00:00:00 IGIHE NETWORK KN KINYARWANDA EN ENGLISH FR FRANCAIS

Equity Bank Rwanda PLC yatangiye guhugura ba rwiyemezamirimo baciriritse ku gucunga neza imari yabo

Yanditswe na Balinda Yvette
Kuya 2 Ukwakira 2022 saa 08:35
Yasuwe :

Rwiyemezamirimo bato bakorana na Equity Bank basoje amahugurwa y’iminsi icyenda aho bahuguwe uko bakora ubucuruzi bwabo mu buryo buboneye kinyamwuga mu rwego rwo guhangana n’ibibazo by’ibihombo bikunze kugaragara mu bucuruzi buciriritse.

Kuri uyu wa Gatanu abagera ku 158 bahagarariye ibigo by’ubucuruzi biciriritse mu mujyi wa Kigali no mu turere tubiri tw’Igihugu bahawe impamyabumenyi mu mahugurwa bamaze iminsi bahabwa na Equity Bank, bakaba barongerewe ubumenyi mu masomo atandukanye .

Amasomo bahawe yari arimo kwiga gutegura inyandiko yiteganyabikorwa (Business Plan), icungamari, imikoranire n’ibigo by’imari n’ uburyo bwo gukuza ibigo byabo.

Abahuguwe bavuga ko aya masomo yabunguye byinshi, bamenya ko batagomba kuvanga ubuzima bwabo ubw’ubucuruzi .

Uharariye abahuguwe Kamanzi Laurent ufite uruganda rukora amasabune n’amavuta, yavuze ko aya mahugurwa yaberetse ko Equity Bank ari umufatanyabikorwa ubumva kandi ubitayeho.

Yagize ati “Ubu kubera aya mahugurwa namenye ko ngomba gutandukanya ubuzima bwanjye bwite n’ubucuruzi. Ubundi nagiraga ikibazo ngafata amafaranga yavuye mu bucuruzi ariko batwigishije ko buri wese agomba kugira umushahara bikagabanya gufata amafaranga bya hato na hato. Equity Bank amasomo yaduhaye twari tuyacyeneye kandi azadufasha gukora kinyamwuga turusheho gutera imbere”.

Umuyobozi wa Equity Bank Rwanda PLC, Hannington Namara yabwiye abahuguwe ko bagomba gukora ubucuruzi bwabo mu buryo bunyuze mu mucyo bakurikiza amategeko kandi bajyana n’igihe.

Yagize ati “Ubucuruzi bwanyu bukwiye gukorwa mu buryo buboneye ndetse mugakurikiza n’amategeko. Ntabwo wategereza ko ubucuruzi bwawe bugera kure uhora uhanganye n’ikigo cy’imisoro, mukwiye gukora neza mu rwego rwo kurinda ahazaza h’ubucuruzi bwanyu, mukajyana n’aho ibihe bigeze mwifashisha ikorana buhanga ibi bizatuma n’ibigo by’imari bibagirira icyizere”.

Amahugurwa yagenewe ba rwiyemezamirimo bakorana na Equity Bank yabaye mu byiciro bitatu bakurikije uturere baturukamo. Kugeza ubu abamaze guhugurwa ni 158, ariko Equity Bank ifite intego yo kugeza aya mahugurwa mu turere dutandukanye tw’Igihugu.

Biteganyijwe ko ukwezi k’Ukwakira kuzarangira hamaze guhugurwa abagera kuri 600.

Aya mahugurwa yahawe ba rwiyemezamirimo baturutse mu mujyi wa Kigali, Rwamagana na Muhanga
Umuyobozi wa Equity Rwanda PLC, Hannington Namara yibukije abahuguwe ko bakwiye gukora ubucuruzi bukurikije amategeko
Amahugurwa yatanzwe na Equity Bank Rwanda yitabiriwe n'abagera ku 158

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .