Minisitiri w’Ibikorwa by’Umuryango w’Afurika y’Iburasirazuba, Amb.Valentine Rugwabiza, yatangaje ko ibihugu bigize uyu muryango (EAC) byamaze gusinyana amasezerano yo gukorana ubucuruzi n’ibihugu bigize Ubumwe bw’u Burayi (EU).

Amasererano y’ubufatanye mu by’ubukungu n’ubuhahirane yashyizweho umukono mu nama yahuje Abaminisitiri bagize EAC n’uwari Uhagarariye Umuryango w’Ubumwe bw’u Burayi kuwa 20 Nzeri ku cyicaro cya EAC i Arusha.

Aya masezerano EAC igiranye na EU mu bucuruzi, Amb. Rugwabiza yavuze ko azafasha abashoramari gukora ubucuruzi bizeye ko hari isoko rihoraho.

Rugwabiza yasobanuye ko EU ari umufatanyabikorwa wa mbere mu by’ubucuruzi, kuko nko mu mwaka wa 2012, 40% by’ibicuruzwa byose byari hagati y’u Rwanda n’Ubumwe bw’i Burayi.

Minisitiri Rugwabiza avuga ko mu byo u Rwanda ruzungukira muri aya amsezerano ni uko abashoramari bazashobora koherezwa ibicuruzwa ku isoko rya EU batabanje kwishyura indi misoro ihanitse.

Nubwo aya masezerano yasinywa hagati ya EAC na EU, Minisitiri Rugwabiza yasobanuye ko hari indi ntambwe ko isaba ko azabanza gusuzumwa n’inzego zikuriye impande zombi mbere yo kwemezwa burundu no gushyirwa mu bikorwa, na buri gihugu kigize EU kikabanza gushyiraho umukono kugira ngo atangire gushyirwa mu bikorwa.

Amb. Rugwabiza yasobanuye ko nta shiti ko ibihugu bigize EU uko ari 27 bizasinya ayo amsezerano, kuko komisiyo byashyizeyo yiga ku by’ayo amsezerano ntacyo irayanengaho.

Aya masezerano asinywe, EAC yiteze ko Abashoramari b’i Burayi bazagira icyizere cyo kuza gukorera mu bihugu byigize uyu muryango.

Minisitiri w’Ibikorwa by’Umuryango w’Afurika y’Iburasirazuba, Amb.Valentine Rugwabiza