00:00:00 IGIHE NETWORK KN KINYARWANDA EN ENGLISH FR FRANCAIS

Ubumenyi buke, kimwe mu bikoma mu nkokora ubwishingizi bw’amatungo mu Rwanda

Yanditswe na Ntabareshya Jean de Dieu
Kuya 26 Nzeri 2021 saa 01:08
Yasuwe :
0 0

Ikigo cy’Igihugu gishinzwe Ubuhinzi n’Ubworozi mu Rwanda, RAB, cyagaragaje ko intandaro yo kuba aborozi benshi badashakira ubwishingizi amatungo yabo hakirimo inzitizi y’ubumenyi buke no kudaha agaciro ubwishingizi muri rusange.

Ibi byagarutsweho ku wa Gatanu, tariki 24 Nzeri 2021, ubwo hasozwaga amahugurwa y’iminsi itatu yahuje abashinzwe amatungo mu turere twose tw’igihugu, ibigo bitanga ubwishingizi bw’amatungo mu Rwanda, abayobozi ba stations za RAB ndetse n’inzego zinyuranye zifite mu nshingano ubuhinzi n’ubworozi.

Umuyobozi wungirije Ushinzwe Ubushakashatsi n’Ubwishingizi bw’amatungo muri RAB, Dr Uwituze Solange, yagaragaje ko ubwishingizi bw’amatungo butitabirwa cyane mu Rwanda bitewe n’uko abenshi batarabyumva.

Nko mu bworozi bw’inka, mu Rwanda habarurwa inka zisaga miliyoni na magana atatu ariko izifite ubwishingizi ntizirenga ibihumbi 44 harimo n’izitangwa muri gahunda ya Girinka ziza zishinganye.

Yakomeje ati "Ntabwo Abanyarwanda bari basobanukirwa uburyo koko ibyo bintu bikora. Buriya Umunyarwanda yaravuze ngo kora ndebe iruta vuga numve. Abanyarwanda bashakaga kubanza kureba ko iyo itungo ripfuye rishinganishijwe bishyurwa (aborozi). Mu byo twabonye byatumaga batabyitabira ni ubwo bukangurambaga buke cyane cyane binyuze muri bagenzi babo. Ikindi hari harimo ikibazo cyo gutinda kwishyurwa."

Yavuze ko mbere hifuzwaga ko nyuma y’iminsi 15 umworozi yakabaye yishyurwa itungo rye ariko ibigo by’ubwishingizi byagaragaje ko icyo gihe ari gito bigatuma habamo gukererwa. Yavuze ko bigiye gukosorwa ku buryo abishyurwa bazajya babonera indishyi ku gihe.

Uyu muyobozi yagaragaje ko hari ibikwiye gukosorwa no kongera ubukangurambaga mu borozi kugira ngo barusheho kwitabira gutanga ubwishingizi bw’amatungo cyane ko haba harimo na nkunganire ya Leta.

Ku bwishingizi bw’amatungo Leta itangira umworozi 40% na we akiyishyurira 60%, harimo ubw’inka z’ibyimanyi cyangwa inzungu, ingurube n’inkoko. Igiciro cy’ubwishingizi kuri buri tungo biterwa n’agaciro rya tungo rifite ku isoko. Ku nka babara 4.5% by’igiciro ifite, ingurube bakabara 6% mu gihe inkoko ibarirwa 5.5%.

Nko ku nka, ifite agaciro kangana n’ibihumbi 100 Frw ubwishingizi bwayo ni 4500, umworozi agatanga 2700 Frw, Leta ikamutangira 1800 Frw, inka ifite agaciro k’ibihumbi 300 Frw ubwishingizi bwayo bungana na 13.500 Frw, umworozi agatanga 8100 Frw naho Leta ikamutangira 5400 Frw. Ibi birakomeza bitewe n’agaciro inka yagenewe. Inka yemerewe gutangirwa ubwishingizi nyuma y’amezi atatu ivutse kandi ubwishingizi bwayo bumara umwaka umwe.

Ni cyo kimwe no ku ngurube kuko, ifite agaciro ka 50000Frw yishingirwa ku 3000 Frw, umworozi agatanga 1800 Frw naho Leta ikamutangira 1200 Frw. Ingurube ifite agaciro k’ibihumbi 100 Frw ubwishingizi ni 6000 Frw, umworozi agatanga 3600 Frw leta ikamutangira 2400 Frw. Ubwishingizi bw’ingurube bumara umwaka kandi ingurube yemerewe gutangirwa ubwishingizi nyuma y’iminsi 30 ivutse.

Ku nkoko nayo ihabwa agaciro k’ibihumbi bitanu ikiguzi cy’ubwishingizi kingana na 275 Frw, umworozi agatanga 165 Frw Leta ikamutangira 110 Frw. Ubwishingizi bw’inkoko z’amagi bumara umwaka mu gihe ubw’inkoko z’inyama bumara iminsi 45. Inkoko kandi yishingirwa imaze iminsi 15 iturazwe.

Umukozi ushinzwe Ubwishingizi bw’Amatungo muri Radiant, ari nayo ifite amatungo menshi yishingirwa agize 70%, Gakuru James, yabwiye IGIHE ko mu gihe cy’imyaka itatu bamaze kwishyura arenga miliyoni 320 Frw ku matungo yapfuye ari mu bwishingizi.

Yasabye aborozi gushinganisha amatungo yabo ariko n’ababufite abibutsa gukomeza kuyitaho mu rwego rwo kwirinda ko yapfa babigizemo uburangare.

Yongeyeho ati “Ubu turi mu gihe cy’iterambere aho tugenda tworora inka z’iterambere z’umukamo. Ushobora kuba utunze inka itanga litiro 20 z’amata ku munsi. Iyo byageze mu rwego rw’ubukungu biba bisaba izindi ngufu. Ni ukwigisha rero kuko ibintu umuntu atigeze abona kubibona ageze muri ya myaka bisaba kumwigisha mu buryo buhoraho."

Yagaragaje ko n’ubwo abashinganisha amatungo yabo bakiri bake ariko bitanga icyizere ko imyumvire iri kugenda ihinduka. Nko mu mwaka wa mbere bishingiye inka 1500, umwaka wa kabiri ziba 6000 ariko uyu mwaka bageze ku nka 24000.

Ni ryari itungo ryishingiwe ryishyurwa?

Minisiteri y’Ubuhinzi n’Ubworozi yari yagennye ko nibura inka, ingurube cyangwa inkoko byapfuye, veterineri w’umurenge yakora raporo agaragaza icyayishe ikohererezwa muri kigo cy’ubwishingizi umworozi akorana nacyo nibura nyuma y’iminsi 15 akaba yahawe umwanzuro w’ikigomba gukorwa.

Hari bamwe mu baturage bumva ko bahawe ubwishingizi bigatuma batita ku matungo yabo kuko baba bumva ko nagira ikibazo, ubwishingizi buzishyura nyamara iyo hakozwe isuzuma bagasanga icyishe itungo haba harimo uburangare ntabwo yishyurwa.

Iby’ingenzi bishingirwaho mu kwishyura itungo ryapfuye rifite ubwishingizi harimo kuba itungo ryagize impanuka, nko gukubitwa n’inkuba, ibikomere byo mu nda no ku mubiri, serwakira, kurumwa n’inzoka, indwara zica ariko zabanje kuvurwa itungo ntirikire n’amatungo yasabiwe gukurwa mu bworozi n’umuganga w’amatungo ubifitiye ububasha.

Iyo bigaragaye ko umworozi yagize uburangare ni ukuvuga kuvuza nabi itungo cyangwa kutarivuza, kurigaburira ibyateza impanuka nk’ibyuma n’amashashi, ubujura, intambara no kwica itungo wabigambiriye ntacyo ubwishingizi bufasha umworozi.

Dr Uwituze Solange yavuze ko hakenewe ubukangurambaga kugira ngo abantu bumve neza akamaro ko gushinganisha amatungo
Abashinzwe amatungo basabwe gukora kinyamwuga no gusobanurira byimbitse aborozi
Aya mahugurwa yitabiriwe n'abashinzwe amatungo mu turere dutandukanye tw'igihugu n'ibigo bitanga ubwishingizi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .