Umusaruro w’urubuga rwagenewe gufasha ba rwiyemezamirimo bato guhangana n’ingaruka za Coronavirus

Yanditswe na Ndahayo Emmanuel
Kuya 7 Kanama 2020 saa 11:52
Yasuwe :
0 0

Ba rwiyemezamirimo bato n’abaciriritse bari mu ba mbere bagizweho ingaruka zikakaye n’ingamba zo guhangana na Coronavirus, zirimo gahunda nka Guma mu Rugo yatumye ubucuruzi bwinshi buhagarara.

Mu bushakashatsi bwakozwe na Business Professionals Network (BPN) ku bufatanye na Kaminuza y’u Rwanda (UR), bwagaragaje ko 57.5% by’ibigo bito n’ibiciriritse (SMEs) byahungabanyijwe ku buryo bufatika n’ingaruka za Coronavirus ndetse byinshi muri ibi bikaba byarahagaritse ibikorwa byabyo.

Ni mu gihe ibigo bito n’ibiciriritse (SMEs) ari ingenzi cyane ku bukungu bw’u Rwanda, kuko bigize hejuru ya 90% by’ibigo by’ubucuruzi bwose buri mu gihugu, bikanatanga imirimo igera kuri 41%.

Kuba ibyo bigo byinshi byaragizweho ingaruka na Coronavirus, byanagize ingaruka ku bari bafitemo imirimo, kuko ku kigereranyo cy’ubushakashatsi, ibigo byari bifite abakozi 35 mbere ya Coronavirus, kuri ubu bisigaranye abakozi 16 gusa.

Mu rwego rwo gufasha ibi bigo bikizamuka guhangana na Coronavirus, umuryango SME Response Clinic, ku bufatanye na African Management Institute (AMI) batangije gahunda yo gutanga amasomo agamije gusobanurira ibigo bito n’ibiciriritse uburyo byarushaho guhangana n’ingaruka z’iki cyorezo.

Aya masomo yatangiye mu Gicurasi uyu mwaka, neza neza igihe ingaruka za Coronavirus zari zigishaririye cyane kurusha ibindi bihe.

Aya masomo atangwa hifashishijwe ikorabuhanga mu rwego rwo kwirinda ikwirakwira rya Coronavirus. Azatangirwa ubuntu ku bashoramari bose bafite ubucuruzi buto n’ubuciriritse.

Amasomo atangwa ari mu byiciro bibiri, hari amasomo yo gusesengura umutungo uzakoreshwa no gusesengura ibiciro. Aya masomo yibanda cyane ku kurebera hamwe uburyo ibigo byarushaho gucunga neza umutungo bifite ndetse n’uburyo byakora igenanamigambi rizatuma bihangana n’ibibazo bizasigwa na Coronavirus.

Andi masoma azatangwa kuri uyu wa 11 Kanama, akazibanda ku buryo ibigo bito n’ibiciritse byakongera kugaruka ku murimo, ariko noneho n’uburyo byarushaho gusanisha imikorere yabyo n’imiterere y’isoko rya nyuma ya Coronavirus, aho benshi bemeza ko rizaba ritandukanye n’uko ryari risanzwe muri ibi bihe.

Kuva aya masomo yatangira gutangwa muri Gicurasi, SME Response Clinic yageze ku bashoramari bato n’abaciriritse bari hagati ya 140,000 na 170,000 mu gihugu hose. Abagera kuri miliyoni enye na bo bakurikiranye aya masomo mu bihe bitandukanye.

Aya masomo atangwa mu ndimi ebyiri, Icyongereza n’Ikinyarwanda, akitabirwa na ba rwiyemezamirino bo mu nzego zose.

Nyuma y’amasomo, SME Response Clinic itanga ubundi bufasha butuma abize amasomo bashobora no kwimenyereza ibyo bize kugira ngo koko bazayakoreshe neza mu mikorere y’ibigo byabo.

Ubwo bufasha bumara ibyumweru bibiri, bukaba butangirwa ubuntu.

SME Response Clinic kandi inafasha ba rwiyemezamirimo bahuguwe kumenyana, bakungurana ibitekerezo kandi bakagirana inama mu rwego rwo gufashanya gucyemura ibibazo bahura na byo mu kazi kabo ka buri munsi.

Usibye gutanga amasomo no guhugura ba rwiyemezamirimo, SME Response Clinic ikorera ubuvugizi ba rwiyemezamirimo mu bigo bitandukanye birimo n’iby’imari, ku buryo uwitabiriye amahugurwa ashobora no guhuzwa n’ibigo by’imari n’abandi baterankunga, akabona ubushobozi bwo gushyigikira ibikorwa bye.

Ku bifuza gukurikirana aya masomo no kumenya amakuru yose ajyanye n’ingaruka Coronavirus izagira ku bucuruzi, mushobora kwifashisha uru rubuga: https://smeresponse.clinic/

Umuryango SME Response Clinic, ku bufatanye na African Management Institute (AMI) batangije gahunda yo gutanga amasomo agamije gusobanurira ibigo bito n’ibiciriritse uburyo byarushaho guhangana n’ingaruka z’icyorezo cya coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .