Ni igikorwa cyitabiriwe n’Abanyamulenge baba mu bihugu by’i Burayi birimo u Bubiligi, u Budage, Norvège, Suède na Danemark.

Uyu muhango wabimburiwe n’amasengesho, ukurikirwa n’ubuhamya bw’abarokotse ubwicanyi bwo mu Gatumba.

Mu bafashe ijambo harimo abarokotse n’ababahagarariye, barimo abo mu muryango Foundation Gatumba wari uhagarariwe na Mudagiri Janvier. Witabiriwe n’abandi Banye-Congo batari Abatutsi cyangwa Abanyamulenge.

Hari kandi Nkurunziza Alexis, Umuyobozi muri MRDP Twirwaneho ushinzwe politike na dipolomasi. Kuba yari muri uyu muhango bifitanye isano n’impamvu uyu mutwe uvuga ko watumye ufata intwaro, zirimo kurwanya akarengane n’ubwicanyi uvuga ko bukorerwa Abatutsi bo muri Congo.

Mu ijambo ryatanzwe muri iki gikorwa, Abanyamulenge basabye Perezida Félix Tshisekedi guhagarika ubwicanyi bubibasira, banasaba ko bahabwa ubutabera.

Jean Pierre Ruhamira uri mu bateguye iki gikorwa, yagaragaje ko Abanyamulenge bakeneye ubutabera.

Ati “Dukeneye ubutabera, dukeneye ubutabera, muhagarike kwica Abanyamulenge, Tshisekedi hagarika kwica Abanyamulenge, hagarika kwica Abanyamulenge, dukeneye ubutabera. Abanyamulenge bakeneye ubutabera, Abatutsi bo muri Congo bakeneye Ubutabera. Tshisekedi hagarika kwica Abanyamulenge.”

Mu ijoro ryo ku wa 13 Kanama 2004, inkambi y’impunzi ya Gatumba yari hafi y’umupaka w’u Burundi na RDC yagabweho igitero n’abantu bitwaje intwaro, benshi muri bo bari abarwanyi bo mu mutwe wa Forces Nationales de Libération, FNL.

Nibura Abanye-Congo 152 barishwe abandi 106 barakomereka, benshi mu bishwe bakaba bari Abanyamulenge bari barahungiye mu Burundi kubera imirwano yari muri RDC.

Abari muri iyo nkambi bishwe barashwe ndetse abandi baratwikwa, mu gihe impunzi zo mu yandi moko zari muri iyo nkambi zitibasiwe ku rwego rumwe.

Ingabo z’u Burundi ntizagize icyo zikora ngo zihagarike ubwicanyi nubwo bwabereye hafi y’ibirindiro byazo, mu gihe ingabo za Loni zari mu butumwa bwo kubungabunga amahoro zamenye iby’igitero cyarangiye.

Mu 2004, hatanzwe impapuro zo guta muri yombi abayobozi babiri ba FNL, barimo Agathon Rwasa, ariko urubanza ntirwakomeza.

Ni na yo mpamvu mu muhango wabereye i La Haye, Ruhamira na bagenzi be bongeye gusaba Urukiko Mpuzamahanga Mpanabyaha, ICC, gukurikirana iki kibazo.

Yagize ati “ICC mukurikirane Agatho Rwasa, yishe Abanyamulenge mu Gatumba. Abarokotse ubwicanyi bwo muri Gatumba bakeneye ubutabera. ICC mwumve amajwi yacu.”

Kuri uwo munsi kandi, abahagarariye Abanyamulenge bo muri Minembwe muri RDC bagejeje ku Bushinjacyaha bwa ICC i La Haye indi dosiye basaba ko hakorwa iperereza ku byaha bavuga ko bikomeje kubakorerwa.

Iyo dosiye yashyikirijwe ICC n’abahagarariye Abanyamulenge bari kumwe n’abanyamategeko barimo Me Bernard Maingain na Me Innocent Nteziryayo. Bashinja Perezida Tshisekedi, bamwe mu bayobozi ba RDC ndetse n’abayobozi n’inzego z’u Burundi kugira uruhare mu byaha bavuga ko birimo ibyibasiye inyokomuntu, ibyaha by’intambara n’ibindi bikorwa byo gutoteza Abanyamulenge.

[email protected]