00:00:00 IGIHE NETWORK KN KINYARWANDA EN ENGLISH FR FRANCAIS

Ibitwenge by’abahinzi ba “Chia Seeds” byarangiriye mu marira

Yanditswe na Hakizimana Jean Paul, Kanamugire Emmanuel
Kuya 17 Ugushyingo 2022 saa 06:39
Yasuwe :

Nta gihe kirekire kirashira abahinzi bo mu Ntara y’Iburasirazuba bayobotse igihingwa gishya cyiswe ‘Imbwiso’ (Chia Seeds) cyasamiwe hejuru bitewe n’amakuru y’uko gishobora gukungahaza uwagihinze mu gihe gito.

Iki gihingwa cyatangiye guhingwa mu Rwanda ahagana mu 2018 mu mirenge imwe n’imwe y’Akarere ka Ngoma mu Ntara y’Iburasirazuba.

Amakuru avuga ko gikomoka mu Majyepfo ya Mexique. Imbuto zacyo ziteye nka Sesame, kikerera amezi atatu. Ikilo cy’imbuto cyaguraga ibihumbi 90 Frw kigaterwa kuri hegitari imwe, umuhinzi akagurirwa ku 3000 Frw ku kilo.

Umusaruro wagurwaga na sosiyete yitwa Akens and Kernels Ltd ariko nyuma y’igihe gito batangiye kumwenyura kubera ifaranga bakirigitaga [nk’uko babitangagamo ubuhamya], kuri ubu abahinzi bararira ayo kwarika. Umusaruro bagemuriye iyi sosiyete yananiwe kuwishyura ndetse babuze aho berekeza uwo basaruye nyuma.

Umuhinzi wo mu Murenge wa Rurenge mu Karere ka Ngoma utashatse ko amazina ye atangazwa, yabwiye IGIHE ko aberewemo umwenda ugera ku bihumbi 880 Frw ku musaruro yatanze mu gihembwe cy’ihinga cyarangiye muri Mutarama na Gashyantare uyu mwaka mu gihe urenga toni waheze mu bubiko kubera kubura isoko.

Mugenzi we wo mu Murenge wa Remera wari wahinze hegitari ebyiri akaba atarishyurwa agera kuri miliyoni 3 Frw, yavuze ko byamugizeho ingaruka zikomeye zirimo kuba abana be barabuze amafaranga y’ishuri, kubura ubwishyu bw’inguzanyo yafashe mu matsinda no kwicwa n’inzara kuko ubutaka bwose yabuhinzeho chia seed.

Umuyobozi w’imwe muri Koperative y’abahinzi ba Chia Seeds, mu Karere ka Ngoma, Habiyakare Stanislas, yavuze ko bagombaga kugurisha toni 450 muri iki gihembwe cy’ihinga ariko nta n’ikilo na kimwe baguriwe.

Iki kibazo cyiyongera ku kindi gikomeye cy’umwenda baberewemo na Akens and Kernels Ltd w’umwaka ushize ungana na miliyoni 248 Frw. Iyo koperative ngo ifite abanyamuryango 558 ariko abafitiwe ideni batishyuwe ni 195.

Ati “Uyu ni wo mwenda tubishyuza. Twarahombye birenze urugero kubera ko abahinzi barimo abakennye cyane. Twari twarasezeranye n’iyi sosiyete ko bazajya batugurira kuri 3000 Frw ku kilo ariko haje abamamyi bakishyura abaturage hagati ya 500 Frw na 800 Frw; urumva igihombo abaturage bahuye na cyo. Turifuza ko babanza bakatwishyura ayo mafaranga kugira ngo abaturage bave mu bukene n’inzara.”

Ikibazo kizagira ingaruka z’igihe kirekire

Nsengiyumva yavuze ko iki kibazo cyagize ingaruka zitandukanye zirimo ko kuri bamwe imitungo yabo yaratangiye gutezwa cyamunara kubera kubura ubwishyu bw’inguzanyo bafashe, ingo zasenyutse, ibibazo byo mu mutwe n’ibindi.

Igihingwa cya Chia Seeds abahinzi bagisamiye hejuru ariko inyungu bari biteze yabaye iy'akanya gato

Hari ikindi gikomeye cy’uko bakimara kumva amakuru y’inyungu bazakura muri Chia Seeds bahise bahagarika guhinga indi myaka, ubutaka bwabo barabuhindura kubera ko kigomba guhingwa ku butaka butarimo ifumbire mvaruganda.

Ati “Chia Seeds isobanurwa byagaragaraga ko ari igihingwa gituma umuntu aba umukire, atari uguhinga ngo abeho gusa. Abantu bashamadukiye ubwo buhinzi; ubu ntibahinze indi myaka mu gihembwe cya 2022B.”

“Umusaruro babonye mu gihembe cya 2022A uracyahunitse mu nzu zabo. Habaye ikibazo cy’ubukene bukabije buturutse kuri iki gihingwa kubera ko umusaruro ntiwakuwe mu bubiko n’uwo bagemuye mbere ntiwishyuwe n’ubutaka bahingagaho babugize ‘organic’; nta kindi gihingwa gishya bigeze bahinga.”

Yakomeje agira ati “Ibyo birakururira abaturage basaga ibihumbi 35 bashamikiye ku masezerano 3000 bari buze guhura n’inzara mu gihe cy’indi myaka ikurikiyeho kuko nta handi bazahinga, nta bushobozi bw’amafaranga bafite kuko batishyuwe aya mbere.”

Umusaruro utaragurwa ngo urenga toni 5000 ubarirwa amafaranga akabakaba miliyari 13 z’amafaranga y’u Rwanda.

Abahinzi ntibavuga rumwe na Akens and Kernels Ltd ku mwenda baberewemo

Perezida wa Komite y’abahinzi ba Chia Seeds ku rwego rw’igihugu, Nsengiyumva Emmy, yavuze ko mu biganiro by’ubuhuza bagiranye n’iyi sosiyete yabaguriraga umusaruro muri Nzeri uyu mwaka, yemera umwenda wa miliyari 13 z’amafaranga y’u Rwanda.

Ngo yavuze ko ifite ubushobozi bwo kwishyura umusaruro w’igihembwe kimwe, ni ukuvuga igihembwe cy’ihinga 2022A cyarangiye muri Mata na cyo ikacyishyuraho ¼ cy’amafaranga ibereyemo abahinzi. Nyamara yagaragarije inzego zinjiye mu buhuza nyuma ko ifite umusaruro wavamo miliyari zirenga 16 Frw.

Ni mu gihe abahinzi bavugaga ko baberewemo miliyari 18 Frw nubwo yagiye yiyongera akaba amaze kurenga miliyari 21,5 Frw nk’uko Nsengiyumva yakomeje abisobanura.

Ati “Twagaragaje imibare itari iya nyayo kuko iki kibazo gihuriwemo n’abantu b’ingeri eshatu; hari abari hanze y’igihugu bashyize amafaranga muri iki gihingwa; hari abakozi ba leta bari mu butumwa bw’akazi hanze y’igihugu bari batarabona amakuru. N’ubu imibare difite ntabwo ari yo ya nyayo hari abandi babona amakuru bakazana amasezerano yabo. Ni ubwo buryo imibare yagiye izamuka ubu tugeze kuri 21. 545. 000. 0000 Frw.”

Yavuze ko mu nama yahuje iyi sosiyete na Minaloc, Minagri n’izindi nzego ku wa 18 ukwezi gushize, Akens and Kernels yagiriwe inama yo gushaka aho ikura amafaranga yo kwishyura abaturage.

Umuzi w’ibibazo ni uwuhe?

IGIHE yashatse kuvugana n’ubuyobozi bwa Akens and Kernels Ltd ariko ntibyakunda.

Umuyobozi ushinzwe imari muri Akens and Kernels Ltd, Yves Ndayisenga yabwiye Newtimes ko bahuye n’ikibazo cyo kubura icyangombwa cyo kohereza umusaruro ku isoko bidindiza ibikorwa amezi agera ku icyenda.

Muri icyo gihe byabaye ngombwa ko bagurisha umusaruro ku giciro gito kubera igitutu cy’abahinzi basaba kwishyurwa.

Mu gihe ubusanzwe ikilo kimwe cya Chia Seeds cyagurishwaga ku madolari ari hagati y’ane n’arindwi ku isoko mpuzamahanga, iyi sosiyete yakigurishije ku madolari 2,8 ku isoko ry’i Dubai.

Abasesengura iby’iki kibazo bavuga ko itagombye kuba yaratangiye guhingisha itarabona icyangombwa cyo kujyana umusaruro ku isoko cyane ko cyari igihingwa gishya kizanakenera isoko ryo hanze y’igihugu.

Kuba yaratangiye gushaka ibyangombwa imaze kugira umusaruro ugera kuri toni 3000 mu bubiko byatumye amafaranga abaturage bashoboye Akens itigeze igira ayo ishyiramo ayibana menshi inanirwa kubicunga.

Intambwe y’ubuhuza ntiyatanze umusaruro

Hagati y’umwaka wa 2018 na 2020 ngo abahinzi bishyurwaga neza.

Ibirarane bitangiye kuba byinshi abahagarariye abahinzi batangiye ubuhuza na Akens and Kernels Ltd ndetse bagira ibyo bemeranyaho birimo ko abahinzi bagomba kwishyurwa ibihembwe byose byarangiye badasabye inyungu z’ubukererwe uretse ku batarabashije guhingirwa kubera ko bari bagitegura ubutaka.

Ibiganiro byabaye ku ya 9 Nzeri uyu mwaka, ubuyobozi bw’iyi sosiyete bwiyemeje gutangira kwishyura ku ya 1 Ugushyingo 2022.

Nyuma abahinzi basabye ibaruwa igaragaza ibyo Akens and Kernels Ltd yiyemeje ntibayihawe ahubwo babwiwe ko hari undi munyamigabane ugiye kuzamo bityo ko ntacyo bakora atabimenyeshejwe.

Nyuma baje guhurira mu nama ariko uwitwaga umunyamigabane [Agro Processing Trust Corporation Ltd : APTC] basanga ikiri ku rwego rw’ibiganiro by’imikoranaire.

Ibiganiro by’abahinzi n’uwari umukiliya wabo binaniranye ni bwo bitabaje Minaloc mu Ukwakira bahurira mu nama yabereye kuri Minagri ku wa 18 Ukwakira.

Akenes and Kernels yasabwe kugaragaza raporo y’umutungo ikajyanwe
muri banki ku buryo leta yayishingira ikabona inguzanyo yo kwishyura umwenda ariko ngo nta gisubizo kiratangwa nk’uko Nsengiyumva yakomeje abisobanura.

Amakuru ahari ni uko hashize iminsi mike urwego ruhagarariye abahinzi ba Chia Seeds bagejeje ikibazo cyabo ku zindi nzego nkuru z’igihugu ariko ko hari itsinda ryashyizweho rikuriwe na Minisiteri y’Ubutegetsi bw’igihugu ngo rigikurikirane.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .