Ni ubwizigame bwagiye bukusanywa mu buryo butandukanye bwaba impapuro mpeshwamwenda, ku isoko ry’imari n’imigabane, ibigega by’ubwizigame n’ibindi.
Imibare igaragazwa na BNR yerekana ko mu 2013 ubwizigame bwari miliyari 329 Frw; mu 2014 bugera kuri miliyari 407.3 Frw; mu 2015 buba miliyari 469 Frw, mu 2016 bugera kuri miliyari 532.4 Frw naho kugeza ubu muri 2017 ni miliyari 542.3 Frw.
Guverinoma y’u Rwanda iheruka gutangiza icyumweru cyo kuzigama, kigamije gushishikariza Abanyarwanda Umuco wo kuzigama nk’inzira yo kubageza ku bukungu bwabo bwite n’ubw’igihugu muri rusange.
Ubu bwizigame bwagiye buboneka mu buryo butandukanye
BNR igaragaza ko nko kuri konti za telefoni igendanwa (mobile money), ubwizigame bwanyujijweho kugeza muri Kamena uyu mwaka bwari 2 203 213 400 Frw, avuye kuri 254 574 232 Frw muri Kamena 2016.
Hamwe mu habyaye ishoramari mu bwizigame ku rwego ruri hejuru mu myaka itanu ishize, ni nko mu migabane yaguzwe muri Crystal Telecom ingana na 27 177 320, umugabane umwe ugenda ugurwa 105Frw. Ni ibintu byatumye hakusanywa ubwizigame bwa miliyari 28 367 850 000Frw.
Ahandi ni muri I&M Bank hagurishijwe imigabane 99 030 400 buri umwe ugura 90Frw, bituma hakusanywa asaga miliyari 37.2 Frw.
Uburyo bwo kuzigama kandi bwagiye bukorwa mu matsinda, aho BNR ibarura ko kugeza mu Ukuboza 2016, mu gihugu habarurwaga amatsinda yo kwizigama agera ku 925,000, afite ubwizigame bugera kuri miliyari 16.4 Frw.
Imibare igaragaza ko kuzigama bikiri munsi ya 15% (by’umusaruro mbumbe w’igihugu, GDP) mu gihe guverinoma yihaye intego y’uko buba bwageze kuri 20% (GDP) mu 2020.
TANGA IGITEKEREZO