Muhanga: BDF yafashije urubyiruko gutangiza umushinga wunguka ibihumbi 30 ku munsi

Yanditswe na Prudence Kwizera
Kuya 8 Mutarama 2020 saa 06:31
Yasuwe :
0 0

Urubyiruko 10 rwo mu Karere ka Muhanga ruvuga ko Ikigega cy’Ingwate BDF (Business Development Fund) cyarufashije gushyira mu bikorwa umushinga warwo wo gutunganya umusatsi, uruha inyungu y’amafaranga agera ku bihumbi 30 Frw ku munsi.

Urwo rubyiruko rugizwe n’abahungu batanu n’abakobwa batanu rwishyize hamwe nyuma yo kumara umwaka wose rwiga umwuga wo gutunganya imisatsi mu Ishuri ry’Imyuga rya Gahogo TVT School.

Rwashinze Sosiyete yitwa Beauty in the Sky Ltd ari nayo rukoreramo ibyo bikorwa byarwo.

Umuyobozi wa Beauty in the Sky Ltd, Habihirwe Habis, avuga ko bakirangiza kwiga biyemeje kujyana umushinga wabo muri BDF, ibafasha kuwunoza no kubona inguzanyo mu Murenge Sacco.

Ati “BDF yadufashije kubona miliyoni eshanu z’amafaranga y’u Rwanda ariko harimo ibikoresho byo muri salon bya miliyoni enye na miliyoni imwe baduhaye ku ruhande tuyikoresha mu gukodesha inzu n’ibindi.”

Bimwe mu bikoresho baguze bigezweho harimo intebe, indorerwamo, amatara, casques, imashini zogosha n’ibindi bitandukanye bifashisha mu kogosha no gutunganya umusatsi. Bakorera mu nzu nziza bakodesha ibihumbi 200 Frw ku kwezi iri rwagati mu Mujyi wa Muhanga.

Muri ayo mafaranga miliyoni eshanu bahawe bazishyuramo 50% kandi bazatangirana n’uku kwezi kwa Mutarama 2020 kuko umushinga wabo watangiye kunguka.

Habihirwe avuga ko mu mezi atatu bamaze batangiye uwo mushinga, batangiye kubona inyungu ifatika kandi batanze akazi gahoraho ku bantu batanu.

Ati “Iyo umunsi wagenze neza dushobora kubona inyungu y’amafaranga ibihumbi 30 Frw twamaze guhemba abakozi bose; urumva ko ari umushinga mwiza.”

Umwe mu bagize iyo sosiyete, Umutesi Agnes, avuga ko bishimira ko umushinga wabo babashije kuwushyira mu bikorwa kandi ukomeje gutera imbere.

Ati “Intego twihaye mbona igenda igerwaho kuko turakora inyungu ikaboneka.”

Umutesi agira inama urubyiruko by’umwihariko abakobwa gutinyuka bagakora kuko nabo bashoboye.

Umukozi wa BDF mu Karere ka Muhanga, Murigande Félix, yavuze ko urubyiruko rwo muri Beauty in the Sky Ltd rufite umushinga mwiza kandi ruwushyira mu bikorwa uko bikwiye.

Murigande yavuze ko mu 2019 honyine bafashije abantu bagera ku 150 kubona ibikoresho byo gutangiza imishinga yabo. Bazishyura 50% by’ayo bahawe.

Naho abo bishingiye mu 2019 mu bigo by’imari kugira ngo bahabwe inguzanyo ni abantu 126.

Yasabye n’abandi bafite imishinga bifuza gushyira mu bikorwa kugana BDF ikabagira inama ikabafasha no kubona inguzanyo.

Ikigega BDF cyashinzwe mu 2011 na Banki y’u Rwanda Itsura Amajyambere, BRD.

By’umwihariko BDF iha amahirwe abagore n’urubyiruko kurusha abandi, kuko ni bo bahabwa ubufasha bwo kubemerera kubishingira nk’ingwate ku kigero cya 75%, mu gihe abagabo bo bemererwa kwishingirwa ku kigero cya 50%.

Umushinga wabo ni uwo kogosha no gutunganya umusatsi
Bashinze sosiyete yitwa Beauty in the Sky Ltd nyuma yo kumara umwaka biga kogosha no gutunganya umusatsi
Bimwe mu bikoresho baguze bigezweho harimo intebe, indorerwamo, amatara n'ibindi
Bimwe mu bikoresho bifashisha mu gutunganya umusatsi
Umutesi Agnes avuga ko bishimira ko umushinga wabo babashije kuwushyira mu bikorwa kandi ukomeje gutera imbere
Umuyobozi wa Beauty in the Sky Ltd, Habihirwe Habis, avuga ko umushinga wabo watangiye kubaha inyungu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .