00:00:00 IGIHE NETWORK KN KINYARWANDA EN ENGLISH FR FRANCAIS

Munyenyezi yasobanuye ibya ’cave’ yasambanyirizwagamo Abatutsi

Yanditswe na Prudence Kwizera
Kuya 19 July 2022 saa 06:37
Yasuwe :

Munyenyezi Beatrice watangiye kuburana mu mizi ku byaha akurikiranyweho, yasobanuye ibya ‘cave’ ya hotel Ihuriro mu Karere ka Huye ashinjwa ko yagize uruhare mu bikorwa byo gusambanya Abatutsi byayikorewemo.

Kuri uyu wa Kabiri, yavuze ko cave ivugwa ari igice cyo hasi cya Hoteli Ihuriro cyari gifite ibyumba by’abashyitsi. Mu gihe cya Jenoside ibyo byumba ngo byacumbikiraga abantu bo mu muryango w’umugabo we Arsène Shalom Ntahobali kandi we atajyagamo.

Yasobanuye ko atigeze yanga Abatutsi cyangwa ngo atekereze no kubagirira nabi kuko ntacyo yapfaga na bo kandi yari mu bibazo by’umuryango yashatsemo.

Munyenyezi ngo yatewe inda yiga mu mashuri yisumbuye bituma ava mu ishuri ageze mu muryango yashatsemo yisanga batamwiyumvamo, bityo atari kubona umwanya wo kujya gufata abakobwa ngo abajyane muri cave guhohoterwa.

Ati “Imana yo mu ijuru ni yo izi ukuri kw’ibyo mvuga kandi nizeye ko ishobora byose izandenganura.”

Yavuze ko iyo cave ya hoteli yacumbikagamo abashyitsi kandi mushiki w’umugabo we ari we wari ushinzwe kubitaho nk’umukozi.

Abunganira Munyenyezi mu mategeko bavuze ko nta bimenyetso bifatika ubushinjacyaha bugaragaza bimushinja bityo urukiko rukwiye gufata umwanzuro agahabwa ubutabera.

Icyaha cyo gutegura Jenoside

Nyuma y’ikiruhuko ubushinjacyaha bwahawe ijambo bukomereza ku cyaha cya gatatu cyo gutegura Jenoside, buvuga ko umutangabuhamya witwa Nshimiyimana Jean Damascène yemeje ko yabonye Munyenyezi kuri bariyeri yo ku Nkubi atanga gerenade kandi yamubonye no mu nama mu i Rango avuga ko igihugu cyatewe kandi ‘umwanzi ari Umututsi bityo bakwiye kumurwanya’.

Undi mutangabuhamya witwa Sibomana Vincent na we ngo yabwiye ubushinjyacya ko Nyiramasuhuko akimara kwitabira iyo nama, hirya no hino hahise hashyirwaho za bariyeri zigamije gutangira Abatutsi ngo badahunga.

Bwagaragaje ko undi mutangabuhamya witwa Munyaneza Jean Damascène, yavuze ko yabonye Munyenyezi ari kumwe n’Interahamwe kuri bariyeri hafi ya hoteli Ihuriro ari kumwe n’Interahamwe bafite ibitabo n’imbunda ndetse n’ibindi bikoresho gakondo byakoreshejwe mu kwica Abatutsi.

Ubushinjacyaha bwavuze ko bufite n’amafoto agaragaza aho izo bariyeri zari ziri ndetse n’aho basambanyirizaga abakobwa muri cave ya hoteli Ihuriro.

Yiregura kuri iki cyaha Munyenyezi yavuze ko atigeze agira uruhre mu gutegura Jenoside kandi umuryango wa Nyiramasuhuko yashatsemo utamwiyumvagamo kuko umugabo we yamushatse abandi bo mu muryango batamwiyumvamo.

Ati “Ntabwo mabukwe twumvikanaga ku buryo namukurikira mu nama agiyemo za Sindikubwabo.”

Yasobanuye ko ibyo kujya kwicara kuri bariyeri bitashobokaga kuko atari gusiga umwana we w’uruhinja ngo ajye mu bwicanyi. Ku byavuze ko bariyeri yari imbere ya hoteli Ihuriro yavuze ko atari byo ahubwo yari ahagana hirya.

Yavuze ko kuva yavuka kugeza ubu atarafata imbunda mu ntoki ze, bityo ibyo ashinjwa byo kurasa umuntu cyangwa gutanga gerenade bitigeze bibaho.

Yabwiye urukiko ko no kwa Perezida Sindikubwabo atari ahazi kuko atari amenyereye i Butare, icyakora avuga ko umugore wa Sindikubwabo yigeze kuza iwe yabyaye aza guterura umwana.

Abamwunganira mu mategeko bavuze ko ubushinjacyaha bugendera ku kimenyetso kimwe cy’abatangabuhamya ariko mu by’ukuri budasobanura neza ishingiro ryacyo.

Bagarutse ku nama Munyenyezi ashinjwa kwitabira, bavuga ko ubushinjacyaha butagaragaza uwayiteguye, igihe yabereye n’ibyayivugiwemo.

Bifashishije urubanza rwiswe urw’abanya-Butare rwaburanishijwe na TPIR ko rugaragaza ko inama zose zitegura Jenoside zaberaga kuri Perefegitura ya Butare kandi nta na hamwe Munyenyezi yavuzwemo.

Ku mafoto ubushinjacyaha bwavuze, basobanuye ko atagaragaza ko Munyenyezi yari ahari cyangwa yerekane uruhare rwe mu kuyitegura.

Bagaragaje gushidikanya ku batangabuhamya kuko ngo bavuguruzanya ndetse bavuga ko hari n’aho umutangabuhamya avuga ibintu byabereye igihe kimwe ahantu hatandukanye, bakibaza niba abera hose icyarimwe.

Abamwunganira bagarageje ko mu rukiko rwa TPIR hari urutonde rw’abantu bose bateguye Jenoside yakorewe Abatutsi bagomba no kuburanishwa kandi Munyenyezi ataruriho.

Bati “Yagombye kuba yaraburanishijwe na ruriya rukiko [TPIR] kuko abateguye Jenoside bose rwari rufite urutonde rwabo.”

Ikimenyetso gishya

Munyenyezi ubwe yabwiye urukiko ko atumvikanaga na nyirabukwe Nyiramasuhuko ndetse yigeze no gushaka kuva mu muryango we, ava i Butare ajya i Cyangugu arongera aragaruka.

Iki ubushinjacyaha bwacyuririyeho bugaragaza ko ari ikimenyetso gishya kandi nyirubwite ari we ucyitangiye kigaragaza ko ibyo yavuze ku cyaha cya mbere cyo gukora Jenoside n’icya kabiri cyo gushishikariza gukora Jenoside yabeshye, kuko yavuze ko atabashaga kuva mu rugo kubera ko yari atwite kandi afite n’uruhinja.

Ubushinacyaha bwavuze ko kuba yaravuye i Butare akajya i Cyangugu bigaragaza ko yari afite imbaraga zo kugenda ndetse n’uburenganzira bwo kuva muri Perefegitura akajya mu yindi.

Kuri iki abamwunganira bongeye gusaba ijambo bavuga ko kuba yaravuye muri Perefegitura akajya mu yindi nta gitangaza kirimo kuko umuntu ashobora no kujya hanze y’igihugu arwaye agiye kwivuza.

Bavuze ko kuba atarumvikanaga na nyirabukwe nta kintu bashoboraga gutegurira hamwe ngo bishoboke.

Munyenyezi yasabye ijambo avuga ko kuba yaragiye i Cyangugu bidasobanuye ko yari afite ubushobozi. Yavuze ko mu gitondo cyo ku wa 27 cyangwa 28 Gicurasi 1994 yagiranye ibibazo na mushiki w’umugabo we ashaka kumutera icyuma mu gikoni.

Icyo gihe ngo mukuru we [wa Munyenyezi] yari yaturutse i Kigali anyura i Butare agiye i Cyangugu biba ngombwa ko amutwara asa n’uhunze nyuma aza kugarurwa kuko nta mahitamo yari afite yo kureka umugabo babyaranye.

Yavuze ko ubwo yari agarutse ari mu modoka banyuze kuri bariyeri yari hirya ya Hoteli Ihuriro bahageze baranahagarika berekana ibyangombwa, barabareka barakomeza, ahita ajya aho yacumbikaga muri hoteli.

Yasobanuye ko kuba umugore wa Sindikubwabo yaraje iwe ari uko hari habaye ibirori byo kwita umwana izina kuko yari aherutse kubyara.

Impaka ku batangabuhamya bamushinjura

Hagaragajwe ko hari abatangabuhamya 50 bashinjura Munyenyezi ariko bashyizwe kuri lisiti 15, urukiko rwemera ko ruzabumva ariko rusaba ko abamwunganira bahitamo batanu bakazaza gutanga ubuhamya bahagarariye abandi.

Iyi ngingo abunganira Munyenyezi bayanze basaba urukiko ko abatangubuhamya bose bumvwa kuko ibyaha aregwa bikomeye kandi n’ibikorwa ashinjwa gukora ari byinshi.

Urukiko rwabajije Munyenyezi icyo abitekerezaho avuga ko we yifuza guhabwa ubutabera bityo abihariye abamwunganira kugira ngo babivugeho mu buryo bukurikije amategeko.

Abamwunganira basabye urukiko ko rwabemerera bagakuramo batanu hagasigara 10 akaba ari bo bazumvwa.

Ubushinjacyaha bwavuze ko kuba abunganira Munyenyezi baratanze urutonde rw’abatangabuhamya, Urukiko ari rwo rufite ububasha bwo gihitamo abo rushaka n’umubare wabo.

Bwavuze ko kumva abatangabuhamya basubiramo ibintu bimwe atari ngombwa bityo urukiko rwabifataho umwanzuro.

Urukiko rwanzuye ko kuri iyi ngingo buri ruhande rwaba urw’uregwa n’urw’ubushinjacyaha remerewe kuzana abatangabuhamya batarenze 10 bitarenze tariki ya 29 Nyakanga 2022 kugira ngo bazabazwe mbere y’uko urubanza rukomeza tariki ya 19 Nzeri 2022 saa Tatu.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .