Radiant yahaye umwaka mushya abakiliya bayo inatangaza ikarita idasanzwe ifasha mu kwishyura ubwishingizi

Yanditswe na Habimana James
Kuya 1 Mutarama 2020 saa 08:05
Yasuwe :
0 0

Sosiyete y’ubwishingizi ya Radiant yakiriye abayigana basangira umwaka mushya wa 2020, inabereka udushya ikomeje kubagezaho harimo ikarita yiswe ‘Turi Kumwe’ izafasha buri munyarwanda wese kugira ubwishingizi.

Mu 2013 nibwo Radiant Insurance Company yatangijwe na Marc Rugenera, itangirana intego zo gufasha abashaka ubwishingizi kububona mu buryo butabagoye ugereranyije n’uko byari bimeze ku bindi bigo. Kuva uwo mwaka Radiant itanga ubwishingizi burimo ubw’inzu, imodoka ubuzima n’ubundi.

Umuyobozi Mukuru wa Radiant, Marc Rugenera, yavuze ko ubwo batangiraga mu 2013 bakusanyije imisanzu ya miliyari 3.6 Frw, mu gihe uyu mwaka urangiye bakusanyije miliyari 13 Frw kubera uburyo abantu bakomeje kubagirira icyizere.

Ati “Murumva ko Radiant yazamutse mu buryo bugaragara kubera icyizere abanyarwanda bayigiriye kandi duhora tuvuga ko isezerano ari isezerano. Agashya twazanye ni ukuba hafi y’abakiriya bacu, ibyo abakiliya batwifuzaho dukora ibishoboka ngo tubikemure, ndasaba abatugana ngo bakomeze kuza kandi bakomeze batugirire icyizere.”

Hagati aho Radiant yibarutse ikindi kigo cy’ubwishingizi cyitwa ‘Radiant Yacu’ cyo kigamije kwegera ba banyarwanda badafite ubushobozi buremereye, ni ukuvuga nka wa wundi wavuga ati simfite amafaranga arenga 1000 ku kwezi ariko ndashaka kubona ubwishingizi.

Rugenera yakomeje ati "Twagiye no mu bwishingizi bw’Abanyarwanda bakora ubuhinzi n’ubworozi, urugero niba ufite inka ifite agaciro k’ibihumbi 500 ikaza kugira ibibazo igapfa, ariko uwo muntu akaba yaratanze amafaranga atarenga ibihumbi 25 ku mwaka, iyo nka iyo ipfuye ahabwa amafaranga akagura indi.”

Rugenera avuga ko kugeza ubu Radiant ifite abakiliya barenga ibihumbi 150 kandi bakomeje kwiyongera, ku buryo bashaka kugera muri miliyoni ebyiri.

Ati “Turashimira abantu bacu baduherekeje mu myaka itandatu ishize kandi tubasaba gukomeza kutuba inyuma, nibaze muri Radiant kandi natwe tuzakora ibikwiriye byose.”

Umuyobozi mukuru w’ikigo cy’ubwishingizi buciriritse, Radiant Yacu Ltd, Ambasaderi Joseph Habineza, yavuze ko iki kigo kigamije kugera kuri buri muntu wese ku buryo umunyarwanda wese agira ubwishingizi.

Ati “Icyo dutandukaniraho n’abandi ni uko tworohereza abantu kuriha ubwishingizi no kubafasha vuba kuri babandi bagize ikibazo, kandi tukaba twakoresha na mobile money. Niba uvuze uti njye ndashaka ubwishingizi bw’ubuzima bwanjye, ukavuga uti nzajya ntanga igihumbi ku kwezi, uramutse ugize ikibazo dufata ya mafaranga tukakwishyura miliyoni, iyo usanzwe utanga ibihumbi bibiri ni miliyoni ebyiri, gutyo, uramutse ugize urupfu rw’ikirago rwo dukuba inshuro 200.”

“Ikindi cyiza ni uko dutekereza na nyakabyizi, usanga umuntu afite ubwishingizi yarwara bakamuvuza, ariko iyo uri mu bitaro barakuvuza gusa, twe yayandi watangaga buri kwezi tuyaguha buri munsi, niba watangaga ibihumbi bitanu turayaguha, urumva ko ari byiza.”

Hashyizweho ikarita idasanzwe

Amb. Habineza yavuze ko ubu bashyizeho ikarita yiswe ‘Turi Kumwe’, nyuma yo gutekereza bagasanga hari abantu badafata umwanya ngo bajye kugura ubwishingizi kuko wenda babyibagiwe.

Ati “Ariko hari ibintu usanga umuntu akora buri munsi nk’aho ajya kurira, guhahira, kugura lisansi n’ahandi, ubu twatangiriye kuri sitasiyo za lisansi za Merez, niba ufite ikinyabiziga ukajya ahantu hari Radiant, uravuga uti mumpe iyi karita, nufata ikarita ugashyiraho bya byuma bikayisoma ukishyura lisansi bisanzwe, iyo wishyuye hahita havamo ubwishingizi bw’ubuzima nta yandi mafaranga utanze."

“Niba unyoye lisansi ya litiro 20 ku kwezi, urahita ubona bwa bwishingizi, ikintu ukora urajya kuri Radiant uvuge uti nsanzwe nywa ibihumbi 100 ku kwezi, noneho kuri ya karita ayo mafaranga ajye agenda avaho ari nako n’ubwishingizi burimo kumutangirwa. Abanyarwanda bose turashaka ko bagira ubwishingizi muri Radiant Yacu.”

Ovia Tuhirwe Kamanzi ushinzwe ubucuruzi muri Radiant, avuga ko kugeza ubu bafite amashami 70 mu gihugu, bakaba barakoze uko bashoboye ku buryo umukiliya atamara umwanya ajya gushakisha aho baherereye.

Mutoni Diogene umaze imyaka 11 atwara moto, avuga ko yahisemo Radiant kubera ko ari sosiyete itaruhanya mu kwishyura uwagize ikibazo.

Yagize ati “ Kuva mu 2015 mba muri Radiant, nagiyemo mu 2015 kuko ikora neza mu bwishingizi kandi igoboka abantu, ndasaba abamotari bose kujya muri Radiant kuko iyo kuko umuntu agize ikibazo iramufasha mu buryo bwihuse.”

Radiant yashimiye abakiliya bayo bakomeje kuyigirira icyizere
Abakozi ba Radiant basabanye n'abakiliya bayo
Bishimiye umwaka mushya wa 2020 batangiranye na Radiant
Radiant yifurije abakiliya bayo umwaka mushya muhire
Radiant yateguriye ibirori abakiliya bakorana nayo kuva mu myaka itandatu ishize
Umuyobozi Mukuru wa Radiant, Marc Rugenera, akatana umutsima n'abakiliya
Rugenera yashimiye abakiliya ba Radiant bakomeje kuyigirira icyizere
Umuyobozi Mukuru wa Radiant Yacu, Joseph Habineza, agaragaza ikarita izajya ifasha abantu kwishyura ubwishingizi

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza