Ibigo byo kubitsa no kuguriza bigiye gukora ubushakashatsi ku mpamvu zitera inguzanyo ibi bigo bitanga ntizikoreshwe neza ndetse zimwe ntizigaruzwe n’ibi bigo by’imari biba byazitanze.

Ubu bushakashatsi buje mu gihe urwego rw’amabanki n’ibigo by’imari rwibasiwe n’inguzanyo zitagaruka zikomeje kwiyongera.

Abashaka serivisi z'amabanki (Photo the NewTimes)

Imibare igaragaza ko umubare w’inguzanyo zikoreshwa nabi wazamutse ukava kuri 6.8% ukagera kuri 7.7% hagati y’Ukuboza kwa 2013 na Nzeri ya 2014.

Inkuru ya The New Times ivuga ko umuyobozi mu ihuriro ry’ibigo by’imari bito n’ibiciriritse mu Rwnda (AMIR), Rwema Peter, yatangaje ko ubu bushakashatsi buzagira uruhare mu gucukumbura impamvu itera imikoreshereze mibi y’inguzanyo zitangwa, nk’imwe mu mbogamizi ikomereye iterambere ry’urwego rw’ibigo by’imari mu Rwanda.

Uyu mugabo avuga ko iyi nyigo izahishura igituma inguzanyo zimwe na zimwe zitangwa ziba igihombo, hagashyirwaho uburyo buboneye bwo guhangana n’iki kibazo.

Yagize ati “Dukeneye kugira imyanzuro ishingiye ku bimenyetso n’ubunararibonye, ku buryo duhangana n’iki kibazo mu buryo burambye. Twiteguye kubona ibizava muri ubu bushakashatsi vuba, tukabiheraho dufata imyanzuro.”

Usibye kureba impamvu zitera inguzanyo kubera igihombo abazihawe n’abazitanze, ngo ubu bushakashatsi buzanagaragaza ingaruka inguzanyo zitagaruka zigira ku bigo by’imari.

Muri yi minsi mike ishize, inzobere mu by’amabanki zari zagiriye inama ibi bigo by’imari gukora igenzura rihoraho ry’inguzanyo bitanga.

Ibigo by’imari biciriritse bigera kuri 493, birimo birimo 480 by’amakoperative yo kubitsa no kuguriza nabyo byiganjemo banki za Umurenge Saccos zigera kuri 416 zitanga serivisi ku baturage barenga miliyoni 1 n’ibihumbi 800.