00:00:00 IGIHE NETWORK KN KINYARWANDA EN ENGLISH FR FRANCAIS

Humviswe abatangabuhamya barimo uwo babanye i Butare: Munyenyezi Béatrice yasubiye mu rukiko

Yanditswe na Prudence Kwizera
Kuya 19 September 2022 saa 11:09
Yasuwe :

Munyenyezi Béatrice ukurikiranyweho ibyaha bya Jenoside yakorewe Abatutsi mu 1994, yongeye kwitaba Urukiko Rwisumbuye rwa Huye kugira ngo aburanishwe kuri ibyo byaha.

Ni urubanza rwatangiye ahagana saa Tatu kuri uyu wa Mbere, tariki ya 19 Nzeri 2022 ariko ruza gusubikwa rusubukurwa saa Munani z’igicamunsi kuko uregwa yari ataragera mu rukiko. Yunganiwe mu mategeko na Me Bikotwa Bruce afatanyije na Me Gashema.

Yari yambaye impuzankano iranga abagororwa n’inkweto zifunguye, amadarubindi, isaha ku kuboko, yasokoje umusatsi we.

Akurikiranyweho ibyaha birimo icyo kwica n’icya Jenoside, gucura umugambi wo gukora Jenoside, gutegura Jenoside no gushishikariza abantu ku buryo buziguye cyangwa butaziguye gukora Jenoside.

Hari kandi icyaha cy’ubufatanyacyaha muri Jenoside, icyo kurimbura n’icyibasiye inyokomuntu. Yagejejwe mu Rwanda ku wa 16 Mata 2021 yoherejwe na Leta Zunze Ubumwe za Amerika.

Ibyaha Munyenyezi ashinjwa ko yabikoreye muri Komini Ngoma mu yahoze ari Perefegitura ya Butare, ubu ni mu Karere ka Huye.

Yireguye ku byaha bibiri byasigaye ubushize ubwo aheruka mu rukiko ku wa 19 Nyakanga 2022, ari byo ubufatanyacyaha mu gukora Jenoside n’icyaha cyo gusambanya ku gahato.
Byose yabihakanye avuga ko abatangabuhamya bamushinje ari abanyabinyoma kuko atigeze abikora kandi nta rwango yagiriye Abatutsi.

  Abatangabuhamya barimo uwabanye na Munyenyezi mu nzu

Urukiko rwasabye ko umutangabuhamya witwa Nyiraburiri Patricia yinjira. Ageze imbere y’Inteko iburanisha yabajijwe icyo bapfana avuga ko nta sano y’amaraso bafitanye.

Yavuze ko azi Munyenyezi kuko bize ku ishuri rimwe i Gitwe mu Karere ka Ruhango kandi musaza we yashakanye na mukuru wa Munyenyezi. Yavuze ko muri Jenoside babanye i Butare kuko yamufashaga atwite afite n’umwana muto.

Ati “Ni njyewe wamufashaga kuko inda yari yaramuguye nabi kandi afite n’umwana muto.”

Yasobanuye ko bageze i Butare ku wa 15 Mata 1994 bahamara hafi ukwezi ari kumwe n’abo mu muryango we barimo basaza be, bakomereza i Cyangugu.

Ati “Icyo nzi cyo ni uko twabaga turi kumwe mu nzu atwite akandi afite n’umwana.”

Yabajijwe uko yamenyaga gahunda y’umunsi niba baragendanaga, asobanura ko Munyenyezi yirirwaga mu nzu igihe kinini akakimara aryamye.

Yabajijwe niba Munyenyezi yarize kaminuza asobanura ko atayize kuko atarangije n’amashuri yisumbuye.

Abajijwe ikindi yabwira urukiko, Nyiraburiri yavuze ko amaze kumva bashinja Munyenyezi gukora Jenoside yumiwe bitewe n’ukuntu azi neza ko yari ameze bityo ibyo bamushinja atari byo kuko banabanye.

Yabajijwe niba hari ibikorwa by’ubwicanyi byabereye kuri Hoteli Ihuriro, yahakanye ko ntabyo yigeze abona.

Abajijwe niba yarigeze kubona bariyeri cyangwa akabona Munyenyezi azijyaho, asubiza ko nta byigeze bibaho kuko birirwaga mu nzu kandi no kuri radio hagatambuka amatangazo abasaba kuguma mu nzu.

Yabajijwe niba Munyenyezi yaravuye i Butare akajya i Cyangugu akongera akagaruka, yavuze ko ibyo kugaruka ntabyo azi.

Nyiraburiri yongeye kubazwa n’Ubushinjacyaha igihe bagiriye i Cyangugu n’igihe Munyenyezi yabasangiyeyo, avuga ko ari mu matariki ya mbere ya Gicurasi kandi yari kumwe n’umugabo we n’abana na benewabo b’umugabo.

Yabajijwe igihe yari kwa Munyenyezi uko yabonaga abanye n’abo mu muryango w’umugabo we barimo baramukazi be na nyirabukwe, asubiza ko bari babanye neza ariko Munyenyezi yigeze gushwana na muramukazi we witwa Denise baratongana bari mu gikoni, umwe akomeretsa undi.

Yabajijwe igihe yatandukaniye na Munyenyezi bageze i Cyangugu avuga ko batongeye kubana mu nzu imwe ariko babaga mu bipangu byegeranye, nyuma bongeye guhurira mu nkambi.

Yabajijwe gusobanura igihe ajya i Butare niba yarazanye na Munyenyezi cyangwa niba yarahamusanze, avuga ko yahamusanze.

Undi mutangabuhamya wahamagawe n’urukiko yitwa Ntasoni Janvier. Uyu mugabo usanzwe afunzwe yavuze ko muri Jenoside yari umwarimu yigisha Munyenyezi kuri GS des Parents ku Itaba mu Mujyi wa Butare.

Yavuze ko icyo gihe Munyenyezi yari atwite, abana n’umugabo we Ntahobari mu Mujyi wa Butare.

Icyo gihe hari mu mwaka w’amashuri wa 1993/1994 kandi Jenoside yatangiye muri Mata amashuri akiri kwigisha kuko abanyeshuri baruhukaga muri Nyakanga.

Yavuze ko icyo azi ari uko muri Gicurasi yagiye mu Mujyi wa Huye gushaka amafaranga, ageze hafi yo kuri Hoteli Ihuriro ahasanga bariyeri iriho abasirikare.

Yabajijwe inshuro yanyuze kuri iyo bariyeri, avuga ko ari ebyiri mu kugenda no mu kugaruka kandi atigeze abona Munyenyezi.

Uyu mugabo yavuze ko yahamwe n’ibyaha bya Jenoside kandi atigeze afatanya na Munyenyezi.

Ntasoni yabajijwe niba Munyenyezi yarigaga muri Kaminuza igihe Jenoside yabaga, avuga ko bashobora kuba bamwitiranya na baramukazi be kuko yari acyiga mu mashuri yisumbuye.

Yabajijwe aho yakoreye Jenoside avuga ko ari mu Kagari ka Matyazo mu Murenge wa Ngoma mu Karere ka Huye kandi abantu azi bayoboye ubwicanyi i Butare Munyenyezi atarimo.

Yabajijwe niba azi abashinze bariyeri muri Butare, avuga ko yumvise ko ari inzego zishinzwe umutekano.

Yabajijwe niba yarabonaga Munyenyezi hari ikibazo afite mu ishuri kijyanye n’ubuzima bwe nk’umuntu wari utwite, avuga ko atabyitagaho kuko yamwigishaga amasaha abiri mu cyumweru gusa.

Ntasoni yabajijwe niba azi uko Munyenyezi yabanaga n’umuryango yashatsemo, asubiza ko batari babanye neza kuko Ntahobari akimara kumutera inda batahise babana kandi baramukazi be batamwiyumvagamo kuko batari bamwishimiye.

Yatanze ingero ko bamuhezaga nko kugera muri butike no gukora ibindi bikorwa ndetse nta n’ibirori bamukoreye ageze mu muryango wabo nk’umugeni.

Ati “Wabonaga batamwiyumvamo kuko baramuhezaga.”

Yabajijwe niba mu ikusanyamakuru ryabereye muri gereza harigeze havugwamo ko Munyenyezi yagize uruhare muri Jenoside, avuga ko atigeze avugwa ahubwo havuzwe umugabo we Ntahobari.
Ati “Ntabwo Munyenyezi yigeze avugwa no mu makaye biranditse.”

Ntasoni yabajiwe igihe yaba yarongeye kubonanira na Munyenyezi kuva Jenoside yatangira, avuga ko batigeze bongera kubonana na rimwe.

Urukiko rwamubajije niba hari ikindi yakongeraho, avuga ko mu makuru azi ya Jenoside yakorewe muri Butare atigeze yumvamo Munyenyezi cyangwa ngo amubone ayikora.

Urukiko rwavuze ko iburanisha rizakomeza tariki 4 Ukwakira 2022 saa Tatu za mu gitondo.

Inkuru wasoma: Yashinjwe kurasa umubikira: Munyenyezi Béatrice yatangiye kwiregura ku byaha bya Jenoside [YAVUGURUWE]

Munyenyezi Béatrice ukurikiranyweho ibyaha bya Jenoside yakorewe Abatutsi mu 1994, yongeye kwitaba Urukiko Rwisumbuye rwa Huye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .