00:00:00 IGIHE NETWORK KN KINYARWANDA EN ENGLISH FR FRANCAIS

Padiri ukurikiranweho guhana abanyeshuri akabakomeretsa yarekuwe

Yanditswe na Prudence Kwizera
Kuya 27 May 2022 saa 09:08
Yasuwe :

Urukiko rw’Ibanze rwa Gacurabwenge mu Karere ka Kamonyi, rwarekuye by’agateganyo Padiri Ndikuryayo Jean Paul, ukurikiranyweho ibyaha byo gukubita no gukomeretsa ku bushake, abanyeshuri batatu ndetse no guha umwana ibihano biremereye.

Urwo rukiko rwatagetse ko arekurwa kuri uyu wa 26 Gicurasi 2022 rumutegeka kutagera ku ishuri ryitiriwe Mutagatifu Ignace yari asanzwe ayobora.

Ibyaha aregwa abikurikiranyweho kuva ku wa 2 Gicurasi 2022 kuko aregwa gukubita abanyeshuri batatu b’abakobwa barimo ufite imyaka 14 n’abandi babiri bafite imyaka 16. Yatawe muri yombi tariki ya 5 Gicurasi 2022.

Urukiko rwemeje ko ibyo yakoze byo gukubita abanyeshuri ari ukubahana abashakira ineza no kubashyiraho igitsure no kubereka ko hari inshingano zabo batarimo kuzuza.

Rwemeje ko ibyo yakoze byari mu rwego rwo kubahanira amakosa ngo batazayasubira, ko kandi ababyeyi babo batigeze bashaka kuvana abana mu ishuri bigagaho ngo bajye kwiga ahandi, hakaba kandi n’umwe mu babyeyi wanditse aha imbabazi Padiri Ndikuryayo Jean Paul ku byaha yari akurikiranweho.

Urukiko rw’Ibanze rwa Gacurabwenge rwemeje ko Padiri afungurwa agakurikiranwa ari hanze. Mu byashingiweho kandi harimo ubwishingire bwa Musenyeri wa Diyoseze ya Kabgayi, Mbonyintege Smaragde.

Rwategetse ko Padiri Ndikuryayo agomba gutura mu rugo Rukuru rwa Musenyeri Mbonyintege i Kabgayi kandi atagomba kugera mu kigo cy’ishuri cya Koreji yitiriwe Mutagatifu Ignace yo ku Mugina mbere y’uko uyu mwaka w’amashuri urangira.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .