00:00:00 IGIHE NETWORK KN KINYARWANDA EN ENGLISH FR FRANCAIS

RSSB igiye kujya yishyura ibigo nderabuzima amafaranga ya mituweli mbere

Yanditswe na Mukahirwa Diane
Kuya 13 Ukwakira 2022 saa 08:35
Yasuwe :

Urwego rw’ Ubwiteganyirize mu Rwanda (RSSB), rwatangaje ko rugiye gutangira gukoresha uburyo bwa ‘Capitation’ mu kwishyura ibigo nderabuzima bya Leta, amafaranga akoreshwa n’abanyamuryango b’ubwisungane mu kwivuza mituweli bikajya biyahabwa mbere.

Mu bihe bitandukanye hagiye humvikana kwitana ba mwana hagati y’ibigo nderabuzima n’ibitaro bitandukanye na RSSB, aho byavugaga ko iki kigo gitinda kwishyura ibyo abanyamuryango bacyo bakoresha mituweli baba bakoresheje bikadidiza imitangire ya serivisi zabyo.

Ubusanzwe ibigo nderabuzima n’ibindi bitaro byakira abarwayi bakoresha mituweli, byakiraga abarwayi ubundi bikandika buri kintu cyose babahaye bakazabishyikiriza RSSB igakora isuzuma ikabishyura ibyakoreshejwe.

Ubu rero hazajya hakoreshwa uburyo bwa ‘Capitation’ aho RSSB izajya yicara igakora urutonde rw’ibintu umurwayi ashobora gukenera mu gihe yaba arwaye bakagena amafaranga, bityo bagaha ibigo nderabuzima amafaranga mbere byo bikagura ibyo abarwayi bazakenera hatabayeho kuzajya kwishyuza nyuma.

Ubu buryo buzakoreshwa gusa ku bigo nderabuzima bya Leta nibyo bizajya bihabwa amafaranga mbere.

Ibindi bitaro byo bizajya bihabwa amafaranga nyuma bitewe n’uko bigoye kuba wamenya nk’amafaranga umurwayi yakoresheje ku bitaro bikuru kuko akenshi ajyayo afite indwara zikomeye.

Ahubwo ikizakorwa hano kugira ngo birusheho kugenda neza ni uko RSSB izakorana n’ibi bitaro bagende bareba indwara ziri mu cyiciro kimwe zigenerwe igiciro kizwi kandi gihuriweho.

Umuyobozi Mukuru w’Urwego rw’ Ubwiteganyirize mu Rwanda (RSSB), Regis Rugemanshuro, yavuze ko bazanye ubu buryo kugira ngo babashe gukemura ikibazo cyo gutinda kwishyura ibigo nderabuzima kandi birusheho gutanga serivisi nziza.

Ati “Niba ivuriro ryabonye amafaranga yo kugura ibyo risanzwe rikenera, ikibazo cyo kuvuga ko utaboneye amafaranga igihe ntabwo kizasubira gusa icyo twashimangira ni uko abanyamuryango bacu bazarushaho kubona serivisi nziza.”

“Twazanye ubu buryo kugira ngo dufashe ibigo nderabuzima kubasha kwigurira ibyo bakeneye kugira ngo batange serivisi nziza. Mbere twibandaga ku kureba ibyo bakoresheje ubu tuzibanda kukureba serivizi yatanzwe”

Yakomeje avuga ko ubu ari uburyo bazakorana na Minisiteri y’Ubuzima n’Uturere kandi ko abazakoresha amafaranga ibinyuranyije n’ibyo yagenewe bazabihanirwa.

Umuyobozi ushinzwe ibijyanye n’Inyungu z’Abakiliya, Dr Regis Hitimana, yavuze ko ibindi bitaro bisigaye bizakoresha uburyo bwo guhuriza hamwe indwara ziri mu cyiciro kimwe zikagenerwa igiciro, bikishyurwa nyuma.

Ati “Ku bitaro bavura indwara zitandukanye zifite uburemere butandukanye hari uburyo bw’uko harebwa uburyo indwara zenda kuba mu cyiciro kimwe zikorerwa ibikorwa byenda kumera kimwe bazishyira hamwe bakaziha igiciro kimwe.”

Yakomeje avuga ko ubu buryo buzatuma kwishyura ibitaro byihuta kuko ibiciro bizajya biba bizwi, ntibisabe kujya mu yindi mibare itinda.

RSSB irateganya ko uburyo bwa ‘Capitation’ buzatangira gukoreshwa guhera muri Mutarama 2023.

Umuyobozi Mukuru w’Urwego rw’ Ubwiteganyirize mu Rwanda (RSSB), Regis Rugemanshuro, yavuze ko bazanye ubu buryo kugira ngo babashe gukemura ikibazo cyo gutinda kwishyura ibigo nderabuzima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .