere hakiri ibihugu biseta ibirenge mu kohereza abasize bahekuye u Rwanda.

Yagize ati “Hari ibihugu i Burayi bigiseta ibirenge bitari byafata intumbero yo kohereza abantu hano; ntabwo ari n’ibanga u Bufaransa n’u Bubiligi ntabwo byohereza abantu hano kandi ari na bo bafite benshi."

"Ariko na none mu biganiro umushinjacyaha mukuru yagiye agirana na bo harimo kwibutsa inshingano ko ari ebyiri, ko iyo udashoboye kohereza uwakegwaho icyaha mpuzamahanga kujya kuburanira aho yagikoreye, uramubaranisha.”

Yavuze ko u Bufaransa bumaze kuburanisha batatu na ho u Bubiligi bwo bukaba bumaze kuburanisha icyenda. Avuga ko ariko ibihugu bya Afurika ari byo ifite abantu benshi bakekwaho ibyaha bya Jenoside bagera kuri 967.

Gusa Repubulika Iharanira Demokarasi ya Congo imaze kohereza batanu mu barenga 400 bahahungiye, mu gihe Uganda yo imaze kohereza batatu mu barenga 280 bahari.

U Buholandi bwohereje Rutunga nyuma yo kohereza Jean Baptiste Mugimba mu 2016 ndetse na Jean Claude Iyamuremye wamaze gukatirwa n’inkiko igihano cy’igifungo cy’imyaka 25 ku byaha bya Jenoside yahamijwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .