Urwego Mpuzamahanga rushinzwe imirimo y’insigarira y’Inkiko Mpanabyaha, IRMCT, rwemeje inkuru y’urupfu rwa Lattanzi ku wa 19 Kanama 2026, rumushimira uruhare yagize mu butabera mpuzamahanga.

Lattanzi yatowe n’Inteko Rusange y’Umuryango w’Abibumbye ku wa 25 Kamena 2003 ngo abe umucamanza wa ICTR, inshingano yakoze kugeza mu 2006.

Muri icyo gihe, yari mu nteko z’abacamanza zaburanishije imanza zitandukanye zirimo urwa Lt Col Tharcisse Muvunyi, ndetse n’urwa Édouard Karemera wabaye Minisitiri ushinzwe ubufatanye bw’inzego na Mathieu Ngirumpatse wabaye Perezida w’ishyaka MRND bahamijwe uruhare muri Jenoside yakorewe Abatutsi mu 1994.

Kuva mu 2007 kugeza mu 2016, Lattanzi yakoreye ICTY, aho yagize uruhare mu manza zikomeye zirimo urwa Vojislav Šešelj wabaye Minisitiri w’Intebe wungirije wa Serbia n’urwa Radovan Karadžić wabaye Perezida wa Srpska.

Mbere yo kujya muri izi nkiko, yakoraga imirimo ifitanye isano n’mategeko mpuzamahanga n’uburezi. Kuva mu 1966 yigishije muri za kaminuza zitandukanye mu Butaliyani no mu bindi bihugu.

Hagati ya 1998 na 2001, yabaye umujyanama mu by’amategeko w’itsinda ry’u Butaliyani mu biganiro by’Umuryango w’Abibumbye byagejeje ku ishingwa ry’Urukiko Mpanabyaha Mpuzamahanga, ICC.

Lattanzi yanagize uruhare mu nzego zitandukanye z’u Butaliyani na mpuzamanga zikora imirimo ijyanye n’amategeko n’ubutabazi, yandika inyandiko n’ibitabo byinshi ku mategeko mpuzamahanga.

IRMCT yavuze ko Lattanzi azibukirwa ku buhanga bwe, ubwitange n’uruhare rukomeye yagize mu gukurikirana ibyaha bikomeye mu Rwanda no mu yahoze ari Yugoslavia.

Umucamanza Flavia Lattanzi yitabye Imana