00:00:00 IGIHE NETWORK KN KINYARWANDA EN ENGLISH FR FRANCAIS

Abanyarwanda baba muri Mozambique bahaye RSSB asaga miliyoni 20Frw zizafasha kwishyurira abatishoboye Mituweli

Yanditswe na Igizeneza Jean Désiré
Kuya 4 April 2023 saa 09:00
Yasuwe :

Abanyarwanda baba muri Mozambique bateye inkunga Ikigega cy’Ubwisungane mu kwivuza, ya miliyoni zirenga 20Frw, azifashishwa mu gutangira Mituweli imiryango itishoboye yo mu bice bitandukanye by’igihugu.

Ni inkunga yashyikirijwe Urwego rw’Ubwiteganyirize mu Rwanda, RSSB kuri uyu wa 03 Mata 2023, mu muhango witabiriwe n’Umuyobozi Mukuru wa RSSB, Rugemanshuro Regis, Ambasaderi w’u Rwanda muri icyo gihugu, Claude Nikobisanzwe n’abandi.

Yakusanyijwe mu gihe cy’amezi abiri gusa, binyuze muri gahunda abo Banyarwanda bihaye yo kuzajya bakusanya amafaranga ajyanye n’uko bacuruje (cyane ko abenshi baba muri icyo gihugu ari abacuruzi), bakayafashisha Abanyarwanda mu nguni zinyuranye.

Yatanzwe n’abari hagati ya 300-400, Ambasaderi w’u Rwanda muri Mozambique, Claude Nikobisanzwe akavuga ko bazakomeza gushishikariza abandi kwinjira muri iyo gahunda ku buryo mu bihe bizaza bazanarenza ayatanzwe uyu munsi.

Ati “Abanyarwanda baba muri Mozambique bari hagati y’ibihumbi bitanu n’icumi. Bazi neza ko igihugu kizatezwa imbere n’amaboko yacu twese. Uretse n’ibyo bari kwishyira hamwe ngo barebe imishinga batangiza yakomeza guteza imbere Abanyarwanda mu buryo bumwe cyangwa ubundi.”

Ambasaderi Nikobisanzwe yanerekanye ko nubwo abenshi muri abo Banyarwanda bakorera amafaranga nta buryo bw’ubwiteganyirize bafite.

Ati “niyo mpamvu twavuganye n’abayobozi ba RSSB ku gushaka uburyo bwakoreshwa ngo nabo bace akabando k’iminsi hakibona n’ababakomokaho bazabeho neza.”

Umuyobozi Mukuru wa RSSB, Rugemanshuro Regis, yavuze ko ubushobozi bw’abanyarwanda bugenda bwiyongera umunsi ku wundi, atangaza ko inkunga yatanzwe izafasha bamwe mu bacyunganirwa na Leta.

Ati “Dukorana n’inzego zitandukanye zirimo Minisiteri y’Ubuzima, Iy’Ubutegetsi bw’Igihugu aho twicarana tukareba ababukeneye (ubufasha) by’ukuri. Ntabwo tuzatekereza akarere kamwe gusa ahubwo tuzareba ku Banyarwanda bose bashobora kuba bakeneye guterwa ingabo mu bitugu.”

Rugemanshuro yavuze ko ku bufatanye na Minisiteri y’Ububanyi n’Amahanga, mu minsi iri imbere bari gutegura ibiganiro mu bihugu bitandukanye bizaganirirwamo uko Abanyarwanda baba mu mahanga bakwitabira serivisi z’iki kigo zirimo Ejoheza, guteganyiriza iza bukuru, ishoramari n’izindi.

Yongeyeho ko bari gutegura n’uburyo bw’ikoranabuhanga ryorohereza Umunyarwanda aho ari ho hose kuzimenya n’ibyiza bizirimo, bikazafatanywa no gukorana na za Ambasade z’u Rwanda mu bihugu bitandukanye ku kwitabira izo gahunda.

Kuri ubu imibare ya RSSB y’abamaze kwitabira gahunda y’ubwisungane mu kwivuza igaragaza ko bageze kuri 89.8%, umubare wa mbere ugezweho muri iki gihe ugereranyije n’imyaka yabanje.

Rugemanshuro agakomeza ati “Twizeye ko mu Kamena tuzaba twarageze kuri 90%. Turashimira Abanyarwanda bamaze kumva ko indwara zidateguza, bakumva neza gahunda ziba zarashyizweho na Leta, zigambiriye ko bagira ubuzima bwiza.”

Mu rwego rwo konoza serivisi z’ubuvuzi RSSB yatangije kandi uburyo bushya bw’ikoranabuhanga bwiswe ‘‘RSSB Kwivuza’’ (Intelligent Health Benefits System) buzafasha ku ikubitiro amavuriro y’ibanze n’Ibigo nderabuzima kujya byishyurwa serivisi byahaye abanyamuryango mu gihe gito.

Ni uburyo buzagabanya igihe byafataga ivuriro mu gutegura inyemezabwishyu, n’igihe RSSB yamaraga mu kuzisuzuma no kuzishyura, kuko yashyizwemo amakuru yose akenewe ajyanye na serivisi ikigo nderabuzima cyangwa ivuriro ry’ibanze (health post) byahaye umunyamuryango wa Mituweli.

Ambasaderi w'u Rwanda muri Mozambique, Claude Nikobisanzwe yagaragaje ko Abanyarwanda baba muri icyo gihugu barajwe ishinga no kugira uruhare mu iterambere ry'igihugu cyabo
Alexis Nyamwasa (wambaye ikoti) ndetse na mugenzi we Nsengiyumva ni Abanyarwanda bakorera ibikorwa by'ubucuruzi muri Mozambique
Ubwo Ambasaderi w'u Rwanda muri Mozambique, Claude Nikobisanzwe yasinyaga kuri sheki y'amafaranga yatanzwe n'Abanyarwanda baba muri Mozambique
Umuyobozi Mukuru wa RSSB, Rugemanshuro Regis nawe yashyikirije Ambasaderi w'u Rwanda muri Mozambique, Claude Nikobisanzwe impano
Umuyobozi Mukuru wa RSSB, Rugemanshuro Regis yagaragaje ko iki kigo ayoboye gifite gahunda zitandukanye zigamije gufata neza abanyamuryango
Umuyobozi Mukuru wungirije wa RSSB, Louise Kanyonga nawe yari yitabiriye umuhango wo kwakira inkunga yaturutse ku Banyarwanda baba muri Mozambique
Umuyobozi ushinzwe ishoramari muri RSSB, Philippe Watrin nawe yari yitabiriye umuhango wo kwakira inkunga yatanzwe n'Abanyarwanda baba muri Mozambique
Umuyobozi Mukuru w'Itsinda rishinzwe ibijyanye n'Ubushakashatsi muri RSSB, Bonaparte Ruhamya Byuma nawe yari yitabiriye
Abakozi ba RSSB bageneye impano itsinda ry'Abanywarwanda baba muri Mozambique

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .