Mu gihe Akarere ka Musanze kagaragaza iterambere mu myubakire n’ubucuruzi, COGEBANQUE yahaye benshi mu bakiriya bayo konti yo kuzigama ya "Iyubakire" ituma babasha kugira inzu zabo.

Nsengiyumva Daniel, Umuyobozi wa COGEBANQUE ishami rya Musanze avuga ko baganiriza abakiriya babo kuri konti zo kwizigama zigira inyungu, bakabereka uko bashobora gutangira babitsa amafaranga make bakabona uko baka inguzanyo.

Yagize ati“Kwizigama ntibisaba amafaranga menshi, iyo ubitsa buri kwezi ibihumbi 15 nyuma y’imyaka itatu uba ushobora gusaba inguzanyo yo kwiyubakira inzu, “Iyubakire”.

Konti yo kuzigama ya Iyubakire, umukiriya wa COGEBANQUE abitsa nibura 15,000 Rwf buri kwezi nyuma akazabona inguzanyo y’inzu ku nyungu ntoya.

Nsengiyumva avuga ko umuco wo kwizigama abatuye muri aka gace k’Amajyaruguru batarawumva neza.

Uretse iyo konti ya Iyubakire, , abandi bashora imari kubera baciye muri konti ya Shobora. Iyi yo ifasha umukiriya abitsa ibihumbi 10 buri kwezi nyuma akabona inguzanyo y’umushinga ku nyungu nto. Iyi konti ifasha abacuruzi n’abakora ubucuruzi buciritse.

Nsengiyumva avuga ko nyuma yo kwiga ku mushinga w’umukiriya wabo bakomeza kumuba hafi bamugira inama.

COGEBANQUE ishami rya Musanze ryatangiye gukora kuva mu 1999 riri hafi ya gare ya Musanze. Rikora cyane ryegera abakiriya baryo, aho riri muri banki ebyiri za mbere ku isoko ry’amabanki mu mujyi wa Musanze (market share).

Muri tombola iba iyo abasiganwa bashoje, umukiriya wa COGEBANQUE watomboye igare ni Nkeramihigo Richard Pontien wari umaze amezi arindwi afunguye konti aho akoresha na konti yo kwizigama ya "Iyubakire".

COGEBANQUE nk’umuterankunga wa Tour du Rwanda bahemba umukinnyi witwaye neza ahazamuka. Igihembo cyo kuva i Rwamagana kugera i Musanze cyegukanywe n’Umunya Eritrea Mekseb Debesay.

COGEBANQUE yahawe na Banki Nkuru y’igihugu uburenganzira bwo gukora nka Banki y’ubucuruzi kuva tarik ya 17 Nyakanga 1999. Ifite amashami 19 mu gihugu kandi arakorana mu gihugu mu buryo bw’ikoranabuhanga.