MTN yashyize ku isoko ‘Ikosora’, telefoni izorohereza buri wese gukoresha Internet

Yanditswe na Mukaneza M.Ange
Kuya 5 Werurwe 2019 saa 02:01
Yasuwe :
0 0

Sosiyete y’itumanaho ya MTN Rwanda, yashyize ku isoko telefoni ihendutse yise ‘Ikosora’, izatuma Abanyarwanda n’abaturarwanda boroherwa no gukoresha Internet.

‘Ikosora’ yashyizwe ku isoko kuri uyu wa 5 Werurwe 2019, ikoreshwa na porogaramu ya KaiOS, ifite ubushobozi bwo kwakira Internet ya 3G. Izajya igurishwa 19 800Frw gusa.

Umuyobozi ushinzwe Imari muri MTN, Lily Zondo, yavuze ko iyi telefoni ije gukuraho imbogamizi zatumaga benshi batitabira gukoresha Internet.

Ati “ Kuri MTN uyu ni umwanya twari tumaze igihe dutegereje, kugira ngo tubashe guhuza abakiliya bacu ku murongo wa Internet. Hamwe na Ikosora turizera kubigeraho abakiliya bacu bose bakabasha kuryoherwa na Internet yacu yihuta cyane”.

Umuyobozi ushinzwe Iyamamazabikorwa muri MTN, Richard Acheampong, yavuze ko ‘Ikosora’ ishyizwe ku isoko nyuma y’uko umwaka ushize bashoye asaga miliyoni 20 z’amadolari mu kwagura umuyoboro wa Internet, ibikorwa byatumye umuvuduko wayo wikuba inshuro eshatu.

Yakomeje avuga ko impamvu bakomeje gukora iri shoramari ari uko intumbero ya MTN Rwanda ari ukugeza ibyiza kuri buri wese, aho aherereye hose hirya no hino mu gihugu.

Umuyobozi ushinzwe imenyekanishabikorwa muri MTN Rwanda, Ruhinguka Désiré, yavuze ko kuri ubu abantu bakoreshaga Internet ya 2G bashobora gukoresha 3G bitewe n’ishoramari ryakozwe, iyi telefoni nshya yitwa ‘Ikosora’ ikaba ije gukemura imbogamizi y’igiciro.

Ati “ Kugira ngo umuntu agure ‘smartphone’ byasabaga nibura amafaranga ari hagati y’ibihumbi 30-40Frw. Iyi telefoni ya ‘Ikosora’ ije kugira ngo yunganire ibikorwa twari tumazemo igihe kandi inarangize ikibazo kijyanye n’ubushobozi bwo kugura ‘smartphone’.”

Ikosora iri muri telefoni za mbere zisanzwe (feature phone) zifite ubushobozi bwo kwakira Internet ya 3G zigeze mu Rwanda ishobora gukoresha imbuga nkoranyambaga zirimo Whatsapp, Facebook, Twitter na Youtube.

Inafite kandi ikoranabuhanga rituma ishobora kwakira Internet itagira umugozi (WIFI) no kuba wayisangiza abandi (mobile tethering) kandi ikagira Bluetooth.

Uyiguze ahabwa 1GB buri kwezi mu gihe cy’amezi atatu, n’inyongera ya 50% bya ‘bundle’ ya Internet waguze. MTN Rwanda iteganya ko uyu mwaka uzarangira imaze gushyira ku isoko telefoni ibihumbi 200 za ‘Ikosora’.

Bamwe mu banyamakuru bitabiriye kumenyekanisha iyi nkuru nziza bahembwe 'Ikosora'
Bamwe mu bayobozi ba MTN Rwanda bafata selfie bakoresheje 'Ikosora'
Ikosora ifite ubushobozi bwo gufata amafoto akeye
MTN Rwanda yashyize ku isoko telefoni yise 'Ikosora' ikora ibikorwa byinshi byari bimenyerewe kuri smartphone
Ni ibyishimo ku bakozi ba MTN Rwanda bahamya ko ubu Abanyarwanda bose bagiye koroherwa no gukoresha Internet
Umunyarwenya Kibonke nawe ntiyatanzwe gukoresha 'Ikosora'
Umuyobozi ushinzwe Imari muri MTN, Lily Zondo, yavuze ko iyi telefoni ije gukuraho imbogamizi zatumaga benshi batitabira gukoresha Internet
Umuyobozi ushinzwe imenyekanishabikorwa muri MTN Rwanda, Ruhinguka Désiré, yavuze ko kuri ubu abantu bakoreshaga Internet ya 2G bashobora gukoresha 3G

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza